ប៉េតង់ជើងឯកអាស៊ី៖ យុវជនក្រសោបបាន២ ក្នុងចំណោមមេដាយមាស៣ និងសំរឹទ្ធ២របស់កម្ពុជា

កីឡាជាតិ

ជាតិ

ប៉េតង់ជើងឯកអាស៊ី៖ យុវជនក្រសោបបាន២ ក្នុងចំណោមមេដាយមាស៣ និងសំរឹទ្ធ២របស់កម្ពុជា

13, Dec 2017 , 9:59 pm

រូបភាព

ដោយ:

ភ្នំពេញ៖ ក្រុមអត្តពលិកកម្ពុជាឈ្នះមេដាយមាស៣ និងសំរឺទ្ធ២ សម្រាប់ការប្រកួតកីឡាប៉េតង់ ជ្រើសរើសជើងឯកអាស៊ីលើកទី១ នៅទីក្រុងបាងកក ប្រទេសថៃ។ ក្នុងចំណោមមេដាយមាសទាំងនេះ យុវជនថ្នាលក្រសោបបានពីរ និងឈុតធំបុរសបាន១ ខណៈម្ចាស់មាសពិភពលោក កីឡាការិនី អ៊ុក ស្រីមុំ បានត្រឹមសំរឹទ្ធ។

ក្រុមអត្តពលិកប៉េតង់កម្ពុជា បាននាំជោគជ័យដ៏ធំធេង ជូនប្រទេសជាតិ តាមរយៈការឈ្នះមេដាយមាស៣ និងសំរឹទ្ធ២ ពីការប្រកួតជើងឯកអាស៊ីលើកទី១ នៅទីក្រុងបាងកក ប្រទេសថៃ។ អត្តពលិកកម្ពុជា បាននាំយកមេដាយ និងពានជ័យលាភីកម្រិតអាស៊ី មកកម្ពុជា កាលពីថ្ងៃទី១២ ខែធ្នូ ។

គេសង្កេតឃើញភាពជោគជ័យដ៏អស្ចារ្យលើកនេះ មានការរួមចំណែកដ៏ធំធេង ពីសំណាក់ក្រុមកីឡាករយុវជនថ្នាល និងក្រុមជើងចាស់ រួមជាមួយម្ចាស់មេដាយមាស ខណៈកីឡាការិនី កែ ឡេង ដែលទើបដណ្តើមបានមេដាយមាសពិភពលោក កាលពីពេលថ្មីៗ មិនទទួលបានមេដាយឡើយ។

បើយោងតាមលោក សូម៉ៃ សុខគា អគ្គលេខាធិការរងសហព័ន្ធកីឡាប៊ូល និងប៉េតង់កម្ពុជា និងប្រធានប្រតិភូមេដាយមាសទាំង៣ របស់កម្ពុជា រកបានដោយកីឡាករ ឃួន លីហ៊ លើវិញ្ញសាវាយយកពិន្ទុ បន្ទាប់រូបគេបានចាប់ដៃគ្នាជាមួយកីឡាករ កុយ សុភក្ត្រា កៅ ភក្តី និង ភាព វ៉ាឃីម រកបានមួយទៀតលើវិញ្ញាសា៣នាក់ទល់៣នាក់យុវជន និងមួយទៀតរកបានលើវិញ្ញាសា៣នាក់ ទល់៣នាក់ក្រុមធំ ដែលជាការចាប់ដៃគ្នា រវាងកីឡាករ សុខ ចាន់មាន យ៉ា ច័ន្ទដារារិទ្ធ យឹម សុភ័ណ្ឌ និង ថោង ឈឿន។ ចំណែកមេដាយសំរឹទ្ធទាំងពីរ រកបានលើវិញ្ញាសាវាយយកពិន្ទុ ដោយកីឡាករ សុខ ចាន់មាន និងកីឡាការិនី អ៊ុក ស្រីមុំ។

សម្រាប់ការប្រកួតកីឡាប៉េតង់ ជ្រើសរើសជើងឯកអាស៊ី 1st Asian Petanque ChampionShip ដែលរៀបចំនៅទីក្រុងបាងកក ប្រទេសថៃ ចាប់ពីថ្ងៃទី៨ ដល់ថ្ងៃទី១២ ខែធ្នូ ឆ្នាំ២០១៧ កម្ពុជាបានបញ្ជូនកីឡាករ កីឡាការិនី ចំនួន១២រូប ឲ្យចូលរួម។ ក្នុងនោះមានកីឡាករ សុខ ចាន់មាន, យ៉ា ច័ន្ទដារារិទ្ធ, យឹម សុភ័ណ្ឌ, ថោង ឈឿន, ឃួន លីហ៊, កុយ សុភក្ត្រា, កៅ ភក្តី និង ភាព វ៉ាឃីម, កីឡាការិនី កែ ឡេង, អ៊ុក ស្រីមុំ, អ៊ុន ស្រីយ៉ា និង ដួង ឌីណា៕