អាមេរិក គំរាមដាក់ទណ្ឌកម្មប្រឆាំងបុគ្គលដែលនៅពីក្រោយការធ្វើទុក្ខបុកម្នេញជនជាតិរ៉ូហ៊ីងយ៉ា

អន្តរជាតិ

អាមេរិក គំរាមដាក់ទណ្ឌកម្មប្រឆាំងបុគ្គលដែលនៅពីក្រោយការធ្វើទុក្ខបុកម្នេញជនជាតិរ៉ូហ៊ីងយ៉ា

23, Nov 2017 , 10:59 pm

រូបភាព

ដោយ:

រដ្ឋាភិបាលក្រុងវ៉ាស៊ីនតោន បានហៅប្រតិបត្តិការរបស់យោធាមីយ៉ាន់ម៉ាប្រឆាំងជនជាតិភាគតិចរ៉ូហ៊ីងយ៉ា ថាជាការបោសសម្អាតឬបំបាត់ជាតិសាសន៍រ៉ូហ៊ីងយ៉ា ។ ក្រុងវ៉ាស៊ីនតោន ក៏ថែមទាំងបានព្រមានដាក់ទណ្ឌកម្មប្រឆាំងនឹងបុគ្គលទាំងឡាយណា ដែលនៅពីក្រោយនៃហេតុការណ៍ និងវិបត្តិជនភៀសខ្លួនដ៏ធំមួយនេះផងដែរ ។

លោករដ្ឋមន្ត្រីការបរទេសអាមេរិក Rex Tillerson បានថ្កោលទោសជាថ្មីលើការវាយប្រហារនៅថ្ងៃ២៥ សីហា នៅរដ្ឋRakhine របស់មីយ៉ាន់ម៉ា ដែលបានបណ្តាលឲ្យមានជនជាតិភាគតិចរ៉ូហ៊ីងយ៉ារាប់សិបម៉ឺននាក់បានភៀសខ្លួនចេញពីប្រទេស និងរស់នៅដោយលំបាកវេទនា ។ នេះបើយោងតាមសេចក្តីថ្លែងការណ៍របស់ក្រសួងការបរទេសអាមេរិក ចុះថ្ងៃ២២ វិច្ឆិកា ។

សេចក្តីថ្លែងការណ៍ដែលសង្ខេបពីដំណើរទស្សនកិច្ចរបស់លោករដ្ឋមន្ត្រីអាមេរិកទៅកាន់មីយ៉ាន់ម៉ាដដែល បានបន្តទៀតថា លោករដ្ឋមន្ត្រី បានលើកឡើងថា ការប្រវាយដែលមានជាប់ពាក់ព័ន្ធជាមួយនឹងយោធាមីយ៉ាន់ម៉ា កម្លាំងសន្តិសុខ និងអាជ្ញាធរមូលដ្ឋានផងដែរនោះ បានបង្កឲ្យមានការឈឺចាប់ និងបានបង្ខំឲ្យមនុស្សជាច្រើនម៉ឹននាក់ បានចាកចេញពីផ្ទះរបស់ពួកគេនៅមីយ៉ាន់ម៉ាដើម្បីស្វែងរកជម្រកនៅបង់ក្លាដែស ។

លោកប្រមុខការទូត ក៏បានសង្កត់ដែរថា៖« តាមរយៈការវិភាគដោយផ្អែកលើអង្គហេតុ ស្ថានភាពដែលបានកើត ឡើងនៅក្នុងរដ្ឋ Rakhine អាចចាត់ទុកជាការបំបាត់ជាតិសាសន៍ជាតិរ៉ូហ៊ីងយ៉ា។ .... សហរដ្ឋអាមេរិក នឹងបន្តចូលរួមទទួលខុសត្រូវលើវិបត្តិនេះ តាមរយៈអំណាចច្បាប់របស់អាមេរិក ដែលរាប់បញ្ចូលទាំងការដាក់ទណ្ឌកម្ម ទៅលើបុគ្គលទាំងឡាយណា ដែលនៅពីក្រោយពីហេតុការណ៍នេះ។ »

យ៉ាងណាក៏ដោយ លោកប្រមុខការទូត ក៏បានបង្ហាញការគាំទ្រចំពោះការប្តេជ្ញាចិត្តរបស់រដ្ឋាភិបាលមីយ៉ាន់ម៉ាក្នុងការបង្កើតលក្ខខណ្ឌចាំបាច់សម្រាប់ជនភៀសខ្លួន ក៏ដូចជាស្វាគមន៍ចំពោះការផ្លាស់ប្តូរយោបល់គ្នារវាងរដ្ឋាភិបាលមីយ៉ាន់ម៉ា និងបង់ក្លាដែសក្នុងការបញ្ជូនជនភៀសខ្លួនមកកន្លែងដើមវិញ ។

បើតាមរបាយការណ៍របស់អង្គការសហប្រជាជាតិ គិតចាប់ពីការប៉ះទង្គិចនៅខែសីហាមក មានជនភៀសខ្លួនជនជាតិភាគតិចម៉ូស្លីមរ៉ូហ៊ីងយ៉ា ជាង៦០ម៉ឺននាក់ហើយ បានភៀសខ្លួនចេញពីរដ្ឋ Rakhine របស់មីយ៉ាន់ម៉ាទៅកាន់បង់ក្លាដែស ដោយពួកគេ បានអះអាងថា ពួកគេ រងការគំរាមកំហែងពីសំណាក់អាជ្ញាធរ ៕