ពីនេះ ពីនោះ
តើកត្តាអ្វីខ្លះដែលនាំឲ្យបំពុលបរិស្ថាន?
× ការរស់នៅរបស់មនុស្សនៅយុគសម័យថ្មី បានរំខានដោយសារការបំពុល តាមរយៈសកម្មភាពមនុស្សច្រើន មហិមា។ តើកត្តាអ្វីខ្លះ ទៅដែលនាំឲ្យបំពុលបរិស្ថាន?
ការបំពុលដោយឧស្សាហកម្ម៖ ដោយសារតែឧស្សាហកម្ម ជាកន្លែងដែលបញ្ចេញថាមពលច្រើន និងមានផ្ទុកសារធាតុគីមី ការបំពុលដោយសំណល់ អាចបង្កគ្រោះថ្នាក់ដល់សតិបញ្ញារបស់កុមារ និងធ្វើឲ្យការលូតលាស់យឺតជាងធម្មតា។ ឧស្សាហកម្ម ដែលបំពុលច្រើនជាងគេ គឺឧស្សាហកម្មផលិតក្រដាស និងផលិតចំណីអាហារ។
ការបំពុលដោយកសិកម្ម៖ ដើម្បីធ្វើស្រែចំការ ដាំដំណាំ បន្លែផ្លែឈើ ឲ្យទទួលបានផ្លែផ្កាល្អ កសិករត្រូវការប្រើថ្នាំគីមី សម្លាប់សត្វល្អិតចង្រៃ ដូចជាដង្កូវ និងសត្វល្អិតជាដើម។ ការប្រើជី និងថ្នាំសម្លាប់សត្វល្អិត ជាកត្តាដែលបំពុលបរិស្ថានយ៉ាងធ្ងន់ធ្ងរ។ កសិដ្ឋានចិញ្ចឹមសត្វជ្រូក បង្កើតឲ្យមានលាមក និងទឹកនោម ដែលបញ្ចេញនូវឧស្ម័នពុលទៅក្នុងខ្យល់ ហើយជ្រាបចូលក្នុងដី បំពុលទឹកផងដែរ។
ការបំពុលដោយវិទ្យុសកម្ម៖ រោងចក្រនុយក្លេអ៊ែរ ដែលមានផ្ទុកសារធាតុអ៊ុយរ៉ាញ៉ូម ដើម្បីផលិតគ្រឿងអគ្គិសនី ដែលពួកយោធាប្រើនៅក្នុងនាវាមុជទឹក និងផលិតគ្រាប់បែក ដោយបន្សល់សំណល់ និងបញ្ចេញកាំរស្មីថាមពល ជាហេតុនាំឲ្យបង្កគ្រោះថ្នាក់ដល់សុខភាព បណ្តាលឲ្យស្លាប់ មានជំងឺមហារីក ធ្វើឲ្យគ្មានកូន ឬធ្វើឲ្យទារកមានកាយសម្បទាមិនគ្រប់គ្រាន់ជាដើម។
ការបំពុលដោយសំណល់ផ្សេងៗ៖ ការបោះចោលសំណល់ដូចជា ថង់ប្លាស្ទិក កាតុង ក្រដាស កែវ សំណល់សរីរាង្គ សំបកដប សំបកកង់ឡាន សំបកកង់ម៉ូតូ វត្ថុទាំងអស់នេះ មិនងាយរលាយទៅក្នុងធម្មជាតិទេ ទោះជារលាយ ក៏មានរយៈពេលយូរដែរ ធ្វើឲ្យបរិស្ថានមិនស្រស់ស្រាយ។ មិនតែប៉ុណ្ណោះ ការបោះចោលសំរាមពាសវាល ពាសកាល នាំឲ្យស្ទះលូ និងត្រីងាប់ផងដែរ៕
© រក្សាសិទ្ធិដោយ thmeythmey.com