ជាតិ
នយោបាយជាតិ
លោក កឹម សុខា៖ ទាក់ទងបរទេសដើម្បីលើកស្ទួយប្រជាធិបតេយ្យ មិនមែនផ្តួលរដ្ឋាភិបាលទេ លោក កឹម សុខា អតីតប្រធានគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារត្រពាំងផ្លុង
× ភ្នំពេញ៖ លោក គី ឫទ្ធី ចៅក្រមស៊ើបសួររបស់សាលាដំបូងរាជធានីភ្នំពេញ បានទៅសួរលោក កឹម សុខា ដល់ពន្ធនាគារជាលើកទីពីរ ជុំវិញការឃុបឃិតជាមួយបរទេស ដើម្បីផ្តួលរំលំរដ្ឋាភិបាលកម្ពុជា ដែលកំពុងស្ថិតក្នុងការចោទប្រកាន់ថា ជាអំពើក្បត់ជាតិ។ បើតាមមេធាវីរបស់អតីតមេបក្សប្រឆាំង កូនក្តីរបស់ខ្លួន បានឆ្លើយថា ការផ្សារភ្ជាប់ទំនាក់ទំនងជាមួយបរទេសកន្លងមក គឺដើម្បីលទ្ធិប្រជាធិបតេយ្យ និងប្រយោជន៍ជាតិ មិនមែនដើម្បីផ្តួលរំលំរដ្ឋាភិបាលនោះឡើយ។
នៅចំពោះមុខចៅក្រមស៊ើបសួរ លោក កឹម សុខា អតីតប្រធានគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារអស់រយៈពេលជាងពីរខែមកហើយនោះ បានច្រានចោលការចោទប្រកាន់ថា លោក មានទំនាក់ទំនងជាមួយបរទេសជាសម្ងាត់ ដើម្បីផ្តួលរំលំរដ្ឋាភិបាលកម្ពុជា។ ផ្ទុយទៅវិញ អតីតប្រធានគណបក្សប្រឆាំងរូបនេះ ប្រាប់ទៅចៅក្រមស៊ើបសួរថា ទំនាក់ទំនងរបស់លោកជាមួយបរទេសកន្លងមក គឺស្ថិតក្នុងក្របខណ្ឌការងារ ដើម្បីលើកស្ទួយសិទ្ធិមនុស្ស និងលទ្ធិប្រជាធិបតេយ្យ ដែលស្របនឹងច្បាប់ជាតិនិងច្បាប់អន្តជាតិ។ ទាំងនេះ គឺជាការលើកឡើងរបស់លោក ហែម សុជាតិ មេធាវីមួយរូបរបស់លោក កឹម សុខា ដែលបានចូលរួមស្តាប់ការសាកសួរ។
លោកមេធាវី ហែម សុជាតិ បានសង្ខេបប្រសាសន៍របស់លោក កឹម សុខា ដែលឆ្លើយទៅកាន់ចៅក្រមស៊ើបសួរ មកប្រាប់សារព័ត៌មានថ្មីៗ យ៉ាងដូច្នេះថា៖«គាត់ថាគាត់ ជាកូនខ្មែរ។ គាត់ គិតតែពីអ្វី ដែលផ្តល់ផលប្រយោជន៍ឲ្យខ្មែរ។ ការឃុបឃិត ឬការសមគំនិតជាមួយបរទេស មិនដែលកើតមានម្តងណាឡើយសម្រាប់គាត់។ ហើយគាត់ ស្រឡាញ់សិទ្ធិមនុស្ស ប្រជាធិបតេយ្យ និងចង់ជួយកសាងប្រទេសឲ្យរីកចម្រើន។ គាត់ មិនធ្វើអ្វីមួយឲ្យប៉ះពាល់ដល់ប្រយោជន៍ជាតិទេ»។
លោក ហែម សុជាតិ បន្តថា បញ្ហាសំខាន់ ដែលចៅក្រមស៊ើបសួរ លើកទៅសួរលោក កឹម សុខា គឺផ្តោតលើទំនាក់ទំនងជាមួយបរទេស ជាពិសេសសហរដ្ឋអាមេរិក និងអង្គការអន្តរជាតិមួយចំនួនទៀត ដូចជា វិទ្យាស្ថានជាតិដើម្បីប្រជាធិបតេយ្យ (NDI) និង វិទ្យាស្ថានសាធារណរដ្ឋអន្តរជាតិ (IRI) ជាដើម។ លោកមេធាវី និយាយដូច្នេះថា៖«ការសាកសួរកន្លងមក គឺអត់មានភស្តុតាង ដែលបញ្ជាក់ថាគាត់ បានប្រព្រឹត្តដូចការចោទប្រកាន់ទេ ព្រោះចម្លើយរបស់គាត់ គឺបញ្ជាក់ថា អ្វីដែលគាត់ធ្វើ គឺសុទ្ធតែជាសកម្មភាពលើកស្ទួយសិទ្ធិមនុស្សនិងប្រជាធិបតេយ្យទាំងអស់។ ដូចអត់មានអ្វីខុសពីហ្នឹងផង»។
