អន្តរជាតិ
ប្រមុខ UN និងសមាជិកក្រុមប្រឹក្សាសន្តិសុខព្រមានពីគ្រោះមហន្តរាយនៅឧបទ្វីបកូរ៉េ បើហ៊ានប្រើកម្លាំងទ័ព
× ប្រមុខអង្គការសហប្រជាជាតិលោក Antonio Guterres និងបណ្តាអ្នកការទូតតំណាងប្រទេសសមាជិកក្រុមប្រឹក្សាសន្តិសុខបានបង្ហាញក្តីបារម្ភចំពោះស្ថានការណ៍តានតឹងដែលកំពុងកើតឡើងនៅឧបទ្វីបកូរ៉េបច្ចុប្បន្នក្នុងកិច្ចប្រជុំក្រុមប្រឹក្សាសន្តិសុខថ្ងៃសុក្រទី១៥ ខែធ្នូ។ មន្ត្រីទូតជាន់ខ្ពស់ទាំងនេះបានព្រមានផងដែរចំពោះរាល់ចេតនាចង់ប្រើប្រាស់កម្លាំងទ័ពនៅឧបទ្វីបកូរ៉េនោះ។
ស្ថានភាពតានតឹងខ្លាំងនៅឧបទ្វីបកូរ៉េធ្វើឲ្យអគ្គលេខាធិការអង្គការសហប្រជាជាតិ និងបេសកជនការទូតប្រទេសសមាជិកក្រុមប្រឹក្សាសន្តិសុខព្រួយបារម្ភជាខ្លាំងពីការឈានទៅប្រើប្រាស់កម្លាំងឬប៉ះទង្គិចគ្នាដោយសារការមើលស្រាលស្ថានការណ៍នោះ។
យោងតាមទីភ្នាក់ងារព័ត៌មាន Xinhua អគ្គលេខាធិការអង្គការសហប្រជាជាតិ Antonio Guterres បានសង្កត់ធ្ងន់ថា ការប្រើប្រាស់សកម្មភាពយោធាទាំងនឹងនាំមកនូវភាពវិនាសមិននឹកស្មានដល់ឡើយ។
«រាល់សកម្មភាពយោធាទាំងអស់នឹងធ្វើឲ្យមានការលទ្ធផលអាក្រក់ មិននឹកស្មានដល់ឡើយ។ ស្ថានភាពនៅឧបទ្វីបកូរ៉េគឺតានតឹងខ្លាំង និងគ្រោះថ្នាក់ខ្លាំងបំផុតនៅក្នុងពិភពលោកនេះបច្ចុប្បន្ន។ ខ្ញុំពិតជាបារម្ភខ្លាំងពីគ្រោះថ្នាក់ដែលអាចកើតឡើងដោយសារការប្រឈមមុខដាក់គ្នាផ្នែកយោធា រួមទាំងលទ្ធផលនៃការមើលស្រាលស្ថានភាព»។ នេះជាសម្តីរបស់ប្រមុខអង្គការសហប្រជាជាតិលោក Antonio Guterres។
ក្រៅពីលើកឡើងពីក្តីបារម្ភ លោក Guterres ក៏ពន្យល់ផងដែរថា កង្វះការទាក់ទងគ្នាកន្លងមកក៏ជាមូលហេតុដែលអាចបង្កឲ្យបានកាន់តែធ្ងន់ធ្ងរផងដែរ។ ដូច្នេះហើយលោក បានទទូចឲ្យបណ្តាភាគីពាក់ព័ន្ធទាំងអស់ជ្រើសរើសយកវិធីសាស្ត្រការទូត និងរកផ្លូវត្រឡប់មកចូលតុចរចាវិញដើម្បីដោះស្រាយបញ្ហានេះ។
ដោយឡែក បេសកជនពិសេសរុស្ស៊ីប្រចាំអង្គការសហប្រជាជាតិ Vassily Nebenzia ក៏បានគាំទ្រការលើកឡើងរបស់ប្រមុខអង្គការសហប្រជាជាតិដែរ ហើយលោកបង្ហាញក្តីបារម្ភដែរចំពោះភាពតានតឹងនៅឧបទ្វីបកូរ៉េដែលអាចកើនឡើងបន្ថែមទៀត។ លោក Nebenzia ក៏ឆ្លៀតឱកាសរិះគន់អាមេរិកផងដែរ ដែលបន្តសម្ងែងសាច់ដុំយោធាដូចជាបន្តធ្វើសមយុទ្ធយោធាឥតឈប់ជាមួយកូរ៉េខាងត្បូងទៀត។
ចំណែកតំណាងក្រុងប៉េកាំងលោក Wu Haitao បានគូសបញ្ជាក់ផងដែរពីគោលជំហរឥតងាករ៉េរបស់ចិនក្នុងរក្សាជំរុញការចរចាការទូត និងរំសាយអាវុធនុយក្លេអ៊ែរ។
អនុរដ្ឋមន្ត្រីការបរទេសកូរ៉េខាងត្បូង Cho Hyun បានរៀបរាប់ប្រាប់អង្គប្រជុំក្រុមប្រឹក្សាសន្តិសុខថា កូរ៉េខាងជើងឈានដល់ជំហានចុងក្រោយក្នុងការធ្វើអាវុធនុយក្លេអ៊ែរហើយ។ ដូច្នេះហើយលោកបានទទូចឲ្យសហគមន៍អន្តរជាតិចាត់វិធានការបន្ទាន់ដើម្បីទប់ស្កាត់សកម្មភាពនេះ និងនាំកូរ៉េខាងជើងឲ្យជ្រើសរើសផ្លូវរំសាយអាវុធវិញ៕
Tag:
UNSC
អង្គការសហប្រជាជាតិ
កូរ៉េខាងជើង
Antonio Guterres
© រក្សាសិទ្ធិដោយ thmeythmey.com