លោក ញ៉ាន សុខវិសាល មន្ត្រី NOCC ចូលរួមកិច្ចពិភាក្សាដើម្បីត្រៀមការប្រកួតជើងឯកអាស៊ីនៅឥណ្ឌូណេស៊ី

កីឡាជាតិ

ជាតិ

លោក ញ៉ាន សុខវិសាល មន្ត្រី NOCC ចូលរួមកិច្ចពិភាក្សាដើម្បីត្រៀមការប្រកួតជើងឯកអាស៊ីនៅឥណ្ឌូណេស៊ី

14, Dec 2017 , 9:39 pm

រូបភាព

លោក ញ៉ាន សុខវិសាល ប្រធាននាយកដ្ឋានទំនាក់ទំនងការបរទេសនិងកិច្ចសហប្រតិបត្តការអន្តរជាតិនៃ NOCC ចូលរួមកិច្ចប្រជុំកីឡាអាស៊ីលើកទី១៨នៅឥណ្ឌូណេស៊ី

ដោយ:

លោក ញ៉ាន សុខវិសាល ប្រធាននាយកដ្ឋានទំនាក់ទំនងការបរទេស និងកិច្ចសហប្រតិបត្តិការអន្តរជាតិនៃគណៈកម្មាធិការជាតិអូឡាំពិកកម្ពុជា(NOCC) បាននិងកំពុងប្រជុំនាយបេសកកម្ម ដើម្បីពិភាក្សានិងលើកពីបញ្ហាពាក់ព័ន្ធការប្រកួតកីឡាអាស៊ីលើកទី១៨(18th Asian Games)ដែលប្រព្រឹត្តទៅនៅខែសីហា ឆ្នាំ២០១៨ នៅប្រទេសឥណ្ឌូណេស៊ី។ ក្រៅពីកិច្ចពិភាក្សាលោក ញ៉ាន សុខវិសាល រួមជាមួយមន្ត្រី៤៤រូបផ្សេងទៀតបានទៅពិនិត្យទីលានប្រកួត និងកន្លែងស្នាក់នៅរបស់កីឡាករផងដែរ។

ប្រធាននាយកដ្ឋានទំនាក់ទំនងការបរទេសនិងកិច្ចសហប្រតិបត្តិការណ៍អន្តរជាតិនៃ NOCC លោក ញ៉ាន សុខវិសាល និងមន្ត្រីចំនួន៤៤រូបមកពីប្រទេសក្នុងតំអាស៊ីផ្សេងទៀតបាននិងកំពុងពិភាក្សាគ្នានៅទីក្រុងហ្សាកាតាប្រទេសឥណ្ឌូណេស៊ី ដើម្បីស្វែងរកចំណុចឯកភាពមួយសម្រាប់ត្រៀមការប្រកួតជើងឯកអាស៊ីលើកទី១៨នៅប្រទេសឥណ្ឌូណេស៊ី។

បើយោងតាមលោក ញ៉ាន សុខវិសាល ក្រោយពិភាក្សាអស់រយៈពេល៣ថ្ងៃចាប់ពីថ្ងៃទី១២ ដល់ថ្ងៃទី១៤ ខែធ្នូ ឆ្នាំ២០១៧ ក្រុមប្រឹក្សាកីឡាអាស៊ី(OCA)បានសម្រេចដាក់កីឡាចំនួន៤០ប្រភេទលើ៤០វិញ្ញាសាសម្រាប់ចូលរួមប្រកួតប្រជែង។ លោកបានឲ្យដឹងទៀតថា ក្រៅពីការពិភាក្សាពីការរៀបចំបែបបទចូលរួម លោកនិងមន្ត្រីទាំងនោះបានទៅពិនិត្យទីលានប្រកួត និងកន្លែងស្នាក់នៅហូបចុករបស់កីឡាករកីឡាការិនីផងដែរ។ លោកបានបញ្ជាក់ថា នៅមានកន្លែងមួយចំនួនបាននិងកំពុងស្ថិតនៅក្នុងដំណាក់កាលសាងសង់នៅឡើយ ដោយគ្រោងបញ្ចប់ការសាងសង់ក្នុងខែមេសា ឆ្នាំ២០១៨ ខាងមុខនេះ។

ការប្រកួតកីឡាអាស៊ីលើកទី១៨(18th Asian Games)នឹងប្រព្រឹត្តទៅចាប់ពីថ្ងៃ១៨ ខែសីហា ដល់ថ្ងៃទី២ ខែកញ្ញា ឆ្នាំ២០១៨ នៅទីក្រុងហ្សាកាតា និងទីក្រុងប៉ាឡេមបាងនៃប្រទេសឥណ្ឌូនេស៊ី៕