កីឡាជាតិ
ជាតិ
គ្រូបង្វឹកបឹងកេតថា ការចាញ់វៀតណាម នឹងជំរុញឲ្យកីឡាករប្រឹងកាន់តែខ្លាំង ពេលប៉ះណាហ្គាវើល លោក ហៅ សុជាតិ គ្រូបង្វឹកក្រុមបឹងកេតនិយាយពេលចូលរួមសន្និសីទសារព័ត៌មានមុនការប្រកួតពានរង្វាន់ Toyota Mekong
× គ្រូបង្វឹកក្រុមបឹងកេតលោក ហៅ សុជាតិ ជឿជាក់ថា ការចាញ់ក្រុម Sanna Khanh Hoa ក្នុងពានរង្វាន់ Toyota Mekong Club Championship មិនត្រឹមតែមិនប៉ះពាល់ដល់អារម្មណ៍កីឡាករ ថែមទាំងជំរុញឲ្យកីឡាករមានទឹកចិត្តប្រកួតកាន់តែខ្លាំងពេលជួបក្រុមណាហ្គាវើលក្នុងជើងទី២នៃពានរង្វាន់សម្តេច ហ៊ុន សែន នាល្ងាចថ្ងៃសៅរ៍ទី១៧ ធ្នូ នៅពហុកីឡដ្ឋានជាតិ។ ក្រុមព្រះខ័នរាជស្វាយរៀងនឹងបើកទ្វារកីឡដ្ឋានខេត្តស្វាយរៀងស្វាគមន៍ក្រុមភ្ញៀវអគ្គិសនីកម្ពុជានាល្ងាចនេះផងដែរ។
«ខ្ញុំយល់ថា ការចាញ់ក្រុមវៀតណាមក្នុងពាន Toyota វានឹងជំរុញឲ្យកីឡាករមានទឹកចិត្តប្រកួតខ្លាំងពេលជួបក្រុមណាហ្គាវើល ព្រោះយើងត្រូវការឈ្នះដើម្បីស្តារមុខមាត់ជូនក្រុមឡើងវិញ។ ប៉ុន្តែយើងមិនទាន់ប្រាកដកថា អាចយកឈ្នះណាហ្គាវើល ឬយ៉ាងណានោះទេ ព្រោះក្រុមនេះមានសមត្ថភាពខ្លាំង និងមានគ្រាប់បាល់ចំណេញក្នុងដៃ»។ នេះជាការលើកឡើងរបស់លោក ហៅ សុជាតិ គ្រូបង្វឹកក្រុមបឹងកេតដែលទើបធ្លាក់ចេញពីពានរង្វាន់ Toyota Mekong Club Championship 2017 ក្រោយចាញ់ក្រុម Sanna Khanh Hoa របស់វៀតណាមទាំងពីរជើងក្នុងលទ្ធផល ៩-៥។
ក្រុមបឹងកេតត្រូវបើកទ្វារពហុកីឡដ្ឋានជាតិស្វាគមន៍ក្រុមណាហ្គាវើលសម្រាប់ជំនួបជើងទី២នៃពានរង្វាន់សម្តេច ហ៊ុន សែន នាម៉ោង៦ល្ងាចថ្ងៃសៅរ៍ ទី១៧ ខែធ្នូ ឆ្នាំ២០១៧នេះ ខណៈជើងទី១ក្រុមនេះបានចាញ់ណាហ្គាវើលក្នុងលទ្ធផល ១-០។
សកម្មភាពក្រុមបឹងកេតជួបជាមួយក្រុមណាហ្គាវើលកាលពីពេលកន្លងទៅនៅពហុកីឡដ្ឋានជាតិ
ជាមួយគ្នានេះគ្រូបង្វឹកក្រុមណហ្គាវើលលោក មាស ចាន់ណា ក៏មិនប្រាកដក្នុងចិត្តថា នឹងអាចបន្តយកឈ្នះបឹងកេតបានឬយ៉ាងណានោះដែរ ព្រោះបច្ចុប្បន្នលោកកំពុងព្រួយបារម្ភលើអារម្មណ៍របស់កីឡាករ ។ «ការត្រៀមខ្លួនរបស់យើងបានល្អហើយ ប៉ុន្តែការបារម្ភនៅត្រង់ថា កីឡាករយើងប្រមូលអារម្មណ៍មិនសូវបានល្អ។ ខ្ញុំនឹងព្យាយាមអូសទាញអារម្មណ៍ពួកគាត់ឲ្យវិលមករកភាពល្អប្រសើរវិញ ខ្ញុំជឿថា អ្វីៗនឹងវិលមករកដូចដើម»។ នេះជាការបង្ហាញក្តីកង្វល់និងការជឿជាក់របស់លោក មាស ចាន់ណា។
ក្រៅពីជំនួបដ៏ជក់ចិត្តខាងលើក៏មានការប្រកួត១គូទៀតផងដែរ គឺរវាងក្រុមព្រះខ័នរាជស្វាយរៀងនិងអគ្គិសនីកម្ពុជា នៅកីឡដ្ឋានខេត្តស្វាយរៀងនាវេលាម៉ោង៦ល្ងាននេះ។ សម្រាប់ការប្រកួតជើងទី១ក្រុមព្រះខ័នរាជស្វាយរៀងបានតាមស្មើ ២-២ ជាមួយក្រុមអគ្គិសនីកម្ពុជាទាំងលំបាក។ ការប្រកួតនៅថ្ងៃនេះ ជាការប្រកួតកាត់សេចក្តីដើម្បីស្វែងរកក្រុមខ្លាំងឡើងទៅប្រកួតនៅវគ្គផ្តាច់ព្រ័ត្រដណ្តើមជើងឯកពានរង្វាន់សម្តេច ហ៊ុន សែន ប្រចាំឆ្នាំ២០១៧៕
Tag:
Hun Sen Cup 2017
បាល់ទាត់
ហៅ សុជាតិ
មាស ចាន់ណា
© រក្សាសិទ្ធិដោយ thmeythmey.com