បុណ្យសមុទ្រនៅកែបមានស្តង់ផលិតផលកម្ពុជា ថៃ ឡាវ វៀតណាម និងឥណ្ឌា

កីឡាជាតិ

ជាតិ

បុណ្យសមុទ្រនៅកែបមានស្តង់ផលិតផលកម្ពុជា ថៃ ឡាវ វៀតណាម និងឥណ្ឌា

23, Dec 2017 , 3:20 pm

រូបភាព

ដោយ:

ស្តង់ពិព័រណ៍ផលិតផលអន្តរជាតិកម្ពុជា ថៃ ឡាវ វៀតណាម និងឥណ្ឌាប្រមាណជិត១ពាន់ស្តង់បាននិងកំពុងរៀបចំតាំងបង្ហាញ ដើម្បីស្វាគមន៍ភ្ញៀវទេសចរណ៍ជាតិ និងអន្តរជាតិដែលមកទស្សនាពិធីបុណ្យសមុទ្រចាប់ពីថ្ងៃទី២២-២៤ ខែធ្នូ នៅខេត្តកែប។ ក្រៅពីស្តង់ពិព័រណ៍ភ្ញៀវទេចរណ៍ទាំងអស់អាចទស្សនាការប្រគំតន្ត្រី និងការសម្តែងសិល្បៈលក្ខណៈអន្តរជាតិផងដែរ។

បើយោងតាមលោក វ៉ាត់ ចំរើន អនុរដ្ឋលេខាធិការក្រសួងទេសចរណ៍ ពិធីបុណ្យសមុទ្រលើកទី៦នៅខេត្តកែបឆ្នាំនេះមានស្តង់ពិព័រណ៍ផលិតផល និងចំណីអាហារប្រមាណជាជិត១ពាន់ស្តង់មកពីកម្ពុជា ឡាវ ថៃ វៀតណាម និងឥណ្ឌា។ ស្តង់ទំនិញដែលតាំងបង្ហាញនិងលក់នៅម្តុំបរិវេណសាលាខេត្តកែបទាំងនេះ គឺដើម្បីស្វាគមន៍ភ្ញៀវទេសចរណ៍ជាតិ និងអន្តរជាតិដែលមកកម្សាន្ត បុណ្យសមុទ្រឆ្នាំនេះ។

អនុរដ្ឋលេខាធិការរូបនេះបានបន្ថែមថា ចំនួនស្តង់ឆ្នាំនេះមានការកើនឡើងទាំងបរិមាណ សោភ័ណ្ឌភាព បើធៀបនឹងឆ្នាំកន្លងទៅ ដោយសារឆ្នាំនេះមានការកែលម្អប្រកបដោយភាពទាក់ទាញ។ លោកបានបញ្ជាក់ថា គ្រាន់តែបើកសាកល្បងនៅថ្ងៃទី២១ ធ្នូ មានភ្ញៀវទេសជាតិ និងអន្តរប្រមាណ៥ពាននាក់បានមកចូលរួម។

លោក វ៉ាត់ ចំរើន បានសង្កត់ធ្ងន់ថា៖«ការតាំងស្តង់ពិព័រណ៍នេះផ្តោតសំខាន់លើការតាំងបង្ហាញពីការរីកចម្រើនផ្នែកពាណិជ្ជកម្មរបស់ក្រសួងពាណិជ្ជកម្ម ក្រសួងទេសចរណ៍រួមមានផលិតផលទេសចរណ៍ និងទីតាំងដែលបម្រើឲ្យទេសចរណ៍ជាដើម។ ហើយក៏មានការស្តង់ពិព័រណ៍ចំណីអាហារថៃ វៀតណាម ឥណ្ឌា ចិន ជាច្រើនទៀតផងដែរ»។

ដោយមានកិច្ចសហការរវាងក្រសួងវប្បធម៌ និងវិចិត្រសិល្បៈជាមួយបណ្តាស្ថានទូតបរទេសនៅកម្ពុជា ពិធីបុណ្យសមុទ្រឆ្នាំនេះមានការសម្តែងសិល្បៈដ៏ធំដែលជាការសម្តែងរួមគ្នារវាងក្រុមសិល្បៈកម្ពុជា ឥណ្ឌា ចិន ថៃ និងវៀតណាមផងដែរ។ លើសពីនេះក៏មានការប្រគំតន្ត្រីពីសំណាក់តារាចម្រៀងល្បីៗ និងផ្ទាំងទស្សនីយភាពផ្សេងទៀតផងដែរ។

លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបន្ថែមថា ក្រៅពីសមិទ្ធផលខាងលើមានការប្រកួត និងសម្តែងកីឡាទាំងក្នុងទឹក និងលើគោកចំនួន១១ប្រភេទកីឡាផងដែរ។ កីឡាទាំងនោះរួមមានរត់ប្រណាំង ទ្រីយ៉ាងត្លុង ប្រណាំងកង់ ចំបាប់ឆ្នេរខ្សាច់ ប្រដាល់គុនចម្រុះ ជិះស្គីលើទឹក ទូកក្តោង បាល់ទះឆ្នេរខ្សាច់ កីឡារាំអន្តរជាតិ កីឡាថាសហោះ និងកីឡាជិះក្តារំអិល។

ពិធីបុណ្យសមុទ្រលើកទី៦នៅខេត្តកែបឆ្នាំនេះធ្វើឡើងក្រោមប្រធានបទ«ឆ្នេរសមុទ្របៃតង អានគត គឺបច្ចុប្បន្ន»រៀបចំរយៈពេលថ្ងៃចាប់ពីថ្ងៃទី២២ ដល់ថ្ងៃទី២៤ ខែធ្នូ ឆ្នាំ២០១៧ ខណៈឆ្នាំនេះថ្នាក់ដឹកនាំរំពឹងអាចទាក់ទាញភ្ញៀវទេសចរណ៍ប្រមាណជា៣០ម៉ឺននាក់ចូលរួម។

ពិធីបុណ្យនេះបានរៀបចំពិធីក្រុងពលីសុំម្ចាស់ទឹកម្ចាស់ដី និងចម្រើនសេចក្តីសុខជូនប្រជាពលរដ្ឋកម្ពុជា កាលពីរសៀលថ្ងៃទី២១ ធ្នូ ឆ្នាំ២០១៧ ក្រោមវត្តមានលោក ថោង ខុន រដ្ឋមន្ត្រីក្រសួងទេសចរណ៍ ខណៈពិធីបើកជាផ្លូវការនឹងប្រព្រឹត្តទៅនៅល្ងាចថ្ងៃទី២៣ ខែធ្នូ ក្រោមវត្តមានសម្តេចនាយករដ្ឋមន្ត្រី ហ៊ុន សែន៕