ម្ចាស់មេដាយមាសល្បុក្កតោ៖ ការរេរា ជាល្បិចផ្តួលគូប្រកួតដ៏មានប្រសិទ្ធភាព

កីឡាជាតិ

ជាតិ

ម្ចាស់មេដាយមាសល្បុក្កតោ៖ ការរេរា ជាល្បិចផ្តួលគូប្រកួតដ៏មានប្រសិទ្ធភាព

18, Dec 2017 , 10:08 am

រូបភាព

ដោយ:

ការរេរា ក្នុងក្បាច់គុនល្បុក្កតោ មិនគ្រាន់តែជាសិល្បៈ ទាក់ទាញការចាប់អារម្មណ៍ពីទស្សនិកជននោះទេ តែជាកលល្បិច របស់កីឡាករ ក្នុងការផ្តួលគូប្រកួត យ៉ាងមានប្រសិទ្ធភាព។ នេះការលើកឡើងរបស់កីឡាករ សយ ផាន់និច ដែលតែងតែប្រើល្បិចនេះ ផ្តួលគូប្រកួត ដើម្បីគ្រងជើងឯកគុនល្បុក្កតោថ្នាក់ជាតិប្រចាំឆ្នាំ២០១៧។ ស្ថិតក្នុងវ័យ២៣ឆ្នាំ សិស្សគុននៃក្លិបល្បុក្កតោ «ស» រូបនេះ ចង់បើកសាលាគុនល្បុក្កតោ ដើម្បីអភិរក្សកេរដំណែលរបស់បុព្វបុរសខ្មែរ និងពង្រីកវិសាលភាពក្បាច់គុនដូនតាខ្មែរ។

«ការប្រកួតគុនល្បុក្កតោ មិនមែនវាយត្រង់ៗនោះទេ។ យើងត្រូវមានយុទ្ធសាស្ត្រ និងកលល្បិច។ ជាក់ស្តែងការប្រកួតពួកខ្ញុំ គឺតែងតែមានការរាំរេដាក់គ្នា តែនេះជាយុទ្ធសាស្ត្រ និងកលល្បិច ដើម្បីឲ្យគូប្រកួតភ្លេចខ្លួន មុនយើងប្រើក្បាច់អ្វីមួយ ផ្តួលពួកគាត់។ ការរេរង់ មិនគ្រាន់តែធ្វើឲ្យមានការទាក់ទាញនោះទេ តែវាជាសិល្បៈ នៃក្បាច់គុនខ្មែរយើង។ ក្បាច់គុន គេបង្កប់ក្នុងសិល្បៈ តាមរយៈរាំ និងរបាំ»។ នេះជាការរៀបរាប់ របស់កីឡាករ សយ ផាន់និច ម្ចាស់មេដាយមាស ការប្រកួតកីឡាគុនល្បុក្កតោជ្រើសរើសជើងឯកថ្នាក់ជាតិឆ្នាំ២០១៧ ក្រោយប្រើល្បិចកលខាងលើ ផ្តួលកីឡាករ ដាំ គឹមលាង ត្រឹមទឹកទី១ ក្នុងវគ្គផ្តាច់ព្រ័ត្រ។

សិស្សគុនមកពីក្លិបល្បុក្កតោ «ស» រូបនេះបានបន្ថែមថា៖«ការរាំ វាអាចធ្វើឲ្យគូប្រកួតបាត់បង់ស្មារតី ហើយវាធ្វើឲ្យគាត់ពិបាកយល់ ថាយើងកំពុងធ្វើអ្វី។ ទាំងនេះហើយ ដែលគេហៅថា ល្បែង ល្បិច និងល្បង ជាមួយគូប្រកួត»។

ជាក់ស្តែង សម្រាប់ការប្រកួតវិញ្ញាសាប្រយុទ្ធទម្ងន់ក្រោម៦៧គីឡូក្រាម កីឡាករ សយ ផាន់និច បានប្រើយុទ្ធសាស្ត្រខាងលើ ធ្វើឲ្យគូប្រជែងកីឡាករ ដាំ គឺមលាង ភ្លេចខ្លួន រួចហើយរូបគេបានលោតទៅចាប់ ក ក្លេរ ដើម្បីផ្តួលគូប្រកួត ឲ្យសុំចុះចាញ់ត្រឹមដើមទឹកទី១ នៃវគ្គផ្តាច់ព្រ័ត្រ។ មុនឈានដល់វគ្គ ផ្តាច់ព្រ័ត្រកីឡាករ សយ ផាន់និច បានប្រើល្បិចកលនេះ វាយឲ្យគូឲ្យប្រកួតបោះបង់ការប្រកួត ត្រឹមដើមទឹកទី២ ក្នុងវគ្គពាក់កណ្តាលផ្តាច់ព្រ័ត្រ។

សូមទស្សនាវីដេអូខាងក្រោមនេះ ៖

និស្សិតបញ្ចប់ថ្នាក់បរិញ្ញាបត្រផ្នែកព័ត៌មានវិទ្យា នៃសកលវិទ្យាល័យពុទ្ធិសាស្ត្រ សយ ផាន់និច នៅថ្ងៃអនាគត ចង់បើកសាលាគុនល្បុក្កតោ ដើម្បីបង្វឹកក្មេងៗជំនាន់ក្រោយ ក្នុងន័យជួយអភិរក្ស និងពង្រីកវិសាលភាពក្បាច់គុន ដែលជាកេរតំណែលរបស់បុព្វបុរសខ្មែរមួយនេះ។ ម្យ៉ាង រូបគេចង់ឲ្យបណ្តាប្រទេសលើពិភពលោកឃើញថា ខ្មែរមានក្បាច់គុនបែបវប្បធម៌ដ៏ចំណាស់ និងមានឥទ្ធិពល។

ភាពសម្បូរបែប និងស្នៀតដ៏អស្ចារ្យនៃក្បាច់គុនល្បុក្កតោ តាមរយៈការសម្តែងរបស់សិស្សច្បង នៅសកលវិទ្យាល័យពុទ្ធិសាស្ត្រ បានទាក់ទាញអារម្មណ៍កីឡាករមកពីខេត្តពោធិ៍សាត់រូបនេះ ចូលហ្វឹកហាត់គុនល្បុក្កតោភ្លាមៗ ដោយគ្មានស្ទាក់ស្ទើរ។ តាំងពីចូលហ្វឹកហាត់ដំបូង នៅឆ្នាំ២០១៣ វាជាលើកទី១សម្រាប់ ផាន់និច ដែលចូលរួមប្រកួតប្រកួតថ្នាក់ជាតិ និងបានលទ្ធផលដែលរូបគេចាត់ទុកជាជោគជ័យដ៏ធំធេងមួយនេះ។

សិស្សគុននៃក្លិបល្បុក្កតោ«ស» វ័យ២៣ឆ្នាំរូបនេះយល់ថា ការហាត់ក្បាច់គុនល្បុក្កតោ មិនត្រឹមតែជួយរក្សាវប្បធម៌ប្រពៃណី និងធ្វើឲ្យមានការរីកដុះដាលប៉ុណ្ណោះទេ ថែមទាំងអាចជួយការពារខ្លួន និងមានសុខភាពល្អទៀតផង៕