ប្រមុខសិទ្ធិមនុស្ស៖ «មុនផ្ទុះវិបត្តិជនភៀសខ្លួន ខ្ញុំបានសុំឲ្យលោកស្រីស៊ូជី បញ្ឈប់សកម្មភាពយោធា តែលោកស្រីមិនធ្វើអ្វីសោះ»

អន្តរជាតិ

ប្រមុខសិទ្ធិមនុស្ស៖ «មុនផ្ទុះវិបត្តិជនភៀសខ្លួន ខ្ញុំបានសុំឲ្យលោកស្រីស៊ូជី បញ្ឈប់សកម្មភាពយោធា តែលោកស្រីមិនធ្វើអ្វីសោះ»

19, Dec 2017 , 7:19 pm

រូបភាព

ដោយ:

ប្រមុខស្ថាប័នសិទ្ធិមនុស្សអង្គការសហប្រជាជាតិ បានប្រើប្រាស់ប្រព័ន្ធផ្សព្វផ្សាយដើម្បីរិះគន់ និងដាស់តឿនរដ្ឋាភិបាលមីយ៉ាន់ម៉ាជាថ្មីលើវិបត្តិជនភៀសខ្លួននៅក្នុងរដ្ឋ Rakhine ។ ប្រមុខសិទ្ធិមនុស្សរូបនេះ បានព្រមានពីការវិវត្តនៃស្ថានភាពជម្លោះ ដែលអាចធ្វើឲ្យរដ្ឋាភិបាល និងភាគីផ្សេងទៀតក្នុងជម្លោះមីយ៉ាន់ម៉ាពាក់ព័ន្ធបទឧក្រិដ្ឋប្រល័យពូជសាសន៍។

តាមរយៈកិច្ចសម្ភាសន៍ជាមួយនឹងសារព័ត៌មាន BBC ដែលចុះផ្សាយនៅថ្ងៃ១៨ ធ្នូ លោក Zeid Ra'ad Al Hussein ឧត្តមស្នងការសិទ្ធិមនុស្សអង្គការសហប្រជាជាតិ បានអះអាងថា លោក គ្មានយុត្តាធិការ ឬសមត្ថកិច្ចក្នុងការបង្ហាញថា យោធាឬរដ្ឋាភិបាលមីយ៉ាន់ម៉ា បានប្រព្រឹត្តអំពើដែលអាចឈានដល់បទល្មើសប្រល័យពូជសាសន៍នោះទេ ។

ក៏ប៉ុន្តែ លោកឧត្តមស្នងការសិទ្ធិមនុស្សរូបនេះ បានទទូចឲ្យមានការស៊ើបអង្កេតបទឧក្រិដ្ឋមួយពាក់ព័ន្ធនឹងវិបត្តិ នៅក្នុងរដ្ឋ Rakhine របស់មីយ៉ាន់ម៉ា ដែលលោកអះអាងថា វាជាការវាយប្រហារដ៏ឃោរឃៅទៅលើជនជាតិភាគតិចម៉ូស្លីម ដើម្បីមកទទួលការខុសត្រូវផ្នែកច្បាប់ ។

តាមរយៈកិច្ចសម្ភាសន៍ដដែលនោះ លោក Zeid Ra'ad Al Hussein ក៏បានរម្លឹកពីការយកចិត្តទុកដាក់របស់លោក ក៏ដូចជាអង្គការសហប្រជាជាតិ មុនពេលដែលវិបត្តិមនុស្សជាតិដ៏ធ្ងន់ធ្ងរមួយនេះបានកើតឡើងផងដែរ ។ លោក Zeid បានអះអាងថា៖« នៅខែកុម្ភៈឆ្នាំ២០១៧ ជាពេលដែលភ្នាក់ងារសិទ្ធិមនុស្សអង្គការសហប្រជាជាតិចេញរបាយការណ៍ហិង្សាមួយនៅមីយ៉ាន់ម៉ាដែលផ្ទុះឡើងនៅខែតុលាឆ្នាំ២០១៦ ខ្ញុំ បានទូរសព្ទ័ទៅលោកស្រី អ៊ុងសាន ស៊ូជី»។

លោកបន្ថែមថា៖ «ខ្ញុំបានអំពាវនាវឲ្យលោកស្រីស៊ូជី បញ្ឈប់ប្រតិបត្តិការរបស់យោធា ។ ... ខ្ញុំ ក៏បានអំពាវនាវឲ្យលោកស្រី ធ្វើអ្វីក៏ដោយ ដែលលោកស្រី អាចធ្វើបានដើម្បីបញ្ចប់បញ្ហានេះ។ជារឿងដ៏គួរឲ្យសោកស្តាយសម្រាប់ខ្ញុំ គឺ វាហាក់គ្មានចំណាត់ការណាមួយត្រូវបានដាក់ចេញសោះ»។

គួរជម្រាបផងដែរថា តាមរបាយការណ៍របស់ភ្នាក់ងារអង្គការសហប្រជាជាតិទទួលបន្ទុកជនភៀសខ្លួន មកទល់ពេលនេះ ជនភៀសខ្លួនជនជាតិភាគតិចរ៉ូហ៊ីងយ៉ា នៅតែបន្តភៀសខ្លួនចេញពីរដ្ឋមានការបាញ់ប្រហារ Rakhine របស់មីយ៉ាន់ម៉ាជាមួយនឹងភាពភ័យខ្លាច ។ ក្រុមភៀសខ្លួនទាំងនោះ បានភៀសខ្លួនទៅប្រទេសបង់ក្លាដែស សរុបជាង ៦០ ម៉ឺននាក់ហើយ ។

កន្លងមក លោកឧត្តមស្នងការសិទ្ធិមនុស្ស ក៏ដូចជាអគ្គលេខាធិការអង្គការសហប្រជាជាតិ បានបើកកិច្ចប្រជុំជាច្រើនលើកច្រើនសារមកហើយដើម្បីជាវេទិការដេញដោលមីយ៉ាន់ម៉ា និងដាក់សម្ពាធឲ្យមីយ៉ាន់ម៉ា រិះរកមធ្យោបាយដោះស្រាយ និងបញ្ចប់បញ្ហា។ ក៏ប៉ុន្តែថ្មីៗនេះ រដ្ឋាភិបាលមីយ៉ាន់ម៉ា ក៏បានថ្លែងការពារថា ស្ថានភាពនៅកន្លែងមានបញ្ហា បានវិលទៅរកភាពដើមវិញហើយ ។ មីយ៉ាន់ម៉ា ក៏បានសុំឲ្យសហគមន៍អន្តរជាតិទុកពេលសម្រាប់ខ្លួនដើម្បីស្តារស្ថានភាពឡើងវិញផងដែរ ៕