ជាតិ
នយោបាយជាតិ
អាសនៈឃុំ CNRP៖ បក្សខ្លះបដិសេធ ឯបក្សជនជាតិដើម គ.ជ.បរកស្នាក់ការអត់ឃើញ សកម្មភាពដេញថ្លៃជួសជុលផ្លូវមួយនៅឃុំពន្លៃ ស្រុកបរិបូរណ៍ ខេត្តកំពង់ឆ្នាំង។ ប្រភពរូបថត ហ្វេសប៊ុក លោក ម៉ៅ ផល្លី អតីតមេឃុំពន្លៃ នៃគណបក្សសង្គ្រោះជាតិ ដែលត្រូវបានរំលាយ
× គណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃទី២១ ខែវិច្ឆិកា បានចេញសេចក្តីប្រកាសព័ត៌មានទាក់ទងនឹងគណបក្សចំនួន១១ ដែលអាចទទួលបានអាសនៈក្រុមប្រឹក្សាឃុំ-សង្កាត់ ក្រោយការរំលាយគណបក្សសង្គ្រោះជាតិ ក្រោមអំណាចសាលដីកាតុលាការកំពូល។
អាសនៈក្រុមប្រឹក្សាឃុំ-សង្កាត់ជាង៥០០០ ដែលគណបក្សសង្គ្រោះជាតិ ដណ្តើមបាននាការបោះឆ្នោតជ្រើសរើសក្រុមប្រឹក្សាឃុំសង្កាត់កន្លងមក នឹងត្រូវបែងចែកទៅឲ្យគណបក្ស១១ទៅតាមច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់។
ដោយមិនបានបញ្ជាក់ពីចំនួនអាសនៈពិតប្រាកដ គណបក្សដែលត្រូវទទួលបាននូវការបែងចែកអាសនៈរួមមាន គណបក្សប្រជាជនកម្ពុជា គណបក្សហ្វ៊ុនស៊ិនប៉ិច គណបក្សសម្ព័ន្ធដើម្បីប្រជាធិបតេយ្យ គណបក្សខ្មែររួបរួមជាតិ គណបក្សសំបុកឃ្មុំសង្គមប្រជាធិបតេយ្យ គណបក្សសញ្ជាតិកម្ពុជា គណបក្សប្រជាធិបតេយ្យមូលដ្ឋាន គណបក្សសាធារណរដ្ឋប្រជាធិបតេយ្យ គណបក្សយុវជនកម្ពុជា គណបក្សអំណាចខ្មែរ និងគណបក្សជនជាតិដើមប្រជាធិបតេយ្យកម្ពុជា។
តាមសេចក្តីប្រកាសព័ត៌មានរបស់ខ្លួន គ.ជ.ប បានអះអាងថា លិខិតជូនដំណឹងស្តីពីការអនុវត្តបែងចែកអាសនៈដែលនៅទំនេរ ត្រូវបានបញ្ជូនទៅដល់គណបក្ស១០រួចហើយ គិតត្រឹមថ្ងៃទី២១ ខែវិច្ឆិកា លើកលែងតែគណបក្សជនជាតិដើមប្រជាធិបតេយ្យកម្ពុជា ដែលគ.ជ.ប ទាក់ទងមិនបាន ហើយមិនទាន់រកទីស្នាក់ការគណបក្សបក្សនេះឃើញនៅឡើយ។
ខណៈគណបក្សមួយចំនួនប្រកាសទទួលយកតាមលក្ខខណ្ឌនៃច្បាប់បោះឆ្នោត គណបក្សខ្លះនៅស្ងៀមស្ងាត់ តែក្នុងនោះមានគណបក្សយ៉ាងហោចណាស់ចំនួនបានចេញលិខិតប្រកាសមិនទទួលអាសនៈឃុំ-សង្កាត់របស់គណបក្សសង្គ្រោះជាតិដែលត្រូវបានរំលាយ ក្នុងនោះរួមមានគណបក្សសម្ព័ន្ធដើម្បីប្រជាធិបតេយ្យ គណបក្សប្រជាធិបតេយ្យមូលដ្ឋាន និងគណបក្សអំណាចខ្មែរ៕
Tag:
CNRP
អាសនៈ
ឃុំ-សង្កាត់
© រក្សាសិទ្ធិដោយ thmeythmey.com