ជាតិ
សុខភាព
ក្រសួងសុខាភិបាល ហាមពលរដ្ឋប្រើប្រាស់ទឹកដោះគោ៣ប្រភេទដែលមានមេរោគ រូបពីហ្វេសប៊ុកក្រសួងសុខាភិបាល
× ភ្នំពេញ៖ ក្រសួងសុខាភិបាល ប្រាប់ឲ្យពលរដ្ឋបញ្ឈប់ការទិញទឹកដោះគោចំនួន៣ប្រភេទ យកទៅឲ្យកូនឫទារកញាំ ដោយសារតែមានសារធាតុមេរោគ នៅក្នុងទឹកដោះគោនោះ។
ទឹកដោះទាំង៣ប្រភេទ ដែលក្រសួងសុខាភិបាល ហាមពលរដ្ឋយកទៅផ្ដល់ជាចំណីអាហារ សម្រាប់ទារក និងកូនតូចៗនោះ មានទឹកដោះគោម៉ាកសេលីយ៉ា អាដេ ( CELIA AD, ៣៥០ក្រាម) សេលីយ៉ា ម៉ាម៉ា (CELIA MAMA, ៤០០ក្រាម) ដែលជាផលិតផលរបស់បារាំង នាំចូលដោយក្រុមហ៊ុន ANGKOR ADVANN (CAMBODIA) Import & Export និងទឹកដោះគោពិកូតអេសអិល (PICOT SL, ៣៥០ក្រាម) ជាផលិតផលបារាំង ដែលនាំចូលដោយក្រុមហ៊ុន MEDEX CO.LTD។
បើតាមសេចក្តីប្រកាសព័ត៌មានរបស់ក្រសួងសុខាភិបាល ទឹកដោះគោទាំង៣ប្រភេទនេះ មានផ្ទុកសារធាតុមេរោគម្យ៉ាងឈ្មោះថា សាលម៉ូណែលឡា (Salmonella) ដែលបង្កឲ្យគ្រោះថ្នាក់ដល់សុខភាពអ្នកប្រើប្រាស់ ជាពិសេសទារក កុមារតូចៗ ស្ត្រីមានផ្ទៃពោះ និងស្ត្រីដែលបំបៅដោះកូន។
ក្រសួងសុខាភិបាល ក៏បានបង្គាប់ឲ្យក្រុមហ៊ុនទាំងពីរខាងលើ សហការជាមួយអាជ្ញាធរពាក់ព័ន្ធ ប្រមូលយកទឹកដោះគោទាំងនោះពីទីផ្សារវិញ។ បន្ថែមពីនេះក្រសួង ក៏អំពាវនាវឲ្យពលរដ្ឋបញ្ឈប់ការទិញទឹកដោះគោចំនួន៣ប្រភេទយកទៅឲ្យប្រើប្រាស់ផងដែរ។ បើក្នុងករណីប្រទះមានអ្នកប្រើប្រាស់ ឬមានអ្នកជំងឺដោយសារប្រើប្រាស់ទឹកដោះគោខាងលើនេះ ត្រូវរាយការណ៍មកក្រសួង៕
Tag:
សុខាភិបាល
ទឹកដោះគោ
© រក្សាសិទ្ធិដោយ thmeythmey.com