លោក នីម ឆ្លៀតពេលទំនេរច្នៃកង់គ្រួសារយ៉ាងប្លែក ដើម្បីដាស់តឿនយុវជន

ជាតិ

រថយន្ត

សង្គមជាតិ

11, Dec 2017 , 8:26 pm

រូបភាព

ដោយ: ខន ចំប៉ា

លោក អៀ ហុកនីម ជាអ្នកជំនាញផ្នែកមេកានិកមួយរូប ដែលបានឆ្លៀតពេលទំនេររបស់ខ្លួបន ច្នៃកង់គ្រួសារយ៉ាង។ លោក អៀ ហុកនីម បានថ្លែងប្រាប់សារព័ត៌មានថ្មីៗថា លោកចំណាយពេលមកច្នៃចក្រយានគ្រួសារនេះ គឺក្នុងបំណងដាស់តឿនយុវជន ឲ្យចេះឆ្លៀតពេលទំនេរ ធ្វើកិច្ចការងារដែលមានប្រយោជន៍សម្រាប់ខ្លួនឯង គ្រួសារ និងសង្គមជាតិ។

លោក អៀ ហុកនីម បានចំណាយពេលទំនេររបស់ខ្លួន រយៈពេលប្រមាណ៣សប្តាហ៍ ច្នៃកង់មួយគ្រឿង ដែលមានកន្លែងអង្គុយសម្រាប់មនុស្ស៣នាក់។ គាត់ បានដាក់ឈ្មោះកង់ដែលខ្លួនដំឡើងដ៏ប្លែកនេះថា «ចក្រយានគ្រួសារផលិតនៅប្រទេសកម្ពុជា»។

លោក ហុកនីម ដែលមានជំនាញផ្នែកមេកានិកស្រាប់ បានថ្លែងប្រាប់សារព័ត៌មានថ្មីៗថា លោកយកពេលទំនេរ មកច្នៃកង់គ្រួសារនេះ គឺដើម្បីដាស់តឿនស្មារតីរបស់យុវជន កុំឲ្យទុកពេលវេលាទំនេរឲ្យកន្លងទៅដោយឥតប្រយោជន៍ ឬយុវជន គួរតែយកពេលទំនេរ ទៅធ្វើកិច្ចការណាដែលអាចនាំឲ្យខ្លួនគេ និងសង្គមអភិវឌ្ឍន៍ រីកចម្រើនទៅមុខ។ លោក អៀ ហុកនីម បញ្ជាក់បន្ថែមដូច្នេះ៖«ខ្ញុំឃើញក្មេងៗឥឡូវចំណាយពេលច្រើន អង្គុយមើលអ៊ីនធឺណិតនៅក្នុងហាងកាហ្វេ។ បើពួកគេ ស្រាវជ្រាវកិច្ចការងារសាលា ឬកិច្ចការដែលទាក់ទងនឹងការងារមិនអីទេ ប៉ុន្តែមើលអ៊ីនធឺណិតមួយមុខ គ្មានប្រយោជន៍»។

ចក្រយានគ្រួសារពណ៌សនេះ មានកង់ ចំនួន៤ ដូចនឹងរថយន្តធុនតូចដែរ និងមានកន្លែងអង្គុយសម្រាប់មនុស្ស៣នាក់។ នៅផ្នែកខាងក្រោយអង្គុយបាន២នាក់ និងខាងមុខសម្រាប់ម្នាក់(ក្មេង) មានស៊ីផ្លេ ព្រមទាំងកន្ត្រកសម្រាប់ដាក់អ៊ីវ៉ាន់ផង។

មានអាយុ៤៩ឆ្នាំ លោក ហុកនីម ឲ្យដឹងទៀតថា ក្រៅពីកង់ លោកក៏ធ្លាប់បានរថយន្ត និងម៉ូតូផងដែរ។ ដោយឡែកសម្រាប់«ចក្រយានគ្រួសារផលិតនៅប្រទេសកម្ពុជា»នេះ លោកក៏លក់ផងដែរ ប្រសិនបើមានអ្នកបញ្ជាទិញ។ ក្នុងមួយគ្រឿង មានតម្លៃចាប់ពី៣០០ដុល្លារអាមេរិក អាស្រ័យលើគ្រឿងផ្គុំ ដែលគ្រឿងខ្លះជាគ្រឿងថ្មី និងត្រូវទិញពីប្រទេសថៃ ឬប្រទេសជប៉ុន។ នេះបើតាមលោក នីម ដដែល មុននឹងលោកបញ្ជាក់ថា តម្លៃច្នៃចក្រយានគ្រួសារនេះ ក៏ផ្អែកលើគុណភាព សោភ័ណភាព និងគំនិតច្នៃប្រឌិតរបស់ខ្លួនដែរ៕