រថយន្ត
អន្តរជាតិ
កំហុសបច្ចេកទេស បុរសម្នាក់ជិះ Uber ២០នាទី តែគាត់ត្រូវបង់១៥០០០ដុល្លារអាមេរិក
× បុរសម្នាក់ដែលរស់នៅក្រុងតូរុងតូ ប្រទេសកាណាដា បានជួបរឿងដ៏ភ្ញាក់ផ្អើលមួយកាលពីពេលថ្មីៗកន្លងមក ដោយរូបគេបានជិះរថយន្តសេវាកម្ម Uber ក្នុងរយៈពេលត្រឹមតែ២០នាទី ប៉ុន្តែវិក្កយបត្រចេញមកស្មើនឹងតម្លៃរថយន្តមួយគ្រឿង ពោលគឺ១៨ ៥១៨ដុល្លារកាណាដា (ជិត១៥០០០ដុល្លារអាមេរិក)។
លោក Hisham Salama បានជិះរថយន្តតាមសេវាកម្ម Uber ដើម្បីទៅសួរសុខទុក្ខមិត្តភក្តិម្នាក់នៅមន្ទីរពេទ្យ St.Joseph ក្នុងក្រុងតូរុងតូ លើចម្ងាយប្រមាណ៥គីឡូម៉ែត្រ និងក្នុងរយៈពេលជាង២០នាទី។ លោកគិតថា តម្លៃដែលលោកត្រូវបង់គឺក្នុងរង្វង់២០ដុល្លារកាណាដា (ជាង១៥ដុល្លារអាមេរិក)។ ប៉ុន្តែផ្ទុយទៅវិញ សារនៅក្នុង App បានបង្ហាញថា លោកត្រូវចំណាយ ១៨ ៥១៨ដុល្លារកាណាដា (ជិង១៥០០០ដុល្លារអាមេរិក)។
«ឃើញដំបូង ខ្ញុំបានត្រឹមតែសើចប៉ុណ្ណោះ ព្រោះគិតថា វាគ្រាន់តែជាបញ្ហាបច្ចេកទេសបន្តិចបន្តួច ប៉ុន្តែ២០នាទីក្រោយមក ខ្ញុំនិងមិត្តម្នាក់ គិតថា គួរពិនិត្យមើល Credit Card ដើម្បីផ្ទៀងផ្ទាត់»។ នេះជាការរៀបរាប់របស់លោក Salama ទៅកាន់សារព័ត៌មាន VICE ។
ក្រោយការត្រួតពិនិត្យ ទើបលោក Salama មើលឃើញថា ការជិះ Uber ចន្លោះពីម៉ោង៥:១៤នាទី ដល់ម៉ោង៥:៣៥នាទី ពិតជាបានធ្វើឲ្យលោកត្រូវចំណាយលុយជិត១៥០០០ដុល្លារអាមេរិកយ៉ាងដូច្នោះមែន ហើយទឹកប្រាក់ក្នុងកាតឥណទានរបស់លោក ក៏មិនគ្រប់គ្រាន់ក្នុងការបង់ថ្លៃសេវានោះដែរ ។
លោក Salama បានទាក់ទងភ្លាមៗទៅសេវាកម្មអតិថិជន ប៉ុន្តែគ្មានការឆ្លើយតប ទៅព្រឹកស្អែកបន្ទាប់ ខាងភ្នាក់ងារ Uber បានទាក់ទងទៅលោកវិញថា តម្លៃសេវាកម្មពិតជាត្រឹមត្រូវ។
ក្រៅពីលោក និងមិត្តភក្តិបង្ហោះ ករណីនេះនៅលើបណ្តាញសង្គម Twitter លោក Salama បានបន្តព្យាយាមទាក់ទងទៅខាង Uber ហើយទីបំផុតទើបពិនិត្យឃើញថា វាជាកំហុសបច្ចេកទេសសុទ្ធសាធ។
ក្រុមហ៊ុន Uber បានចេញសេចក្តីថ្លែងការណ៍សុំទោសជាធារណៈចំពោះហេតុការណ៍ដែលបានកើតឡើង ព្រមទាំងសងប្រាក់១៥០ដុល្លារវិញ ដែលបានកាត់ចេញពីកាតឥណទានរបស់លោក Salama៕
© រក្សាសិទ្ធិដោយ thmeythmey.com