នេះជាលើកទីពីរហើយ ដែលលោក គី ឫទ្ធី ចៅក្រមស៊ើបសួរនៃសាលាដំបូងរាជធានីភ្នំពេញ អមដោយក្រឡាបញ្ជីពីររូប បានធ្វើដំណើរទៅជួបលោក កឹម សុខា ដល់ពន្ធនាគារត្រពាំងផ្លុង ក្នុងខេត្តត្បូងឃ្មុំ កាលថ្ងៃទី១៤ ខែធ្នូ ឆ្នាំ២0១៧ ដើម្បីសួរពីការស៊ុមគ្រលុំជាមួយបរទេសជាសម្ងាត់ ក្នុងគោលបំណងផ្តួលរំលំរដ្ឋាភិបាលកម្ពុជា។
លោក សំ សុគង់ មេធាវីមួយរូបទៀតរបស់លោក កឹម សុខា បានប្រាប់ថា ចៅក្រមស៊ើបសួរ បានលើកឡើងនូវសំណួរជាង ៥០ឯណោះ។ ប៉ុន្តែ លោកមេធាវីរូបនេះ អះអាងថា សំណួរភាគច្រើន ក្នុងចំណោមសំណួរជាង៥០នោះ ត្រូវបានលោក កឹម សុខា មិនឆ្លើយតប ហើយនៅស្ងៀម ដែលជាសិទ្ធិរបស់ជនត្រូវចោទ។
លោក សំ សុគង់ បន្តថា ចៅក្រមស៊ើបសួរ នឹងសួរលោក កឹម សុខា ពីរដងទៀត គឺនៅថ្ងៃទី២១ និងថ្ងៃទី២២ ខែធ្នូ ឆ្នាំ២0១៧។ លោក បន្ថែមថា ក្រុមមេធាវី នឹងដាក់សំណើទៅកាន់ចៅក្រមស៊ើបសួរ ក្នុងថ្ងៃនេះ ឬថ្ងៃស្អែក ដើម្បីសុំឲ្យនាំលោក កឹម សុខា ទៅសួរក្នុងបរិវេណតុលាការវិញ។
លោកមេធាវី សំ សុគង់ បញ្ជាក់ពីហេតុផលថា៖«ទីមួយ ការស្នើបែបនេះ គឺជាឆន្ទៈរបស់គាត់ផ្ទាល់ [លោក កឹម សុខា]។ ទីពីរ នីតិវិធី តម្រូវឲ្យសួរគាត់ ក្នុងបន្ទប់ចៅក្រមស៊ើបសួរ មិនមែនក្នុងពន្ធនាគារទេ។ ហើយទីបី ការសួរក្នុងពន្ធនាគារ គឺហាក់ដូចជាកាត់បន្ថយសិទ្ធិរបស់មេធាវី ក្នុងការការពារក្តី»។
កាលពីយប់ថ្ងៃទី២ ឈានចូលថ្ងៃទី៣ ខែកញ្ញា ឆ្នាំ២0១៧ តុលាការ បានដឹកនាំកម្លាំងសមត្ថកិច្ចចុះទៅចាប់លោក កឹម សុខា ដល់គេហដ្ឋាន ។ តុលាការ យកវីដេអូឃ្លីបមួយ ដែលលោក កឹម សុខា បាននិយាយតាំងប៉ុន្មានឆ្នាំមុន ទៅធ្វើជាអង្គហេតុក្នុងការចាប់ខ្លួន និងដាក់លោក កឹម សុខា ឲ្យស្ថិតនៅក្រោមការសង្ស័យថា បានឃុបឃិតជាមួយបរទេសជាសម្ងាត់ ដើម្បីផ្តួលរំលំរដ្ឋាភិបាលកម្ពុជា។
ក្នុងវីដេអូឃ្លីបនោះ លោក កឹម សុខា បាននិយាយទៅកាន់អ្នកគាំទ្រថា ខ្លួនមានអ្នកជំនាញជាជនបរទេសនៅពីក្រោយ ដើម្បីជួយជ្រោមជ្រែង ក្នុងការផ្លាស់ប្តូរមេដឹកនាំកនៅកម្ពុជា។ ក្តីសង្ស័យលើលោក កឹម សុខា ជុំវិញអំពើក្បត់ជាតិ ត្រូវបានក្រសួងមហាផ្ទៃ យកទៅផ្សារភ្ជាប់ជាមួយគណបក្សសង្គ្រោះជាតិទាំងមូល។
ក្រសួងមហាផ្ទៃ យល់ថា គណបក្សសង្គ្រោះជាតិ ក៏អាចជាប់ទាក់ទងនឹងអំពើក្បត់ជាតិ ដូចឯកឧត្តម កឹម សុខា ដែរ ទើបដាក់បណ្តឹងទៅកាន់តុលាការកំពូល ដើម្បីសុំឲ្យរំលាយចោល។ នៅថ្ងៃទី១៦ ខែវិច្ឆិកា ឆ្នាំ២0១៧នេះ តុលាការកំពូល នឹងបើកសវនាការលើបណ្តឹងសុំឲ្យរំលាយគណបក្សសង្គ្រោះជាតិ៕
Tag:
កឹម សុខា
មេធាវី
ចៅក្រម
© រក្សាសិទ្ធិដោយ thmeythmey.com