អន្តរជាតិ
វិបត្តិស៊ីរី៖ រុស្ស៊ីធ្វើម្ចាស់ផ្ទះកិច្ចចរចាដែលមានគ្រប់ភាគីស៊ីរី តែគ្មានបរទេស ប្រធានាធិបតីរុស្ស៊ី អ៊ីរ៉ង់ និងតួកគី ក្នុងជំនួបត្រីភាគីនៅទីក្រុងស៊ូជី (រូបភាពពីគេហទំព័រប្រធានាធិបតីរុស្ស៊ី)
× ប្រធានាធិបតីរុស្ស៊ី វ្ល៉ាឌីមៀ ពូទីន បានធ្វើម្ចាស់ផ្ទះជំនួបត្រីភាគីជាមួយសមភាគីអ៊ីរ៉ង់ និងតួកគី ដើម្បីរកដំណោះស្រាយវិបត្តិស៊ីរី។ ក្រោយជំនួបនៅទីក្រុងស៊ូជី ថ្ងៃទី២២ ខែវិច្ឆិកា មេដឹកនាំទាំងបីប្រទេសឯកភាពគ្នាលើគំនិតផ្ដួចផ្ដើមបង្កើតការចរចាមួយ ដែលមានសមាសភាពមកពីគ្រប់ភាគីរបស់ស៊ីរី និងគ្មានវត្តមានបរទេសឡើយ។ ទីក្រុងស៊ូជី ជាប់មាត់សមុទ្រខ្មៅ នឹងទទួលរៀបចំកិច្ចចរចានេះ ដែលសំដៅបញ្ចប់ជម្លោះរយៈពេល៧ឆ្នាំមកនេះ។
រុស្ស៊ី អ៊ីរ៉ង់ និងតួកគី បានព្រមព្រៀងគ្នាបង្កើតយន្តការថ្មីមួយទៀតដើម្បីដោះស្រាយបញ្ហានៅស៊ីរី។ ការចរចាដែលចូលរួមដោយភាគីជម្លោះនៅស៊ីរីទាំងអស់ ត្រូវបានលើកឡើងដោយប្រធានាធិបតីរុស្ស៊ី វ្ល៉ាឌីមៀ ពូទីន និងគាំទ្រប្រធានាធិបតីអ៊ីរ៉ង់ ហាសាន់ រូហានី និងប្រធានាធិបតីតួកគី តៃយីប អ៊ែរដូហ្កាន់ ក្នុងជំនួបនៅទីក្រុងស៊ូជី។ លោក ពូទីន ជួបមេដឹកនាំទាំងពីរនេះ បន្ទាប់ពីជជែកដោយផ្ទាល់ជាមួយប្រធានាធិបតីស៊ីរី បាសា អាល់អាសាដ រួចមក។
ថ្លែងក្រោយជំនួបត្រីភាគី ថ្ងៃទី២២ ខែវិច្ឆិកា លោក ពូទីន និយាយថា ការចរចាដែលមានតែភាគីស៊ីរីនេះ នឹងមានវត្តមានក្រុមប្រឆាំងកាន់តែទូលាយថែមទៀត។ ពោល គឺការចរចានឹងធ្វើឡើងនៅត្រឹមកម្រិតសមរម្យមួយ ហើយតំណាងគ្រប់ភាគីទាំងអស់នឹងត្រូវធានាថា មានមុខក្នុងតុចរចា ដែលត្រូវរៀបចំនៅទីក្រុងស៊ូជីតែម្ដង។ លោកបន្តថា មន្ត្រីរុស្ស៊ី អ៊ីរ៉ង់ និងតួកគី កំពុងរៀបចំបញ្ជីឈ្មោះអ្នកចូលរួមទាំងអស់ និងកាលបរិច្ឆេទផង។
យោងតាមការផ្សាយរបស់ទីភ្នាក់ងារព័ត៌មាន Xinhua គោលដៅនៃកិច្ចចរចាដែលស្នើឲ្យរុស្ស៊ីនេះមានគោលដៅប្រមូលគ្រប់ក្រុមនយោបាយនៅស៊ីរី ទាំងក្រុមប្រឆាំង រដ្ឋាភិបាល តំណាងគ្រប់ជនជាតិនៅស៊ីរី ដើម្បីស្វែងរកដំណោះស្រាយតាមផ្លូវនយោបាយ ជាជាងការបង្ហូរឈាម។ ប្រធានាធិបតីរុស្ស៊ីអ៊ីរ៉ង់ និងតួកគី មានគំនិតដូចគ្នា ជោគជ័យនៅសមរភូមិបានបើកផ្លូវដល់លទ្ធភាពចរចាបញ្ចប់ជម្លោះដោយសន្តិភាព។
គំនិតផ្ដួចផ្ដើមថ្មីរបស់រុស្ស៊ីពេលនេះ ហាក់កំពុងប្រជែងជាមួយកិច្ចចរចាដែលមានស្រាប់នៅទីក្រុងអាស្តាណា។ កិច្ចចរចានៅឯរដ្ឋធានីកាហ្សាក់ស្ថានមានការចូលរួមពីគ្រប់ភាគីស៊ីរី និងប្រទេសផ្សេងដូចជារុស្ស៊ី អាមេរិក ចិន និងអង្គការសហប្រជាជាតិជាដើម។ ទាក់ទងបញ្ហានេះ មេដឹកនាំរុស្ស៊ី អ៊ីរ៉ង់ និងតួកគី បានទទួលស្គាល់គុណសម្បត្តិនៃកិច្ចចរចានេះ ដែលក៏បានលើកឡើងថា ការចរចាបានមកដំណាក់កាលថ្មី គឺការចរចានយោបាយម្ដង។
ជំនួបទល់មុខរវាងមេដឹកនាំរុស្ស៊ី អ៊ីរ៉ង់ និងតួកគី ស្ដីពីវិបត្តិស៊ីរី គឺជារឿងកម្រមួយ ព្រោះភាគីទាំងអស់គាំទ្រក្រុមជម្លោះរៀងៗខ្លួន។ រុស្ស៊ី និងអ៊ីរ៉ង់ជាអ្នកគាំទ្ររបបលោក អាសាដ ប៉ុន្តែតួកគីគាំទ្រក្រុមឧទ្ទាមប្រឆាំងរដ្ឋាភិបាល។ ដោយសារវត្តមានតួកគី កាលបរិច្ឆេទនៃកិច្ចចរចារបស់ស៊ីរីខាងលើក៏មិនទាន់កំណត់ច្បាស់លាស់ ដ្បិតតួកគីជំទាស់វត្តមានក្រុមឧទ្ទាមឃើដខ្លះ ដែលជាភាគីពាក់ព័ន្ធក្នុងវិបត្តិមួយនេះដែរ៕
Tag:
ស៊ីរី
រុស្ស៊ី
តួកគី
អ៊ីរ៉ង់
© រក្សាសិទ្ធិដោយ thmeythmey.com