កីឡាករបាល់បោះឥណ្ឌូណេស៊ី កំណត់លទ្ធផលទុកមុន ដោយសារបានប្រាក់ខែមិនគ្រប់

កីឡាអន្តរជាតិ

អន្តរជាតិ

កីឡាករបាល់បោះឥណ្ឌូណេស៊ី កំណត់លទ្ធផលទុកមុន ដោយសារបានប្រាក់ខែមិនគ្រប់

24, Nov 2017 , 7:39 pm

រូបភាព

ដោយ: ទេព ពិទូរ្យ

កីឡាករបាល់បោះឥណ្ឌូណេស៊ី ៨នាក់ រួមទាំងមន្ត្រីក្រុមម្នាក់ត្រូវបានហាមឃាត់ចូលទីលានអស់មួយជីវិត ដោយសារពួកគេមានជាប់ពាក់ព័ន្ធការកំណត់លទ្ធផលទុកមុន។ ជុំវិញករណីនេះដែរ លីកបាល់បោះប្រទេសនេះ ថាពួកគេប្រព្រឹត្តិដូចច្នេះគឺដើម្បីបានប្រាក់យកទៅបើកឲ្យកីឡាករផ្សេងទៀត ដែលទទួលបានប្រាក់ខែមិនគ្រប់គ្រាន់។ នេះបើតាមការផ្សាយរបស់ទីភ្នាក់ងារសារព័ត៌មាន AFP។

សមាជិកក្រុម Siliwangi Bandung ដែលជាក្រុមមួយក្នុងចំណោមក្រុមជាច្រើនក្នុងលីកបាល់បោះឥណ្ឌូណេស៊ី ត្រូវបានបញ្ចប់អាជីព ក្រោយពីរកឃើញថាបានកំណត់លទ្ធផលទុកមុនចំនួន៤ប្រកួតកាលពីរដូវកាលមុន។

នេះជាករណីលើកដំបូងហើយដែលគេបានដឹងពីការប្រកួតបាល់បោះក្នុងប្រទេសដែលពោរពេញទៅដោយអំពើពុករលួយ ទោះបីជាមានករណីក្លែងបន្លំស្រដៀងគ្នានេះជាច្រើននៅក្នុងវិស័យកីឡាបាល់ទាត់ និងកីឡាវាយសីដែលមានប្រជាប្រិយភាពខ្លាំងបំផុតរបស់ឥណ្ឌូនេស៊ី។

ប្រព័ន្ធផ្សព្វផ្សាយក្នុងស្រុកមួយបានឲ្យដឹងថា កីឡាករដែលមិនបានទទួលប្រាក់ខែគ្រប់គ្រាន់ទើបពួកគេប្រព្រឹត្តិអំពើបែបនេះ ខណៈ អ្នកភ្នាល់អាចភ្នាល់លើលទ្ធផលនៃការប្រកួតជាមួយការកាត់បន្ថយប្រាក់រង្វាន់។

អតីតម្ចាស់ក្លិបនេះ គឺលោក Dennis Depriadi ក៏បានទទួលស្គាល់ថាក្រុមនេះមានបញ្ហាផ្នែកហិរញ្ញវត្ថុដែរ។
លោកបានប្រាប់ទីភ្នាក់ងារសារព័ត៌មាន AFP ថា៖«ការបង្វិលសាច់ប្រាក់របស់ក្លិបនៅមានបញ្ហា ពីព្រោះការទូទាត់ជាច្រើនដូចជា [ម្ចាស់ឧបត្ថម្ភ] មិនត្រូវបានធ្វើឲ្យទាន់ពេលតាមកាលវិភាគនោះទេ»។

ប៉ុន្តែយ៉ាងណាក៏ដោយ លោក Hasan Gozali ស្នងការសម្ព័ន្ធបាល់បោះឥណ្ឌូណេស៊ីបាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ទី២៣ ខែវិច្ឆិកាថា៖«អ្វីដែលពួកគេបានធ្វើគឺមិនអាចទទួលយកបានឡើយ»។

សូមបញ្ជាក់ថា ក្រុមបាល់បោះSiliwangi Bandung ដែលមានមូលដ្ឋាននៅទីក្រុង Bandung ភាគអាគ្នេយ៍នៃទីក្រុងហ្សាការតាប្រទេសឥណ្ឌូណេស៊ី ទទួលជ័យជម្នះត្រឹមតែ ៤ប្រកួតប៉ុណ្ណោះក្នុងចំណោមការប្រកួតទាំង ១៤លើកកាលពីរដូវកាលមុន ដែលធ្វើឲ្យក្រុមនេះក្លាយជាក្រុមដែលបង្ហាញខ្លួនអាក្រក់បំផុតក្នុងលីក៕