អន្តរជាតិ
កសិកម្មនៅប្រទេសមេគង្គនៅមានកម្រិត តែបច្ចេកវិទ្យាកសិកម្មរីកចម្រើន
× ប៉េកាំង៖ ការអភិវឌ្ឍវិស័យកសិកម្មនៅក្នុងប្រទេសទាំង៦ នៅតាមដងទន្លេមេគង្គ មិនមានតុល្យភាពគ្នាឡើយ។ នេះជាការមើលឃើញរបស់មន្ត្រីជាន់ខ្ពស់ចិន ប៉ុន្តែចិនក៏មើលឃើញពីការរីកចម្រើននៅលើវិស័យនេះដែរ និងបានបញ្ចេញថវិកាដើម្បីជួយជំរុញវិស័យដ៏សំខាន់នេះនៅក្នុងប្រទេសចំនួន៥ផ្សេងទៀតផង។
កសិកម្ម គឺជាវិស័យសំខាន់មួយក្នុងចំណោមវិស័យសំខាន់ចំនួន៥ នៃយន្តការកិច្ចសហប្រតិបត្តិការមេគង្គ-ឡានឆាង (Lancang-Mekong Cooperation) ដែលមានប្រទេសចំនួន៦ គឺចិន មីយ៉ាន់ម៉ា ឡាវ ថៃ កម្ពុជា និងវៀតណាម។ ប៉ុន្តែ ការអភិវឌ្ឍវិស័យសំខាន់នេះក្នុងចំណោមប្រទេសទាំង៦ មិនដូចគ្នាឡើយ ហើយភាគច្រើននៅមានកម្រិតនៅឡើយ ដែលត្រូវការកិច្ចសហប្រតិបត្តិការពីប្រទេសទាំងអស់។
លោក Zhang Lubiao អគ្គនាយករងទំនាក់ទំនងកិច្ចការអន្តរជាតិនៃក្រសួងកសិកម្មចិន និយាយថា វិស័យកសិកម្មនៅប្រទេស LMC ស្ថិតនៅដំណាក់កាលក្មេងខ្ចីនៅឡើយ ដែលតម្រូវឲ្យភាគីទាំងអស់ប្រឹងប្រែងរួមគ្នាដើម្បីជំរុញវិស័យមួយនេះ។ ចំពោះមុខអ្នកសារព័ត៌មានមកពីប្រទេសទាំង៦ នៅថ្ងៃទី១៣ ខែធ្នូ លោក Zhang បញ្ជាក់ថា បញ្ហាសំខាន់នៅចិន និងនៅប្រទេស៥ទៀត គឺវិស័យកសិកម្មមិនទាន់បញ្ចេញសក្តានុពលរបស់ខ្លួន។
យ៉ាងណាមិញ មន្ត្រីចិនរូបនេះក៏អះអាងដែរថា ក្នុងរយៈពេល២ឆ្នាំចាប់តាំងពី LMC លេចជារូបរាងមក ប្រទេសទាំងអស់ក៏សម្រេចបានលទ្ធផលផ្លែផ្កាច្រើនក្នុងវិស័យកសិកម្ម។ សមាជិកទាំង៦ បានបង្កើតក្រុមការងាររួមគ្នា ដែលបានប្រជុំលើកទីមួយនៅទីក្រុងណាននីង ដើម្បីពិភាក្សាពីបញ្ហាប្រឈម និងកិច្ចសហប្រតិបត្តិការរវាងគ្នា។ លើសពីនោះ ប្រទេសទាំងអស់ក៏បានផ្ដោតសំខាន់លើការប្រើប្រាស់បច្ចេកវិទ្យាទំនើបដើម្បីអភិវឌ្ឍកសិកម្ម។
ទន្ទឹមគ្នានេះ រដ្ឋាភិបាលចិនក៏បានសន្យាបញ្ចេញទឹកប្រាក់ចំនួន ១៣,៧៨ លានយ័នជាង ២លានដុល្លារ ជាមូលនិធិពិសេសរបស់ LMC ដើម្បីពង្រឹងវិស័យកសិកម្មនេះ។ នេះបើតាមសម្ដីរបស់លោក Zhang Lu Biao ដែលបន្តថា ក្រុងប៉េកាំងក៏ស្នើឲ្យប្រទេស៥ទៀតពង្រឹងការសម្របសម្រួលនយោបាយ ពង្រីកការផ្លាស់ប្ដូរ និងកិច្ចសហប្រតិបត្តិការលើផ្នែកបច្ចេកវិទ្យាកសិកម្ម ក៏ដូចជាលើកទឹកចិត្តឲ្យមានមជ្ឈមណ្ឌលស្រាវជ្រាវផ្នែកវិទ្យាសាស្ត្រកសិកម្មផង។
សូមបញ្ជាក់ថា រដ្ឋមន្ត្រីការបរទេសនៃកិច្ចសហប្រតិការបត្តិការមេគង្គ-ឡានឆាង នឹងជួបប្រជុំគ្នាចាប់ពីថ្ងៃទី១៤ ដល់ទី១៦ ខែធ្នូ ក្នុងទីក្រុងតាលី ខេត្តយូណាន។ រដ្ឋមន្ត្រីការបរទេសចិន កម្ពុជា ថៃ ឡាវ វៀតណាម និងអនុរដ្ឋមន្ត្រីការបរទេសមីយ៉ាន់ម៉ា នឹងចូលរួមកិច្ចពិភាក្សាលើកទី៣ ឆ្នាំ២០១៧ នេះ។ ប្រមុខការទូតចិន វ៉ាង យី និងសមភាគីកម្ពុជា ប្រាក់ សុខុន នឹងធ្វើជាសហប្រធានជំនួបលើកនេះ ដែលនឹងមានការត្រួតពិនិត្យលើលទ្ធផលការងារកន្លងមក និងយុទ្ធសាស្ត្រឆ្នាំខាងមុខ៕
© រក្សាសិទ្ធិដោយ thmeythmey.com