អន្តរជាតិ
របាយការណ៍៖ ចំណូលប្រជាជនកូរ៉េខាងជើងកើនឡើងក្នុងរយៈពេលប្រាំឆ្នាំចុងក្រោយ
× ចំណូលប្រជាជនកូរ៉េខាងជើងកើនឡើងគួរឲ្យកត់សម្គាល់ក្នុងរយៈពេលប្រាំឆ្នាំចុងក្រោយ ទោះបីជាមានការដាក់ទណ្ឌកម្មពីសហគមន៍អន្តរជាតិច្រើនដងកាលពីកន្លងមកក៏ដោយ។ បើតាមរបាយការណ៍ស្រាវជ្រាវកូរ៉េខាងត្បូង ប្រជាជនកូរ៉េខាងជើងម្នាក់ៗមានចំណូលមធ្យមសរុប ១៣៤០ដុល្លារអាមេរិក។
ប្រជាជនកូរ៉េជើងសប្បាយរីករាយនឹងការកើនឡើងនៃចំណូលសរុបប្រចាំឆ្នាំរបស់ពួកគេក្នុងរយៈពេលប្រាំឆ្នាំមកនេះ ដោយរាប់ចាប់ពីឆ្នាំ ២០១១ ដល់ឆ្នាំ ២០១៦។ បើតាមទីភ្នាក់ងារស្ថិតិកូរ៉េខាងជើង ប្រជាជនកូរ៉េខាងជើងមា្នក់ៗមានចំណូលប្រចាំឆ្នាំជាមធ្យមប្រហែល ១៣៤០ ដុល្លារអាមេរិកកាលពីឆ្នាំ ២០១៦។
យោងតាមទីភ្នាក់ងារព័ត៌មាន AFP ក្នុងរយៈពេលប្រាំឆ្នាំមកនេះ កូរ៉េខាងជើងស្គាល់កំណើនសេដ្ឋកិច្ចខ្ពស់គួរឲ្យកត់សម្គាល់ ហើយចំណូលប្រជាជននោះកើនឡើងច្រើនជាង ប្រាំពីរភាគរយ ទោះបីជាប្រទេសនេះរងទណ្ឌកម្មសហគមន៍អន្តរជាតិច្រើនព្រោះកម្មវិធីនុយក្លេអ៊ែរក៏ដោយ។
បើប្រៀបធៀបជាមួយប្រជាជនកូរ៉េខាងជើង ចំណូលនេះទាបជាងគេប្រហែលច្រើនជាង ២០ដងឯណោះ។ នៅកូរ៉េខាងត្បូង ប្រជាជនម្នាក់ៗមានចំណូលសរុប ៣១,៩៨ លានវ៉ុនដែលស្មើ២៩០០០ដុល្លារអាមេរិកឯណោះ។
បើនិយាយរឿងពាណិជ្ជកម្មវិញ ទំហំពាណិជ្ជកម្មកូរ៉េខាងត្បូងមានទំហំសរុប ៩០២ ពាន់លានដុល្លារអាមេរិកឯណោះ ខណៈដែលទំហំពាណិជ្ជកម្មរបស់កូរ៉េខាងជើងមានទំហំត្រឹម ប្រាំមួយពាន់លានដុល្លារប៉ុណ្ណោះ។
កាលពីខែកក្កដា ធនាគារកណ្តាលកូរ៉េខាងត្បូងបានវាយតម្លៃថា សេដ្ឋកិច្ចកូរ៉េខាងជើងកើនរហូតដល់ ៣,៩ ភាគរយ កាលពីឆ្នាំ ២០១៦ ខណៈដែលសេដ្ឋកិច្ចកូរ៉េខាងត្បូងមានកំណើនត្រឹម ២,៨ភាគរយប៉ុណ្ណោះ។
កូរ៉េខាងជើងជាប្រទេសមួយក្នុងចំណោមប្រទេសដែលអាថកំបាំងខ្លាំងបំផុតលើពិភពលោក ហើយប្រទេសនេះមិនដែលបញ្ចេញរបាយការណ៍ផ្លូវការពាក់ព័ន្ធសេដ្ឋកិច្ច ឬកំណើនផលិតផលក្នុងស្រុកសរុបប្រចាំឆ្នាំឲ្យគេដឹងឡើយ។ ដូច្នេះហើយទើបបានជាអ្នកជំនាញនាំគ្នាចងក្រងរបាយការណ៍និងវាយតម្លៃកំណើនសេដ្ឋកិច្ច និងពាណិជ្ជកម្មរបស់កូរ៉េខាងជើងនេះ៕
Tag:
កូរ៉េខាងជើង
កូរ៉េខាងត្បូង
© រក្សាសិទ្ធិដោយ thmeythmey.com