ពីនេះ ពីនោះ
ត្រីបបែលយក្សធំជាងគេលើពិភពលោក មានរស់នៅទន្លេមេគង្គក្នុងប្រទេសកម្ពុជា
× ត្រីបបែលយក្ស (Himantura polylepis) គឺជាត្រីបបែលទឹកសាបដ៏ធំបំផុតនៅក្នុងពិភពលោក។ ត្រីបបែលយក្សនេះ មានទំហំខ្លួនអតិបរមា២៤០ស.ម និងមានទម្ងន់ ៦០០គីឡូក្រាម។ វារស់នៅតាមដងទន្លេធំៗ ដែលមានស្រទាប់ភក់ ឬខ្សាច់នៅបាតទន្លេ ទីដែលវាអាចរកបានប្រភេទសត្វអត់ឆ្អឹងខ្នង និងត្រីល្អិតជាចំណី ដូចជាទន្លេចៅប្រាយ៉ា ក្នុងប្រទេសថៃ និងទន្លេមេគង្គ ដែលតភ្ជាប់ទៅសមុទ្រ នៅក្នុងតំបន់អាស៊ីអាគ្នេយ៍ (កម្ពុជា ឡាវ និងថៃ)។
ត្រីបបែលយក្ស ហាក់បង្ហាញវត្តមានគួរឲ្យកត់សម្គាល់នៅទន្លេមេគង្គលើក្នុងប្រទេសកម្ពុជា ដែលអ្នកនេសាទតែងតែចាប់បានជារៀងរាល់ឆ្នាំ។ ប៉ុន្តែក៏មានរបាយការណ៍ថា ចំនួនត្រីបបែលយក្សមានការធ្លាក់ចុះពី៣០ ទៅ៥០ភាគរយ ក្នុងរយៈពេល២០-៣០ឆ្នាំចុងក្រោយនេះ។ ចំណែកនៅក្នុងបឹងទន្លេសាប និងទន្លេមេគង្គក្នុងខេត្តកំពង់ចាម ខេត្តព្រៃវែង បើតាមរបាយការណ៍របស់អ្នកនេសាទបានបង្ហាញថា មានការធ្លាក់ចុះពី៥០ ទៅ ៩០ភាគរយ ក្នុងរយៈពេល ២០-៣០ឆ្នាំចុងក្រោយនេះផងដែរ។ ត្រីបបែលយក្ស ត្រូវបានគេកត់ត្រាចូលក្នុងបញ្ជីរក្រហម IUCN Red List (Endangered) ជាប្រភេទត្រីរងគ្រោះជិតផុតពូជក្នុងឆ្នាំ ២០១៦។
ការនេសាទហួសកម្រិតពីអតីតកាល និងទៅអនាគត ការបាត់បង់ និងការប្រែប្រួលទីជម្រកដោយសារការសាងសង់ទំបន់វារិអគ្គិសនី ទំនងជាបញ្ហាអវិជ្ជមាន ដែលបន្តប៉ះពាល់ដល់ជីវិតមច្ឆាដែលមានខ្លួនធំ និងអាយុវែងប្រភេទនេះ។
(អត្ថបទ ដោយ Chhut Chheana រូបភាពដោយ Zeb Hogan / USAID Wonders of the Mekong).
© រក្សាសិទ្ធិដោយ thmeythmey.com