រដ្ឋចំណាយថវិកាពី៧ប៊ីលានទៅ១២ប៊ីលានរៀលដើម្បីប្រគល់ជូនអត្តពលិកម្ចាស់ជ័យលាភី

កីឡាជាតិ

ជាតិ

រដ្ឋចំណាយថវិកាពី៧ប៊ីលានទៅ១២ប៊ីលានរៀលដើម្បីប្រគល់ជូនអត្តពលិកម្ចាស់ជ័យលាភី

15, Dec 2017 , 8:19 pm

រូបភាព

ដោយ:

រាជរដ្ឋាភិបាលកម្ពុជាបានចំណាយថវិកាចំនួន៧ប៊ីលានរៀល(ជាង១,៧លានដុល្លារ) ដើម្បីប្រគល់ជូនគ្រូបង្វឹក គ្រូជំនួយ កីឡាករកីឡាការិនីម្ចាស់មេដាយមាស ប្រាក់ និងសំរឹទ្ធពីការប្រកួតកម្រិតពិភពលោក អាស៊ី អាស៊ាន និងលក្ខណៈអន្តរជាតិ។ រដ្ឋមន្ត្រីក្រសួងអប់រំយុវជននិងកីឡាលោក ហង់ ជួនណារ៉ុន បានបញ្ជាក់ថា នៅក្នុងឆ្នាំ២០១៧នេះ រាជរដ្ឋាភិបាលត្រូវចំណាយថវិកាសរុបចំនួន១២ប៊ីលានរៀល(ជិត៣លានដុល្លារ)សម្រាប់ឧបត្ថម្ភដល់គ្រូបង្វឹក គ្រូជំនួយ និងអត្តពលិកជ័យលាភី។

យោងតាមរបាយការណ៍ដែលអានដោយលោក ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា រាជរដ្ឋាភិបាលកម្ពុជាបានចំណាយថវិកាចំនួនជាង១,៧លានដុល្លារ ដើម្បីប្រគល់ជូនប្រតិភូ គ្រូបង្វឹក គ្រូជំនួយ និងអត្តពលិកសរុបចំនួន២១១នាក់ម្ចាស់មេដាយមាស ប្រាក់ និងសំរឹទ្ធពីការប្រកួតជើងឯកពិភពលោក អាស៊ី អាស៊ាន និងអន្តរជាតិនានា។

រដ្ឋមន្ត្រីក្រសួងអប់រំយុវជននិងកីឡារូបនេះបានបញ្ជាក់ថា នៅក្នុងឆ្នាំ២០១៧នេះរាជរដ្ឋាភិបាលកម្ពុជាត្រូវចំណាយថវិកាប្រមាណជា១២ប៊ីលានរៀល (ជាង៣លានដុល្លារអាមេរិក) ដើម្បីឧបត្ថម្ភលើកទឹកចិត្តដល់ប្រតិភូ គ្រូបង្វឹក គ្រូជំនួយ និងអត្តពលិកម្ចាស់ជ័យលាភីមេដាយមាស ប្រាក់ និងសំរឹទ្ធពីការប្រកួតលក្ខណៈជាតិ និងអន្តរជាតិ។ ការចំណាយនេះលើសពីគម្រោងថវិកាដែលរាជរដ្ឋាភិបាលកម្ពុជាបានទម្លាក់ឲ្យនៅឆ្នាំ២០១៧ ដោយមានត្រឹមតែ៣,២ប៊ីលានរៀល។

របាយការណ៍ខាងលើដដែលឲ្យដឹងទៀតថា ថវិកាទាំងនេះរដ្ឋាភិបាលកម្ពុជាចំណាយលើ១៤ប្រភេទកីឡារួមមានការប្រកួតកីឡាតុងហ្គីលម៉ូដូជ្រើសរើសជើងឯកពិភពលោកនៅសាធារណរដ្ឋកូរ៉េ(សំរឹទ្ធ៤) និងជើងពិភពលោកកីឡាវ៉ូវីណាមនៅឥណ្ឌា(មាស៩, ប្រាក់១២ និងសំរឹទ្ធ២៤) ខណៈកីឡាករមួយចំនួនក្នុងកីឡានេះបានជាង១០ម៉ឺនដុល្លារក្នុងមួយនាក់។

ការប្រកួតកីឡាប៉េតង់ជ្រើសរើសជើងឯកអាស៊ីលើកទី២០នៅមីយ៉ាន់ម៉ា(មាស១ ប្រាក់៥ និងសំរឹទ្ធ៩) និងការប្រកួតកីឡាសូហ្វតិន្នីសជើងឯកអាស៊ីនៅជប៉ុន(ប្រាក់៦)។ ជើងឯកអាស៊ីអាគ្នេយ៍លើកទី៤នៅខេត្តសៀមរាបកីឡាវ៉ូវីណាម(មាស២៥, ប្រាក់១១ និងសំរឹទ្ធ១២), ជើងឯកអាស៊ីអាគ្នេយ៍លើកទី១កីឡាតេក្វាន់ដូ ITF (មាស៦៣, ប្រាក់១១ និងសំរឹទ្ធ១២), ជើងឯកអាស៊ីអាគ្នេយ៍ចំបាប់នៅថៃ(ប្រាក់១ និងសំរឹទ្ធ៤), ជើងឯកអាស៊ីអាគ្នេយ៍កីឡាការ៉ាតេលើកទី៦នៅថៃ(ប្រាក់២ និងសំរឹទ្ធ៤) និងជើងឯកអាស៊ីអាគ្នេយ៍កីឡាកាយវប្បកម្មលើកទី១៤នៅថៃ(ប្រាក់១ និងសំរឹទ្ធ១)។

ការប្រកួតកីឡាស៊ីហ្គេមលើកទី២៩នៅប្រទេសម៉ាឡេស៊ីដែលកម្ពុជាដណ្តើមបានបេដាយមាស៣ ប្រាក់២ និងសំរឹទ្ធ១២ លើប្រភេទកីឡាប្រដាល់គុនខ្មែរ, ប្រដាល់សកល, ប៉េតង់, តេក្វាន់ដូ, ជិះសេះ និងតេន្នីស។ ពិធីប្រគល់ប្រាក់រង្វាន់លើកទឹកចិត្តដល់គ្រូបង្វឹក គ្រូជំនួយ និងអត្តពលិកកាលពីព្រឹកថ្ងៃទី១៥ ខែធ្នូ នៅវិមានសន្តិភាពនេះដែរ ក្រោមវត្តមានសម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