កីឡាជាតិ
លីគ៖ ទ័ពប្រជែងគ្នាជាមួយក្រុមស្វាយរៀងដើម្បីឡើងទៅជួបបឹងកេតនៅវគ្គផ្តាច់ព្រ័ត្រ
× ក្រុមក្រសួងការពារជាតិ ត្រូវបន្តប្រជែងគ្នាជាមួយក្រុមព្រះខ័នរាជស្វាយរៀងក្នុងវគ្គពាក់កណ្តាលផ្តាច់ព្រ័ត្រនាល្ងាចថ្ងៃសៅរ៍ ទី២៣ ខែធ្នូ ឆ្នាំ២០១៧ នេះ នៅកីឡដ្ឋានខេត្តស្វាយរៀង។ ក្រុមឈ្នះក្នុងការប្រកួតនេះ នឹងឡើងទៅជួបបឹងកេតនៅវគ្គផ្តាច់ព្រ័ត្រ ដើម្បីដណ្តើមជើងឯកក្របខណ្ឌមិត្តហ្វូនខេមបូឌានលីគឆ្នាំ២០១៧ និងកៅអីពានរង្វាន់ AFC Cup 2018។
ក្រោយយកឈ្នះណាហ្គាវើលដោយបាល់កាត់សេចក្តី ៤-៣ នៅវគ្គ Play off ក្រុមទ័ពដែលទទួលបានសិទ្ធឡើងទៅវគ្គពាក់កណ្តាលផ្តាច់ព្រ័ត្រត្រូវប្រជែងជាមួយក្រុមព្រះខ័នរាជស្វាយរៀងនៅម៉ោង៦ល្ងាចថ្ងៃទី២៣ ខែធ្នូ នាកីឡដ្ឋានខេត្តស្វាយរៀង។ ការប្រកួតនៅល្ងាចនេះនឹងក្លាយជាការប្រកួតមួយដ៏តានតឹង និងជក់ចិត្ត ព្រោះក្រុមទាំងពីរសុទ្ធតែត្រូវការឈ្នះដូចគ្នា ដើម្បីឡើងទៅប្រជែងដណ្តើមជើងឯកក្របខណ្ឌលីគកំពូលជាមួយបឹងកេត ដែលរៀបចំនៅថ្ងៃទី៣០ ខែធ្នូ ឆ្នាំ២០១៧ នៅពហុកីឡដ្ឋានជាតិ។
សម្រាប់ការជួបគ្នាពីរប្រកួតកន្លងមកក្រុមទាំងពីរបានបញ្ចប់ត្រឹមលទ្ធផលស្មើ ០-០ ក្នុងជើងទី១ មុនស្វាយរៀងយកឈ្នះ ៣-២ ក្នុងជើងទី២នៅទឹកដីខេត្តស្វាយរៀង។ ប៉ុន្តែការឈ្នះនេះត្រូវបានអ្នកចាត់ការទូទៅរបស់ទ័ព ចាត់ទុកថាកាត់ក្តីគ្មានយុត្តិធម៌ដែលបង្កឲ្យមានការប៉ះទង្គិចពាក្យសម្តីគ្នារវាងក្លិបទាំងពីរផងដែរ។
ក្រុមជើងឯកលីគកំពូលឆ្នាំនេះនឹងទទួលបានកៅអីឡើងទៅលេងវគ្គចែកពូល(Group Stage)នៃពានរង្វាន់ AFC Cup 2018 ដោយស្វ័យប្រវត្តិ ពោលគឺមិនបាច់ឆ្លងវគ្គជម្រុះ Play off ឡើយ បន្ទាប់ពីក្រុម Lao Toyota ត្រូវបាន AFC ពិន័យពីបទកំណត់លទ្ធផលទុកជាមុនកាលពីឆ្នាំ២០១៥ និងឆ្នាំ២០១៦ កន្លងទៅ៕
Tag:
បាល់ទាត់
Cambodian League 2017
© រក្សាសិទ្ធិដោយ thmeythmey.com