ជាតិ
សម្តេច ស ខេង ចាត់ទុកថាជាសិទ្ធិរបស់អាមេរិក ដែលរឹតបន្តឹងទិដ្ឋាការលើមន្ត្រីកម្ពុជា សម្តេច ស ខេង រដ្ឋមន្ត្រីក្រសួងមហាផ្ទៃ
× ភ្នំពេញ៖ សម្តេច ស ខេង រដ្ឋមន្ត្រីក្រសួងមហាផ្ទៃ មិនបញ្ចេញប្រតិកម្មអ្វីឲ្យធ្ងន់ធ្ងរ ទៅនឹងសហរដ្ឋអាមេរិកនោះទេ ចំពោះការរឹតបន្តឹងទិដ្ឋាការ មកលើមន្ត្រីកម្ពុជាមួយចំនួន។ រដ្ឋមន្ត្រីក្រសួងមហាផ្ទៃ យល់ថា ការរឹតបន្តឹងនេះ គឺជាសិទ្ធិរបស់សហរដ្ឋអាមេរិក ដោយមិនអាចហាមឃាត់បាន។
សម្តេច ស ខេង ត្រូវបានក្រុមអ្នកកាសែតតាមសួរពីបញ្ហាខាងលើ ក្រោយចាកចេញពីកិច្ចប្រជុំពេញអង្គនៃរដ្ឋសភា នៅព្រឹកថ្ងៃទី៧ ខែធ្នូ ឆ្នាំ២0១៧នេះ។ សម្តេច ស ខេង ឆ្លើយយ៉ាងខ្លីថា៖«រឿងហ្នឹង គឺជាសិទ្ធិរបស់សហរដ្ឋអាមេរិក។ ឲ្យធ្វើម៉េច?»។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានហៅសេចក្តីថ្លែងការណ៍របស់ក្រសួងការបរទេសសហរដ្ឋអាមេរិក ក្នុងការរឹតបណ្តឹងទិដ្ឋាការនេះ ថាជាការសម្លាប់ប្រជាធិបតេយ្យនៅកម្ពុជាដោយអយុត្តិធម៌។ លោក បន្តថា សេចក្តីថ្លែងការណ៍នេះ បង្ហាញពីបំណងពិតប្រាកដ ក្នុងការបំផ្លាញទំនាក់ទំនងរវាងសហរដ្ធអាមេរិកនិងកម្ពុជា។
អ្នកនាំពាក្យរូបនេះ បានសរសេរសារលើគណនីហ្វេសប៊ុកថា៖«ការបង្ខំឲ្យកម្ពុជាប្រឆាំងតុលាការ និងរដ្ធសភា គឺជាការប្រឆាំងនីតិរដ្ឋ ដែលលផ្ទុយពីឆន្ទៈកម្ពុជា ដែលប្រឹងប្រែងពង្រឹងជារៀងរាល់ថ្ងៃ»។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ក៏នៅមិនស្ងៀមដែរ ក្រោយសហរដ្ឋអាមេរិក ប្រកាសរឹតបន្តឹងទិដ្ឋាការលើមន្ត្រីកម្ពុជា។ លោក បានលើកឡើងថា ការដាក់លក្ខខណ្ឌណាមួយ ដើម្បីឲ្យមានការដោះលែងលោក កឹម សុខា និងអនុញ្ញាតឲ្យអតីតគណបក្សសង្គ្រោះជាតិ ធ្វើសកម្មភាពឡើងវិញ គឺជាការលូកដៃចូលកិច្ចការផ្ទៃក្នុងរបស់កម្ពុជា ដែលផ្ទុយពីនយោបាយការបរទេសរបស់លោកប្រធានាធិបតី ដូណាល់ ត្រាំ។
តាមរយៈបណ្តាញទំនាក់ទំនងតេឡេក្រាម (Telegram ) អ្នកនាំពាក្យគណបក្សកាន់អំណាច បានប្រាប់ក្រុមអ្នកកាសែតថា ទង្វើបែបនេះ គឺជាជាការរំលោភយ៉ាងកំរោល មកលើលទ្ធិប្រជាធិបតេយ្យ និងនីតិរដ្ឋនៅកម្ពុជា និងជាការរំលោភស្មារតីកិច្ចព្រមព្រៀងទីក្រុងប៉ារីស។យ៉ាងណាក៏ដោយ លោក អះអាងថា រដ្ឋាភិបាលកម្ពុជា នៅតែប្រកាន់ជំហរម៉ឺងម៉ាត់ ក្នុងការដើរតាមគន្លងលទ្ធិប្រជាធិបតេយ្យនិងនីតិរដ្ឋ។ សម្រាប់មន្ត្រីជាន់ខ្ពស់គណបក្សកាន់អំណាចខាងលើ ការទាមទារ និងការដាក់កំហិតទាំងឡាយរបស់សហរដ្ឋអាមេរិក គ្រាន់តែជាសិទ្ធិបញ្ចេញមតិនៅក្នុងសង្គមប្រជាធិបតេយ្យប៉ុណ្ណោះ។
ការធ្វើឲ្យលទ្ធិប្រជាធិបតេយ្យនិងការគោរពសិទ្ធិមនុស្ស ធ្លាក់ចុះ គឺជាហេតុផលចម្បង ដែលសហរដ្ឋអាមេរិក សម្រេចចេញសេចក្តីថ្លែងការណ៍ នៅថ្ងៃទី៦ ខែធ្នូ ឆ្នាំ២0១៧ ដើម្បីរឹតបន្តឹងទិដ្ឋាការលើមន្ត្រីរដ្ឋាភិបាល។ ហើយការដើរផ្ទុយពីកិច្ចព្រមព្រៀងទីក្រុងប៉ារីស ការរំលាយគណបក្សសង្គ្រោះជាតិ និងការបន្តឃុំលោក កឹម សុខា ក្នុងពន្ធនាគារ គឺជាអ្វីដែលសហរដ្ឋអាមេរិក ចាត់ទុកថាធ្វើឲ្យលទ្ធិប្រជាធិបតេយ្យនៅកម្ពុជា ដើរថយក្រោយ៕
Tag:
ស ខេង
ផៃ ស៊ីផាន
សុខ តសាន
អាមេរិក
© រក្សាសិទ្ធិដោយ thmeythmey.com