ភ្នំពេញ៖ សង្គមស៊ីវិល ស្នើឲ្យរដ្ឋាភិបាលគោរពសិទ្ធិមនុស្ស និងផ្ដល់យុត្តិធម៌ក្នុងសង្គម តាមរយៈការបញ្ឈប់ការរឹតត្បិតសិទ្ធិសេរីភាពមូលដ្ឋាន និងការធ្វើទុកបុកម្នេញអ្នកការពារសិទ្ធិមនុស្ស។
តាមរយៈសេចក្តីថ្លែងការណ៍រួម ដែលមានសហគមន៍ សហជីព និងអង្គការសង្គមស៊ីវិល ១០៣ស្ថាប័ន បានបង្ហាញក្តីព្រួយបារម្ភពីបញ្ហាសិទ្ធិមនុស្សនៅកម្ពុជា ក្នុងរយៈពេលប៉ុន្មានខែចុងក្រោយនេះ ដែលនាំឲ្យដំណើការលទ្ធិប្រជាធិបតេយ្យធ្លាក់ចុះ។ ក្តីព្រួយបារម្ភរបស់ស្ថាប័នទាំងនេះ បានរំឭកពីការព្រមានបិទអង្គការសង្គមស៊ីវិល ប្រព័ន្ធផ្សព្វផ្សាយឯករាជ្យ ការឃាត់ខ្លួនអ្នកកាសែត និងអ្នកការពារសិទ្ធិមនុស្សផងដែរ។ ស្ថាប័នទាំង១០៣នេះ បានស្នើឲ្យអាជ្ញាធរបញ្ឈប់ការរឹតត្បិតសិទ្ធិសេរីភាពមូលដ្ឋាន និងការធ្វើទុកបុកម្នេញអ្នកការពារសិទ្ធិមនុស្ស និងអង្គការសង្គមស៊ីវិល ។
សេចក្តីថ្លែងការណ៍រួម ដែលរំឮកពីសិទ្ធិមនុស្សអន្តរជាតិ បានសរសេរដូច្នេះថា៖«យើងខ្ញុំក៏សូមសំណូមពរឲ្យអាជ្ញាធរទម្លាក់ចោលការចោទប្រកាន់និងការផ្តន្ទាទោស និងដោះលែងអ្នកជាប់ឃុំមួយចំនួនដូចជា សកម្មជន អ្នកសារព័ត៌មាន និងអ្នកការពារសិទ្ធិមនុស្ស ដែលត្រូវបានចាប់ខ្លួនដោយសារការបំពេញការងារស្របច្បាប់របស់ខ្លូនដើម្បីបម្រើផលប្រយោជន៍សង្គមកម្ពុជា។ រាល់ការស៊ើបអង្កេតណាមួយមកលើអង្គការសង្គមស៊ីវិលគួរតែគោរពនីតិវិធីច្បាប់ឲ្យបានត្រឹមត្រូវ និងប្រកាន់នូវគោលការណ៍ឯករាជភាព និងភាពមិនលំអៀង»។
បន្ថែមពីនេះស្ថាប័នទាំងនេះ អំពាវនាវឲ្យអាជ្ញាធរជួយបង្កលក្ខណៈងាយស្រួលដល់សង្គមស៊ីវិល អាចបន្តការងារស្របច្បាប់របស់ខ្លួន ដើម្បីលើកកម្ពស់សិទ្ធិមនុស្ស លទ្ធិប្រជាធិបតេយ្យ និងសិទ្ធិទទួលបានព័ត៌មាន ដោយគ្មានការរឹតត្បិត ឬការរំលោភបំពាន ក្នុងការលើកស្ទួយដំណើរការអភិវឌ្ឍប្រទេសកម្ពុជាប្រកបដោយចីរភាព។
សារព័ត៌មានថ្មីៗ មិនទាន់អាចសុំការអត្ថាធិប្បាយពីអ្នកនាំពាក្យរដ្ឋាភិបាល តបនឹងការស្នើរបស់ខាងអង្គការសង្គមស៊ីវិលនៅឡើយទេ។
តែយ៉ាងណាសម្ដេចនាយករដ្ឋមន្ត្រី ហ៊ុន សែន ធ្លាប់និយាយថា កម្ពុជាមិនមានការរំលោភសិទ្ធិមនុស្សនោះទេ ហើយរាល់ការបិទអង្គការសង្គមស៊ីវិល និងឃាត់ខ្លួនអ្នកការពារសិទ្ធិមនុស្សកន្លងមក ដោយសារតែអ្នកទាំងនោះ អនុវត្តផ្ទុយពីច្បាប់នៃប្រទេសកម្ពុជា។ បើតាមសម្ដេច ហ៊ុន សែន អង្គការសង្គមស៊ីវិល និងប្រព័ន្ធផ្សព្វផ្សាយមួយចំនួន បានទទួលជំនួយពីបរទេស ដើម្បីវាយរិះគន់ និងវាយប្រហារមកលើរដ្ឋាភិបាល។
ត្រង់ចំណុចនេះខាងសង្គមស៊ីវិល ចាត់ទុកថា ការលើកឡើងរបស់ប្រមុខរដ្ឋាភិបាលនេះ គ្រាន់តែជាលេស ក្នុងការយកប្រព័ន្ធច្បាប់ ដើម្បីរឹតបន្តឹងសិទ្ធិបញ្ចេញមតិ និងសកម្មភាពនានារបស់ក្រុមអ្នកការពារសិទ្ធិមនុស្សប៉ុណ្ណោះ។
ជុំវិញបញ្ហាខាងលើនេះ សហភាពអឺរ៉ុបប្រចាំកម្ពុជា ពិតជាមានការព្រួយបារម្ភ ចំពោះដំណើការវិវត្តចុងក្រោយនៅប្រទេសកម្ពុជា ដូចជាការរំលាយគណបក្សសង្គ្រោះជាតិ បញ្ហាសិទ្ធិមនុស្ស និងការរឹតត្បិតសេរីភាពប្រព័ន្ធផ្សព្វផ្សាយផងដែរ។ ឯកអគ្គរដ្ឋទូតសហភាពអឺរ៉ុបប្រចាំកម្ពុជាលោក George Edgar បានសង្កេតឃើញថា ការអនុវត្តច្បាប់របស់អាជ្ញាធរនៅកម្ពុជា ហាក់មានគោលបំណងផ្នែកណាមួយ ទៅក្រុមដែលរដ្ឋាភិបាលគិតថាប្រឆាំង និងគ្មានផ្ដល់ប្រយោជន៍ដល់ខ្លួន។
ថ្លែងនៅក្នុងសន្និសីទកាសែត ស្តីពីទិវាសិទ្ធិមនុស្សអន្តរជាតិ កាលពីថ្ងៃទី៩ ធ្នូ លោក George Edgar បាននិយាយដូច្នេះថា៖«យើងមានអារម្មណ៍ថា រយៈពេល២ ទៅ៣ខែកន្លងមកនេះ ឃើញថាការអនុវត្តច្បាប់ហាក់ដូចជាមានផ្នែកណាមួយ ដែលរដ្ឋាភិបាលចង់អនុវត្ត ដោយផ្ដោតទៅលើស្ថាប័នទាំងឡាយណា ដែលរាជរដ្ឋាភិបាលកម្ពុជាមើលឃើញថាហាក់មានការទិតៀន ឬក៏មិនផ្ដលអំណោយផលមកដល់រដ្ឋាភិបាល»៕