ទិដ្ឋភាពខ្លះៗមុនចាប់ផ្តើមពិធីបួងសួងនៅអង្គរវត្ត

ជាតិ

ទិដ្ឋភាពខ្លះៗមុនចាប់ផ្តើមពិធីបួងសួងនៅអង្គរវត្ត

02, Dec 2017 , 12:03 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ពិធីបួងសួងចម្រើនសេចក្តីសុខ នឹងចាប់ផ្តើមនៅរសៀលនេះ ដោយការរៀបចំពិធីក្រុងពាលី នៅលើក្តារបែន ប្រាសាទអង្គរវត្ត។ នៅព្រឹកថ្ងៃទី២ ដែលជាថ្ងៃផ្តើមពិធីសាសនាដ៏ធំនេះ គណៈកម្មការចម្រុះ បានចុះត្រួតពិនិត្យទីតាំងពិធី ក្នុងនោះគេឃើញមានវត្តមាន រដ្ឋមន្ត្រីក្រសួងវប្បធម៌ និងវិចិត្រសិល្បៈ រដ្ឋមន្ត្រីក្រសួងព័ត៌មានជាដើម ចំណែកស្ថានីយ៍ទូរទស្សន៍ ក៏ត្រៀមផ្សាយផ្ទាល់ផងដែរ។

ពិធីក្រុងពាលីជាកិច្ចចាប់ផ្តើមពិធីបួងសួង គ្រោងធ្វើនៅវេលាម៉ោង ៣រសៀល ហើយចាប់ពីម៉ោង៥តទៅ នឹងមានការសម្តែងសិល្បៈជូនមហាជនទស្សនានៅខាងមុខប្រាសាទអង្គរវត្ត លុះដល់ព្រឹកថ្ងៃទី៣ ដែលជាថ្ងៃបញ្ចប់។

តាមរបាយការណ៍របស់ក្រសួងព័ត៌មាន ពិធីបួងសួងនឹងចាប់ផ្តើមនៅវេលាម៉ោង៧ព្រឹក ដោយមានការសូត្រមន្តបិណ្ឌបាត្រ ព្រះសង្ឃ ៥ពាន់អង្គ ជាមួយមហាជន។ ចំណែករសៀលចាប់ពីម៉ោង ៣កន្លះទៅ មានការសម្តែងសិល្បៈចម្រុះ។

គួរបញ្ជាក់ដែរថា តាមរបាយការណ៍របស់ក្រសួងព័ត៌មាន អ្នកសារព័ត៌មានជាតិដែលចូលយកព័ត៌មាន និងផ្តិតយករូបភាពក្នុងកម្មវិធីនេះមានចំនួន ១៩៤នាក់ សារព័ត៌មានអន្តរជាតិ ១៤នាក់ សរុបជាអង្គភាព ៦៧ ក្នុងនោះអង្គភាពអន្តរជាតិមានចំនួន ១៤អង្គភាព៕