កីឡាជាតិ
ជាតិ
កីឡាករ ស្រ៊ុន ច្រេស សុខចិត្តលាឈប់ពីការងារដើម្បីចូលរួមប្រកួតកីឡាគុនល្បុក្កតោ
× ដោយស្រលាញ់ក្បាច់គុនល្បុក្កតោដែលជាកេរតំណែលរបស់បុព្វបុរសខ្មែរកីឡាករ ស្រ៊ុន ច្រេស សម្រេចចិត្តលាឈប់ពីការងារជាអ្នកក្រឡុកស្រាក្នុងបា ដើម្បីចូលរួមប្រកួតកីឡាគុនល្បុក្កតោជ្រើសរើសជើងឯកថ្នាក់ប្រចាំឆ្នាំ២០១៧។ ច្រេស បានបញ្ជាក់ថា ការលាឈប់នេះបន្ទាប់ពីកន្លែងការងារមិនអាចទទួលយកលក្ខណសុំច្បាប់ឈប់របស់ខ្លួនបាន។ សិស្សគុននៅក្លិបល្បុក្កតោបញ្ញាសាស្ត្ររូបនេះ បានបង្ហាញទំនុកចិត្តយ៉ាងមុតមាំ និងរំពឹងទទួលបានលទ្ធផលល្អសម្រាប់ការចូលរួមលើកដំបូងរបស់គេ។
អ្នកលេងគុនល្បុក្កតោ ស្រ៊ុន ច្រេស បានសម្រេចចិត្តបោះបង់ការងារជាអ្នកក្រឡុកស្រាក្នុងបាដែលជាប្រភពចំណូលរបស់ខ្លួនដើម្បីចូលរួមប្រកួតកីឡាគុនល្បុក្កតោជ្រើសជើងឯកថ្នាក់ជាតិឆ្នាំ២០១៧ ដែលរូបគេស្រលាញ់។ កីឡាករមកពីខេត្តកំពង់ចាមរូបនេះបានបញ្ជាក់ថា ការសម្រេចសុំឈប់ពីការងារនេះបន្ទាប់ពីកន្លែងការងារមិនអាចបំពេញតាមលក្ខណចង់បានរបស់ខ្លួន ពោលគឺរូបគេត្រូវការសុំពីរលើកក្នុងខែនេះតែក្រុមហ៊ុនមិនអនុញ្ញាត។ កីឡាកររូបនេះ ត្រូវសុំច្បាប់ចូលរួមប្រកួតគុនល្បុក្កតោជ្រើសរើសជើងថ្នាក់ជាតិឆ្នាំនេះ និងដើម្បីចូលរួមសម្តែងគុនល្បុក្កតោនាថ្ងៃទី១៦ ធ្នូ នៅសកលវិទ្យាល័យបញ្ញាសាស្ត្រដែលខ្លួនទទួលបានអាហារូបករណ៍១០០ភាគរយ។
ក្នុងបទសម្ភាសជាមួយសារព័ត៌មានថ្មីៗសិស្សគុនមកពីក្លិបល្បុក្កតោបញ្ញាសាស្ត្ររូបនេះបានបញ្ជាក់ពីមូលហេតុយ៉ាងដូច្នេះថា៖«ការដែលខ្ញុំសម្រេចចិត្តធ្វើបែបនេះដោយសារខ្ញុំស្រលាញ់ក្បាច់គុនល្បុក្កតោ ហើយខ្ញុំចង់ចូលរួមចំណែកថែរក្សានិងអភិរក្សក្បាច់គុនដែលកេរតំណែលរបស់បុព្វបុរសខ្មែរ និងចង់បង្ហាញឲ្យបរទេសឃើញថាខ្មែរមានក្បាច់គុនបែបវប្បធម៌ដ៏អស្ចារ្យ»។
ក្រោយបង្ហាញពីអារម្មណ៍ភិតភ័យសម្រាប់ការចូលរួមលើកដំបូងរបស់ខ្លួន ច្រេស ដែលជាតួសម្តែងក្នុងរឿង Jack Break បានបង្ហាញពីក្តីរំពឹងនិងការជឿជាក់ដូច្នេះថា៖«ខ្ញុំមានអារម្មណ៍រាងភ័យបន្តិច តែក៏ចង់ប្រកួតណាស់ដែរ។ ខ្ញុំសង្ឃឹមខ្លាំងនិងជឿជាក់លើសមត្ថភាពខ្លួនឯងថា ខ្ញុំអាចធ្វើបាន»។
អ្វីៗខុសពីការតាំងចិត្តនិងការរំពឹងរបស់សិស្សគុនក្លិបល្បុក្កតោបញ្ញាសាស្ត្ររូបនេះ ស្រ៊ុន ច្រេស ដែលប្រកួតលើវិញ្ញាសាសម្តែងមេគុនល្បុក្កតោត្រូវបានធ្លាក់ត្រឹមវគ្គដំបូងក្រោចចាញ់គូប្រកួតរបស់ខ្លួន។ តែយ៉ាងណា ច្រេស មិនមានការអន់ចិត្តចំពោះលទ្ធផលនេះឡើយ ដោយរូបគេចាត់ទុកការចាញ់នេះជាបទពិសោធសម្រាប់ខ្លួនក្នុងការអភិវឌ្ឍសមត្ថភាពឲ្យកាន់តែល្អប្រសើរ។
ការប្រកួតកីឡាគុនល្បុក្កតោជ្រើសរើសជើងឯកថ្នាក់ជាតិឆ្នាំនេះមានកីឡាករកីឡាការិនីជាង២០០នាក់មកពី១៧ក្លិប-សមាគមក្នុង៥រាជធានីខេត្តចូលរួម។ ការប្រកួតប្រព្រឹត្តទៅរយៈពេល៣ថ្ងៃចាប់ពីថ្ងៃទី៩ ដល់ថ្ងៃទី១១ ខែធ្នូ ឆ្នាំ២០១៧ នៅសាលដំបូលទូកនៃសកលវិទ្យាល័យភូមិន្ទភ្នំពេញ៕
Tag:
ល្បុក្កតោ
ស្រ៊ុន ច្រេស
ជើងឯកថ្នាក់ជាតិឆ្នាំ២០១៧
© រក្សាសិទ្ធិដោយ thmeythmey.com