អន្តរជាតិ
អ្នកនយោបាយស្តាំនិយម Sebastián Piñera ក្លាយជាប្រធានាធិបតីថ្មីរបស់ស៊ីលី
× អតីតប្រធានាធិបតីស៊ីលី និងជាមហាសេដ្ឋីលោក Sebastián Piñera បានជាប់ឆ្នោតជាប្រធានាធិបតីថ្មីនៃរដ្ឋអាមេរិកឡាទីនកាលពីថ្ងៃអាទិត្យ ដើម្បីជំនួសតំណែងលោកស្រី Michelle Bachelet។ លោក Piñera ជាអ្នកនយោបាយស្តាំនិយមដែលមាននិន្នាការប្រឆាំងការរៀបការរវាងអ្នកមានភេទដូចគ្នាផងដែរ។
ការបោះឆ្នោតជ្រើសរើសប្រធានាធិបតីស៊ីរីចេញលទ្ធផលជាផ្លូវការហើយដោយប្រជាជនប្រទេសនេះជ្រើសរើសយកអ្នកនយោបាយស្តាំនិយមនិងជាមហាសេដ្ឋីលោក Sebastián Piñera ឲ្យជំនួសតំណែងលោកស្រី Michelle Bachelet។
យោងតាមទីភ្នាក់ងារ ព័ត៌មាន AFP លោក Piñera បានទទួលសំឡេងគាំទ្ររហូតដល់ ៥៤,៥៧ ភាគរយខណៈដែលគូប្រជែងរបស់លោក ដែលជាអ្នកកណ្តាលនិយមលម្អៀងឆ្វេងលោក Alejandro Guillier ទទួលបានសំឡេងត្រឹម ៤៥, ៤៣ភាគរយប៉ុណ្ណោះ។
ជ័យជម្នះរបស់របស់លោក Piñera មានវ័យ ៦៨ឆ្នាំនៅក្នុងការបោះឆ្នោតប្រធានាធិបតីនេះបង្ហាញឲ្យឃើញពីចំណុចរបត់នយោបាយស៊ីលី និងនៅក្នុងតំបន់ទាំងមូលផងដែរ ដោយសារមេដឹកនាំស្តាំនិយមបន្តឡើងកាន់កាប់តំណែងកំពូលនយោបាយនេះ។ លោកក៏ជាមហាសេដ្ឋី និងធ្លាប់កាន់តំណែងជាប្រធានាធិបតីកាលពីឆ្នាំ ២០១០ ដល់ឆ្នាំ ២០១៤ ផងដែរ។
ក្នុងពេលឃោសនាបោះឆ្នោតលោក Piñera បានសន្យាបញ្ឈប់ច្បាប់អនុញ្ញាតឲ្យមានការរៀបការជាមួយមនុស្សភេទដូចគ្នាដែលត្រូវបានស្នើឡើងដោយរដ្ឋាភិបាលមុនកាលពីខែសីហា ហើយលោកក៏បានសន្យាដោះស្រាយបញ្ហាមន្ត្រីយោធាដែលត្រូវគេកាត់ទោសព្រោះប្រព្រឹត្តបទឧក្រិដ្ឋប្រឆាំងមនុស្សជាតិផងដែរ។
លោក Guillier ដែលចាញ់ឆ្នោតនេះធ្លាប់ធ្វើការងារជាអ្នកសារព័ត៌មាន និងជាអ្នកសង្គមវិទូផង។ ក្នុងការឃោសនាបោះឆ្នោតលោកផ្តោតសំខាន់លើការកែទម្រង់នយោបាយដែលបានដាក់ចេញក្នុងរដ្ឋបាលលោកស្រី Bachelet កន្លងមកនោះ។ លោកបានទទួលស្គាល់លទ្ធផលបោះឆ្នោត និងអបអរសាទរជ័យជម្នះរបស់លោក Piñera ផងដែរ។
«នៅថ្ងៃនេះ យើងទាំងអស់គ្នាមានមោទនភាពចំពោះប្រជាធិបតេយ្យ ប្រទេសយើង និង ប្រព័ន្ធបោះឆ្នោតរបស់យើងផងដែរ។ ខ្ញុំនៅយប់នេះក៏ចង់អបអរសាទរគូប្រជែងរបស់ខ្ញុំលោក Piñera ដែលនឹងកាន់កាប់តំណែងប្រធានាធិបតីខាងមុខ។ ខ្ញុំបានទូរសព្ទទៅគាត់ដើម្បីអបអរសាទរគាត់ក្នុងជ័យជម្នះដ៏ធំធេងនេះដែរ»។ នេះជាសម្តីរបស់លោក Piñera។
សូមបញ្ជាក់ការបោះឆ្នោតនៅប្រទេសស៊ីលីឆ្នាំប្រហែលជាបង្ហាញឲ្យឃើញពីការផ្លាស់ប្តូរចរន្តនយោបាយនៅក្នុងតំបន់អាមេរិកឡាទីន ខណៈដែលប្រជាជានៅម៉ិកស៊ិក ប្រេស៊ីល កូឡុំប៊ី និងប៉ារ៉ាហ្គាយនឹងត្រូវជ្រើសរើសមេដឹកនាំថ្មីនៅឆ្នាំ ២០១៨ ខាងមុខផង៕
Tag:
ស្តាំនិយម
Sebastián Piñera
ស៊ីលី
Michelle Bachelet
Alejandro Guillier
© រក្សាសិទ្ធិដោយ thmeythmey.com