អន្តរជាតិ
នយោបាយអន្តរជាតិ
ប្រមុខការទូតចិន៖ កិច្ចការសហប្រតិបត្តិការឡានឆាង-មេគង្គដូចជាក្មេងតូច តែរត់លឿន
× ខេត្តយូណាន៖ កិច្ចសហប្រតិបត្តិការឡានឆាង-មេគង្គ (LMC) ដែលផ្ដួចផ្ដើមដោយចិន ប្រៀប ដូច ជាកូនក្មេងមួយ ព្រោះមានអាយុមិនបានពីរឆ្នាំទេ។ យ៉ាងណាមិញ រដ្ឋមន្ត្រីការបរទេសចិន វ៉ាង យី និយាយថា ទោះជាគំនិតផ្ដួចផ្ដើមនេះទើបកើតឡើងមែន តែរត់បានលឿន ព្រោះសមាជិកទាំង៦ប្រទេស សម្រេចបានលទ្ធផលជាច្រើននាពេលកន្លងមក។ គម្រោងកិច្ចសហប្រតិបត្តិការជាច្រើនត្រូវបានអនុវត្ត និងច្រើនទៀតស្ថិតក្នុងដំណើការ។
រដ្ឋមន្ត្រីការបរទេសនៃប្រទេសសមាជិកកិច្ចសហប្រតិបត្តិការឡានឆាង-មេគង្គ បានបញ្ចប់ជំនួបពិភាក្សាលើកទីបីរបស់ខ្លួនហើយ។ រដ្ឋមន្ត្រីការបរទេសការចិនលោក វ៉ាង យី និងរដ្ឋមន្ត្រីការបរទេសកម្ពុជាលោក ប្រាក់ សុខុន បានធ្វើជាសហប្រធានកិច្ចប្រជុំ ដែលរៀបចំនៅទីក្រុងតាលី ខេត្តយូណាន នៅថ្ងៃទី១៥ ខែធ្នូ។ រដ្ឋមន្ត្រីការបរទេសទាំង៦ប្រទេសបានពិភាក្សាលើលទ្ធផលកន្លងមក និងជជែកលើគម្រោងមួយចំនួន ត្រៀមបញ្ជូនទៅឲ្យមេដឹកនាំប្រទេសអនុម័តក្នុងកិច្ចប្រជុំឆ្នាំ២០១៨ ។
បើតាមសហប្រធានកិច្ចប្រជុំទាំងពីរ រដ្ឋមន្ត្រីការបរទេសទាំង៦ប្រទេស បានឯកភាពគ្នាលើរបៀបរវារៈជាច្រើន ខណៈខ្លះទៀតស្ថិតក្នុងដំណាក់កាលបញ្ចប់ មុននឹងបញ្ជូនទៅឲ្យប្រមុខរដ្ឋាភិបាលទាំងអស់សម្រេចក្នុងកិច្ចប្រជុំលើកទីពីរ នៅភ្នំពេញ។ ដោយឡែកប្រមុខការទូតទាំងអស់ក៏បានយល់ព្រមជាគោលលការណ៍លើផែនការសកម្មភាព៥ឆ្នាំ និងគម្រោងរួមគ្នាដំណាក់កាលទីពីរដែរ ដើម្បីជំរុញកិច្ចសហប្រតិបត្តិការក្នុងអនុតំបន់នេះ។
ប្រមុខការទូតចិន វ៉ាង យី បាននិយាយថា យន្តការ LMC ជាកិច្ចសហប្រតិបត្តិការអនុតំបន់ថ្មី ដែលលេចជារូបរាងក្នុងឆ្នាំ២០១៥ ក្នងគោលដៅដោះស្រាយបញ្ហាមួយក្នុងចំណោមប្រទេស៦ គឺចិន កម្ពុជា ឡាវ ថៃ មីយ៉ាន់ម៉ា និងវៀតណាម និងផ្អែកលើគោលការណ៍កិច្ចសហប្រតិបត្តិការរួមគ្នាដោយស្មើភាព។ ដ្បិតជាអង្គការអនុតំបន់ថ្មីមួយ លោក វ៉ាង យី អះអាងថា សមាជិក LMC សម្រេចបានសមិទ្ធផលជាច្រើន និងមិនមែនជាវេទិកាតុកាហ្វេឡើយ។
ក្នុងសន្និសីទសារព័ត៌មាននៅថ្ងៃទី១៥ ខែធ្នូ លោក វ៉ាង យី ដែលឈរអមដោយលោក ប្រាក់ សុខុន លើកឡើងថា កិច្ចសហប្រតិបត្តិការ LMC គឺជាគ្រឿងចក្រ ដែលរុលទៅមុខ ហើយអាចផ្ដល់ប្រយោជន៍ច្រើនដល់ប្រជាជនក្នុងប្រទេសទាំង៦ ក៏ដូចជាតំបន់អាស៊ានដែរ។ នេះក៏ព្រោះតែយន្តការនេះអាចចូលខ្លួនក្នុងការកសាងហគមន៍អាស៊ាន និងអាចដើរតួបំពេញបន្ថែមចន្លោះប្រហោងក្នុងទំនាក់ទំនងចិន និងអាស៊ានទៀតផង។
ជាមួយគ្នានោះ ប្រមុខការទូតកម្ពុជាលោក ប្រាក់ សុខុន ក៏បង្ហាញការយល់ស្រដៀងសមភាគីចិនដែរ ដោយបាននិយាយថា យន្តការ LMC មិនដូចយន្តការផ្សេងឡើយ។ ទាក់ទងលទ្ធផលកិច្ចប្រជុំ លោកបញ្ជាក់ថា សមាជិកទាំងអស់បានពិភាក្សាលើការបង្កើតលេខាធិការដ្ឋាន LMC នៅតាមប្រទេសនីមួយៗ ព្រោះមកទល់ពេលនេះចិនបង្កើតលេខាធិការដ្ឋានរបស់ខ្លួនរួចហើយ។ ក្រៅពីនោះ គម្រោងប្រព័ន្ធទូរសព្ទ Hotline និងការបង្កើតក្រុមការងារតាមវិស័យអាទិភាព ក៏ត្រូវបានជជែកដែរ៕
Tag:
ចិន
3thLMC
មេគង្គឡាន-ឆាង
© រក្សាសិទ្ធិដោយ thmeythmey.com