សមាគមវាយកូនបាល់ក្រសួងមហាផ្ទៃនិងនគរបាលជាតិសុំដកខ្លួនភ្លាមៗពីជើងឯកថ្នាក់ជាតិ

កីឡាជាតិ

ជាតិ

សមាគមវាយកូនបាល់ក្រសួងមហាផ្ទៃនិងនគរបាលជាតិសុំដកខ្លួនភ្លាមៗពីជើងឯកថ្នាក់ជាតិ

12, Dec 2017 , 10:00 pm

រូបភាព

ដោយ:

សមាគមវាយកូនបាល់ក្រសួងមហាផ្ទៃ និងអគ្គស្នងការនគរបាលជាតិបានសម្រេចដកខ្លួនពីការប្រកួតកីឡាវាយកូនបាល់ជ្រើសរើសជើងថ្នាក់ជាតិឆ្នាំ២០១៧ ដែលកំពុងដំណើរការប្រកួតយ៉ាងតក់ក្រហល់ក្រោយមានបញ្ហាមិនពេញចិត្តមួយចំនួន។ លោក ឆាយ មនសិកា មន្ត្រីបច្ចេកទេសរៀបចំការប្រកួតអះអាងថា ទោះបីក្លិបទាំងពីរសុំដកខ្លួនតែការប្រកួតនៅដំណើរការប្រក្រតី។

លោក ជា ប៊ុនហេង ប្រធានសមាគមកីឡាវាយកូនបាល់ក្រសួងមហាផ្ទៃ និងអគ្គស្នងការនគរបាលជាតិបានសម្រេចដកខ្លួនភ្លាមៗពីការប្រកួតកីឡាវាយកូនបាល់ជ្រើសរើសជើងឯកថ្នាក់ជាតិប្រចាំឆ្នាំ២០១៧ ដែលកំពុងដំណើរការប្រកួតនៅទីលានវាយកូនបាល់ក្នុងពហុកីឡដ្ឋានជាតិ។ ការដកខ្លួនយ៉ាងតក់ក្រហល់ទាំងការប្រកួតដំណើរការបាន១ថ្ងៃនេះក្រោយលោកយល់ថា គណៈកម្មការរៀបចំការប្រកួតគ្មានតម្លាភាព។

«ការសម្រេចដកខ្លួនរបស់យើងបន្ទាប់ពីយើងមើលឃើញថា គណៈកម្មការរៀបចំការប្រកួតមានភាពមិនប្រក្រតី គ្មានតម្លាភាព យុត្តិធម៌ និងធ្វើអ្វីតាមចិត្តរបស់គេ។ នៅបណ្តាប្រទេសធំៗលើពិភពលោកទាំងអស់ ការប្រកួតទាំងឡាយពេលមានបញ្ហាអ្វីមួយ គេត្រូវកោះប្រជុំរវាងគណៈកម្មការ និងតំណាងក្លិបសមាគមនីមួយៗតែសហព័ន្ធមិនបានអនុវត្តដូចនេះឡើយ»។ នេះជាការលើកឡើងរបស់លោក ជា ប៊ុនហេង ដែលលោកបានបន្ថែមថា ចាប់ពីការដកខ្លួននេះគឺមិនត្រូវមានឈ្មោះកីឡាករកីឡាកររបស់លោកក្នុងការប្រកួតនេះទៀតឡើយ។

ជាមួយគ្នានេះគ្រូបង្វឹកក្រុមកីឡាវាយកូនបាល់ក្រសួងមហាផ្ទៃលោក យី សារិន បានបញ្ជាក់ពីមូលហេតុនៃការដកខ្លួនយ៉ាងដូច្នេះថា៖«ការដកខ្លួននេះធ្វើឡើងក្រោយគណៈកម្មាការរៀបចំការប្រកួតបានសម្រេចឱ្យកីឡាករ២រូបរបស់ក្លិបមហាផ្ទៃនិងការពារជាតិចាញ់ដោយគ្មានមូលហេតុជាក់លាក់។ យើងសម្រេចដកខ្លួន ព្រោះការប្រកួតនេះគ្មានយុត្តិធម៏ គេឱ្យយើងចាញ់ដោយគ្មានហេតុផលសមរម្យគេអាចសុំពន្យាពេលប្រកួតបានតែយើងវិញអត់ទេគ្រាន់តែយឺតបន្តិចគេអោយចាញ់តែម្តង»។

