Billboard ដែលជាក្រុមហ៊ុនព័ត៌មានតន្ត្រីដ៏ធំបំផុតរបស់អាមេរិក កាលពីចុងខែវិច្ឆិកា កន្លងមក បានប្រកាសជ័យលាភីស្ត្រីឆ្នើមក្នុងពិភពតន្ត្រី «Billboard Women in Music 2017» ដែលរៀបចំនៅមជ្ឈមណ្ឌល Hollywood & Highland Center ក្រុងហូលីវូត រដ្ឋកាលីហ្វនីញ៉ា។ តារាចម្រៀង Selena Gomez បានជាប់ជាស្ត្រីឆ្នើមប្រចាំឆ្នាំក្នុងពិភពតន្ត្រី ខណៈ Grace VanderWaal បានពានក្នុងនាមជាតារាចម្រៀងលេចធ្លោប្រចាំឆ្នាំផងដែរ។
Selena Gomez អាយុ២៥ឆ្នាំ បានឈ្នះពានស្ត្រីឆ្នើមប្រចាំឆ្នាំ (Women of the Year Award) របស់ Billboard និងជាតារាចម្រៀងទី១១ បើគិតចាប់តាំងពីឆ្នាំ២០០៧មក។ តារាចម្រៀងដែលមានភាពលេចធ្លោក្នុងឧស្សាហកម្មតន្ត្រី និងសកម្មភាពសង្គមដែលធ្លាប់ឈ្នះពានកន្លងមករួមមាន Reba McEntire (២០០៧), Ciara (២០០៨), Beyonce (២០០៩) Fergie (២០១០) Taylor Swift (២០១១ និង២០១៤) Katy Perry (២០១២) Pink (២០១៣) Lady Gaga (២០១៥) និង Madonna (២០១៦)។
Gomez បានឡើងទទួលពានរង្វាន់ ជាមួយនឹងការថ្លែងទាំងទឹកភ្នែក។ នាងបាននិយាយភ្លាមៗថា ពានរង្វាន់ Women of the Year Award នេះ គួរតែបានទៅលើ Francia Raisa ដែលជាមិត្តជិតស្និទ្ធរបស់នាង។ Raisa ដែលមានវត្តមាននៅទីនោះផងដែរ គឺជាអ្នកបរិច្ចាគក្រលៀនដល់ Gomez ដើម្បីព្យាបាលជំងឺ។
Grace VanderWaal ក៏បានផ្តល់ភាពភ្ញាក់ផ្អើលផងដែរក្នុងកម្មវិធី «Billboard Women in Music 2017» ដោយម្ចាស់ជ័យលាភី America’s Got Talent ឆ្នាំ២០១៦ រូបនេះ បានឈ្នះពាន «Rising Star Award» ក្នុងនាមជាតារាចម្រៀងលេចធ្លោប្រចាំឆ្នាំ។
VanderWaal អាយុ១៣ឆ្នាំ បានបង្ហាញក្តីរំភើបរបស់ខ្លួនក្នុងនាមជាម្ចាស់ជ័យលាភីដ៏វ័យក្មេងម្នាក់។ នាងបានឧទ្ទិសពាន Rising Star Award នេះដល់គ្រប់មនុស្សដែលបានជួយជ្រោមជ្រែងរូបនាង ជាពិសេសនាង Heidi Klum។
ពាន Rising Star Award ត្រូវបានបង្កើតឡើងចាប់តាំងពីឆ្នាំ២០០៨មក ដោយជ័យលាភីដែលទទួលបាន៩លើកមុនរួមមាន Colbie Caillat, Lady Gaga, Jazmine Sullivan, Nicki Minaj, Carly Rae Jepsen, Janelle Monáe, Ariana Grande, Kelsea Ballerini និង Halsey។
ពានរង្វាន់ផ្សេងៗទៀតរួមមាន ពាន Rulebreaker Award ដែលបានទៅលើ Kehlani, ពាន Icon of the Year (Mary J.Blige), ពាន Impact Award (Solange Knowles) ពាន Breakthrough (Camila Cabello) ពាន Powerhouse (Kelly Clarkson) និងពាន Executive of the Year Award បានទៅលើ Julie Greenwald ៕