ជាតិ
សិង្ហបុរី សន្យាជួយពង្រឹងវិស័យកីឡានៅកម្ពុជា ដើម្បីត្រៀមប្រកួត SEA GAMES នៅឆ្នាំ២០២៣ ហ្វេសប៊ុក៖ រដ្ឋមន្រ្តីក្រសួងទេសចរណ៍លោក ថោង ខុន (កណ្ដាល)
× ភ្នំពេញ៖ សិង្ហបុរីសន្យាជួយពង្រឹងវិស័យកីឡានៅកម្ពុជា ដើម្បីត្រៀមប្រកួតស៊ីហ្គេម( SEA GAMES) នៅឆ្នាំ២០២៣។ កម្ពុជា និងសិង្ហបុរី បានចុះអនុស្សរណៈយោគយល់គ្នា ផ្ដោតលើការផ្លាស់ប្តូរបទពិសោធន៍ការងារកីឡា កាលពីថ្ងៃទី២៧ ខែវិច្ឆិកា ។
តាមរយៈខ្លឹមសារក្នុងអនុស្សរណៈនេះ សិង្ហបុរី នឹងជួយហ្វឹកហាត់កីឡាថ្នាល និងកម្រិតខ្ពស់ ,ចែករំលែកលើវិទ្យាសាស្ត្រ និងពេទ្យកីឡា ,ការប្រឆាំងនឹងការប្រើសារធាតុ Doping និងផ្តល់នូវបទពិសោធន៍រៀបចំការប្រកួតកីឡាធំៗ ក្នុងការពង្រឹងសមត្ថភាពមន្ត្រីកីឡា រួមទាំងកីឡាករកម្ពុជា ដើម្បីត្រៀមលក្ខណៈប្រកួតកីឡា SEA GAMESលើកទី៣២ នៅឆ្នាំ២០២៣។ នេះជាខ្លឹមសារដែលបានចុះហត្ថលេខាដោយលោក ថោង ខុន រដ្ឋមន្ត្រីក្រសួងទេសចរណ៍ និងលោក TAN CHUON JIN ប្រធានរដ្ឋសភា និងជាប្រធានក្រុមប្រឹក្សាអូឡាំពិកសិង្ហបុរី។
រដ្ឋមន្ត្រីក្រសួងទេសចរណ៍ បានបន្ថែមដូច្នេះថា៖«អនុស្សរណៈនេះមានសារៈសំខាន់ និងផ្តល់អត្ថប្រយោជន៍ដល់ការពង្រឹងសមត្ថភាពមន្ត្រីកីឡា និងកីឡាករកម្ពុជា ឆ្ពោះទៅត្រៀមគ្រប់លក្ខណៈសម្បត្តិ ដើម្បីទទួលបានជោគជ័យក្នុងការរៀបចំប្រកួតកីឡា SEA GAMES លើកទី៣២ នៅឆ្នាំ២០២៣»។
រដ្ឋាភិបាលបានត្រៀមខ្លួនរួចហើយ ក្នុងការរៀបចំធ្វើជាម្ចាស់ផ្ទះស៊ីហ្គេម នៅឆ្នាំ២០២៣ ដោយបានអនុម័តផែនការមេ តាំងពីថ្ងៃទី ៦ ខែឧសភា ឆ្នាំ ២០១៦មកម្ល៉េះ។ សម្រាប់ការរៀបចំព្រឹត្តិការណ៍ SEA GAMES ខាងមុខនេះ រដ្ឋាភិបាល បានចាត់តាំងរដ្ឋមន្ត្រីក្រសួងការពារជាតិជាប្រធាន ។ ចំណែកក្រសួងអប់រំ យុវជន និងកីឡា,រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងសាលារាជធានីភ្នំពេញជាអនុប្រធាន ដោយមានគណៈកម្មាធិការជាតិអូឡាំពិកកម្ពុជា (NOCC) ជាអនុប្រធានអចិន្ដ្រៃយ៍។
កន្លងមកនាយករដ្ឋមន្ត្រី ហ៊ុន សែន ធ្លាប់បានលើកឡើងថា ព្រឹត្តិការណ៍ស៊ីហ្គេមនេះ នឹងជួយឲ្យកម្ពុជាអាចផ្សព្វផ្សាយពីវប្បធម៌ សេដ្ឋកិច្ច ទេសចរណ៍ និងកេរ្តិ៍ឈ្មោះ បង្ហាញឲ្យពិភពលោកឲ្យដឹងពីភាពរុងរឿងថ្កើងថ្កានរបស់កម្ពុជា ក្រោមពាក្យស្លោកថា៖ «គ្មានអ្វីប្រសើរជាងកីឡា គ្មានអ្វីថ្លៃថ្លាជាងកិត្តិយស គ្មានអ្វីខ្ពង់ខ្ពស់ជាងជាតិរុងរឿងថ្កុំថ្កើងឡើយ»៕
Tag:
សិង្ហបុរី
កម្ពុជា
SEA GAMES
© រក្សាសិទ្ធិដោយ thmeythmey.com