ឆ្លើតតបនឹងការចោទខាងលើមន្ត្រីគណៈកម្មការរៀបចំការប្រកួតជើងឯកថ្នាក់ជាតិកីឡាវាយកូនបាល់លោក ឆាយ មនសិកា មិនត្រឹមតែច្រានចោលការចោទខាងលើនោះទេ ថែមទាំងបញ្ជាក់ថា មិនមានភាពមិនប្រក្រតីអ្វីកើតឡើងដូចការលើកឡើងខាងលើនោះទេ។ ហើយលោកអះអាងថា ការកាត់ក្តីឲ្យកីឡាករពីរនាក់មកពីសមាគមក្រសួងមហាផ្ទៃ និងក្រសួងការពារជាតិខាងលើ ព្រោះកីឡាករទាំងពីរមិនគោរពលក្ខខណ្ឌការប្រកួត ពោលគឺពួកគេអវត្តមានក្នុងការប្រកួតដែលគណៈកម្មការបានកំណត់។

«គណៈកម្មការយើងបានហៅឈ្មោះកីឡាករ ឌឹម សមសុជាភារុណ និង យី គាវរៈ ឲ្យប្រកួតនៅជុំទី២ ប៉ុន្តែយើងមិនឃើញកីឡាករទាំង២នេះចូលមកទីលាននោះទេ។ តាមបទបញ្ញាដែលយើងបានចែកឲ្យក្លិបមួយៗ គឺនៅពេលយើងប្រកាសឈ្មោះកីឡាករទាំង២ឲ្យចូលទីលាន ហើយរយៈពេល១៥នាទីមិនឃើញមានន័យថា គាត់បោះបង់ចោលការប្រកួត។ តែបើមានកីឡាករណាម្នាក់នៅក្នុងទីលានគាត់នឹងឈ្នះដោយស្វ័យប្រវត្តិ។ នេះមិនឃើញទាំង២នាក់តែម្តង»។ នេះជាការលើកឡើងរបស់លោក ឆាយ មនសិកា ហើយលោកបានបន្ថែមថា ទោះបីក្លិបទាំងពីរបានដកខ្លួនក៏ដោយ តែការប្រកួតនៅដំណើរដូចធម្មតា។

បញ្ហាខាងលើបានកើតឡើងក្នុងជំនួបវគ្គពាក់កណ្តាលផ្តាច់ព្រ័ត្ររវាងកីឡាករ យី គាវរៈ ជាមួយ ឌឹម សមសុជាភារុណលើវិញ្ញាសាឯត្តជនបុរស តែ គាវរៈ សុំដកខ្លួនក្រោមហេតុផលមានបញ្ហាជើង និងចង់ទុកកម្លាំងប្រកួតវិញ្ញាសាវាយគូ ដែលនាំឲ្យ សមសុជាភារុណ ត្រូវឡើងទៅប្រកួតផ្តាច់ព្រ័ត្រជាមួយ ប៊ុន កេន្នី ដោយស្វ័យប្រវត្តិ។ ប៉ុន្តែគណៈកម្មការបានឲ្យអ្នកទាំង២នេះចាញ់ដូចគ្នាក្រោមហេតុផលមិនឃើញកីឡាករទាំង២បង្ហាញខ្លួន។

ការប្រកួតកីឡាវាយកូនបាល់ជ្រើសរើសជើងឯកថ្នាក់ជាតិឆ្នាំ២០១៧ មានកីឡាករកីឡាការិនីចំនួន៥៥នាក់មកពី១០ក្លិបសមាគមចូលរួម តែដោយសារក្រសួងមហាផ្ទៃនិងអគ្គស្នងការនគរបាលជាតិដកខ្លួនដូច្នេះ ការប្រកួតឆ្នាំនេះនៅសល់៨ក្លិបសមាគមដោយមានកីឡាករកីឡាការិនី៤៤នាក់ចូលរួម៕