ជាតិ
នយោបាយជាតិ
មានគណបក្ស៤ប្រកួតប្រជែងការបោះឆ្នោតជ្រើសតាំងសមាជិកព្រឹទ្ធសភា
× ភ្នំពេញ៖ មានតែគណបក្សនយោបាយ៤ប៉ុណ្ណោះ នឹងត្រូវប្រកួតប្រជែងការបោះឆ្នោតជ្រើសតាំងសមាជិកព្រឹទ្ធសភា ឆ្នាំ២០១៨ខាងមុខ ខណៈដែលគណបក្សប្រជាជនកម្ពុជា មានលទ្ធភាពខ្ពស់ជាងគេ ក្នុងការទទួលបានអាសនៈស្ទើទាំងស្រុង។
គណៈកម្មាធិការរៀបចំការបោះឆ្នោត (គ.ជ.ប) បានទទួលស្គាល់គណបក្សនយោបាយ៤ជាផ្លូវការ ក្នុងការចូលរួមបោះឆ្នោតជ្រើសតាំងសមាជិកព្រឹទ្ធសភា អាណត្តិទី៤ ដោយក្នុងនោះគណបក្សប្រជាជនកម្ពុជា គណបក្សហ្វ៊ុនស៊ិនប៉ិច គណបក្សខ្មែររួបរួមជាតិ និងគណបក្សយុវជនកម្ពុជា។ ក្នុងចំណោមគណបក្សទាំង៤នេះ គណបក្សប្រជាជន និងគណបក្សហ្វ៊ុនស៊ិនប៉ិច ដាក់បេក្ខជនឈរឈ្មោះទាំង៨ភូមិភាគ ខណៈគណបក្សខ្មែររួបរួមជាតិ ដាក់បេក្ខជនឈរឈ្មោះ៧ភូមិភាគ និងគណបក្សយុវជនដាក់បេក្ខជន៣ភូមិភាគ នៃអាសនៈព្រឹទ្ធសភា។ នេះបើតាមលោក សោម សូរីដា អគ្គលេខារងគណៈកម្មាធិការជាតិរៀបចំការបោះឆ្នោត។
ការបោះឆ្នោតជ្រើសតាំងសមាជិកព្រឹទ្ធសភា អាណត្តិទី៤ នឹងប្រព្រឹត្តទៅនៅថ្ងៃទី២៥ កុម្ភៈ ឆ្នាំ២០១៨ខាងមុខ។ ការបោះឆ្នោតជ្រើសរើសសមាជិកព្រឹទ្ធសភា ត្រូវជ្រើសដោយការបោះឆ្នោតអសកល (មិនសម្ងាត់) ហើយអ្នកបោះឆ្នោត និងអង្គបោះឆ្នោត គឺជាតំណាងរាស្ត្រក្នុងតំណែង និងជាសមាជិកក្រុមប្រឹក្សាឃុំ-សង្កាត់ទាំងអស់ ក្នុងតំណែងក្នុងក្របខណ្ឌនៃភូមិភាគនីមួយៗ។
ត្រង់ចំណុចនេះ គេអាចសន្និដ្ឋានបានថា គណបក្សទាំង៤ខាងលើ មានតែគណបក្សប្រជាជនកម្ពុជា ដែលអាចក្តោបអំណាចព្រឹទ្ធសភាស្ទើទាំងស្រុង នៅឆ្នាំ២០១៨ ។ មូលហេតុដែលគេអាចដាក់សន្និដ្ឋានបែបនេះ ដោយផ្អែកទៅលើលទ្ធផលនៃការបោះឆ្នោតក្រុមប្រឹក្សាឃុំ-សង្កាត់ កាលពីខែមិថុនា ឆ្នាំ២០១៧កន្លងមក គណបក្សប្រជាជនកម្ពុជា ទទួលបានជោគជ័យធំ ដោយមានកៅអីក្រុមប្រឹក្សាឃុំ-សង្កាត់ច្រើនជាងគេ គណបក្សដែលប្រកួតប្រជែងការបោះឆ្នោតព្រឹទ្ធសភានេះ៕
Tag:
ព្រឹទ្ធសភា
នយោបាយ
© រក្សាសិទ្ធិដោយ thmeythmey.com