ជាតិ
សុវត្តិភាព ចរាចរណ៍
២០១៧៖ គ្រោះថ្នាក់ចរាចរណ៍សម្លាប់មនុស្សជិត១៨០០នាក់នៅកម្ពុជា
× យ៉ាងហោចណាស់មនុស្សចំនួន១,៧៨០នាក់បានស្លាប់ និងរងរបួសចំនួន១,០៦៨នាក់ ដោយសារគ្រោះថ្នាក់ចរាចរណ៍នៅឆ្នាំ២០១៧។ នេះបើតាមរបាយការណ៍របស់នាយកដ្ឋាននគរបាលចរាចរណ៍ និងសណ្ដាប់ធ្នាប់ នៃអគ្គស្នងការដ្ឋាននគរបាលជាតិ។
អ្នកស្លាប់ដោយសារគ្រោះថ្នាក់ចរាចរណ៍ទូទាំងប្រទេសនៅឆ្នាំ២០១៧នេះ មានចំនួន១,៧៨០នាក់ បានកើនឡើងចំនួន៦៣នាក់ បើប្រៀបនឹងឆ្នាំ២០១៦។ ចំណែកអ្នករបួសមានចំនួន៥,៥៣៩នាក់ ធ្លាក់ចុះ១,០៦៨នាក់ បើធៀបនឹងឆ្នាំ២០១៦ ខណៈដែលករណីគ្រោះថ្នាក់ចរាចរណ៍មានចំនួន៣,៥៣១ករណី បើធៀបនឹងឆ្នាំ២០១៦ធ្លាក់ចុះ១៦៩ករណី។ នេះបើតាមរបាយការណ៍របស់ នាយកដ្ឋាននគរបាលចរាចរណ៍ និងសណ្ដាប់ធ្នាប់ នៃអគ្គស្នងការដ្ឋាននគរបាលជាតិ។
បើយោងតាមរបាយការណ៍ដដែលបានឲ្យដឹងថា រាជធានីភ្នំពេញ មានករណីគ្រោះថ្នាក់ចរាចរណ៍ ច្រើនជាងគេ គឺរហូតដល់ ៤៤៨ករណី មានអ្នកស្លាប់១៦៨នាក់ និងរបួស៦០០នាក់។ ខេត្តដែលមានគ្រោះថ្នាក់ចរណ៍ច្រើនបន្ទាប់ពីរាជធានីភ្នំពេញ គឺខេត្តបន្ទាយមានជ័យ ដែលមានចំនួន ២០៧ករណី មានអ្នកស្លាប់១០៩នាក់ និងរបួស២៩៧នាក់។ ចំណែកឯខេត្តដែលមានគ្រោះថ្នាក់ចរាចរណ៍តិចជាងគេគឺខេត្តត្បូងឃ្មុំ ដែលមានចំនួន៥៧ករណី មានអ្នកស្លាប់ចំនួន៤៥នាក់ និងរបួសចំនួន៩៨នាក់៕
© រក្សាសិទ្ធិដោយ thmeythmey.com