ជាតិ
ទោះដឹងមិនឈ្នះកៅអីព្រឹទ្ធសភា តែលោក ពេជ្រ ស្រស់ ចង់បំពេញឆន្ទៈអង្គបោះឆ្នោត
× ភ្នំពេញ៖ គណបក្សយុវជនកម្ពុជា បានចូលរួមការបោះឆ្នោតជ្រើសរើសសមាជិកព្រឹទ្ធសភា ជាមួយគណបក្ស៣ផ្សេងទៀត នៅខែកម្ភៈ ខាងមុខនេះ។ គណបក្សយុវជនកម្ពុជា ដាក់បេក្ខភាពប្រកួតប្រជែងតែ ៣ភូមិភាគប៉ុណ្ណោះ។ ទោះជាដាក់បេក្ខភាពប្រកួតប្រជែងហើយក្តី ប៉ុន្តែគណបក្សយុវជនកម្ពុជា មិនរំពឹងទទួលបានកៅអីព្រឹទ្ធសភាឡើយ។
ភូមិភាគចំនួន៣ ដែលគណបក្សយុវជនកម្ពុជា បានដាក់បេក្ខជនឈរឈ្មោះនោះ រួមមាន ភូមិភាគទី១ រាជធានីភ្នំពេញ , ទី២ កំពង់ចាម និងត្បូងឃ្មុំ និងទី៣ កណ្ដាល ។ គណបក្សយុវជនកម្ពុជា បានដាក់បេក្ខជនឈរឈ្មោះ ៣៨នាក់ ក្នុងភូមិភាគទាំង៣នេះ ខណៈមានអង្គបោះឆ្នោតពីក្រុមប្រឹក្សាឃុំ-សង្កាត់ តែ៣ប៉ណ្ណោះ ដែលទទួលបានពីការបែងចែកអាសនៈអតីតគណបក្សសង្គ្រោះជាតិ។ លទ្ធភាពទទួលបានអាសនៈព្រឹទ្ធសភារបស់គណបក្សយុវជននេះ ទំនងគ្មានឡើយ។
លោក ពេជ្រ ស្រស់ ប្រធានគណបក្សយុវជនកម្ពុជា ទទួលស្គាល់ថា គណបក្សលោកនឹងមិនទទួលបានកៅអីព្រឹទ្ធសភានោះទេ ព្រោះតែអង្គបោះឆ្នោតគ្មានសំឡេងគ្រប់គ្រាន់។ ប៉ុន្តែមូលហេតុដែលលោក សម្រេចចូលរួមប្រកួតប្រជែងការបោះឆ្នោតនេះ ដើម្បីបំពេញសិទ្ធិអង្គបោះឆ្នោតខ្លួន ពោលគឺមិនចង់បោះបង់ការចូលរួម ដូចគណបក្សដទៃ។
ថ្លែងប្រាប់សារព័ត៌មានថ្មីៗ ប្រធានគណបក្សយុវជនរូបនេះ បាននិយាយដូច្នេះថា៖«យើងមិនយកគំរូតាមគណបក្សដទៃ ដែលដឹងខ្លួនថាមិនឈ្នះ ហើយសុខចិត្តឲ្យអង្គបោះឆ្នោតទៅបោះឆ្នោតឲ្យគណបក្សដទៃនោះ គឺយើងមិនធ្វើតាមទេ យើងមិនអាចលក់សិទ្ធិអង្គបោះឆ្នោតយើងទេ …។ ដូច្នេះយើងដាក់ពាក្យប្រកួតប្រជែងនេះ យើងមិនមែនសង្ឃឹមថា ទាល់តែបានកៅអីទើបដាក់ទេ គឺអត់ទេ គឺយើងត្រូវបំពេញសិទ្ធិអង្គបោះឆ្នោតតែម្ដង ទោះអង្គបោះឆ្នោតយើងមិនទទួលបានសំឡេងគ្រប់កូរ៉ុមក្នុងព្រឹទ្ធសភា»។
បើទោះជាដឹងថា ខ្លួនគ្មានលទ្ធភាពទទួលបានកៅអីក្តី ប៉ុន្តែលោក ពេជ្រ ស្រស់ នៅតែលួចសង្ឃឹមលើ អង្គបោះឆ្នោតគណបក្សដទៃទៀត ក្នុងការសម្រេចចិត្តផ្ទាល់ខ្លួនច្បាស់លាស់មួយ ដោយងាកមកបោះឆ្នោតគាំទ្រគណបក្សខ្លួន ឲ្យទទួលបានអាសនៈក្នុងព្រឹទ្ធសភា ដើម្បីអាចមានលទ្ធភាពជួយដោះស្រាយបញ្ហាជាតិ។«ទី១ យើងសង្ឃឹមអង្គបោះឆ្នោត៣សំឡេងនេះ។ទី២ យើងសង្ឃឹមដល់អង្គបោះឆ្នោតដទៃ បើគេគិតថា ចង់ឲ្យគណបក្សយុវជនកម្ពុជា ចូលរួមអភិវឌ្ឍន៍ជាតិ កសាងជាតិ ដូច្នេះវាពួកគេទុកចិត្តយើង បោះឆ្នោតឲ្យបក្សយើងក៏ថាបានដែរ»។ នេះជាក្តីរំពឹងបន្តិចបន្តួចរបស់ប្រធានគណបក្សយុវជនកម្ពុជា។
ការបោះឆ្នោតជ្រើសរើសសមាជិកព្រឹទ្ធសភា នឹងប្រព្រឹត្តទៅនៅថ្ងៃទី២៥ កម្ភៈ ដោយមានគណបក្សចំនួន៤ចូលរួម គឺគណបក្សប្រជាជនកម្ពុជា គណបក្សយុវជនកម្ពុជា គណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ។
ការបោះឆ្នោតជ្រើសតាំងសមាជិកព្រឹទ្ធសភា ត្រូវជ្រើសដោយការបោះឆ្នោតអសកល ហើយអ្នកបោះឆ្នោត និងអង្គបោះឆ្នោត គឺជាតំណាងរាស្ត្រក្នុងតំណែង និងជាសមាជិកក្រុមប្រឹក្សាឃុំ-សង្កាត់ទាំងអស់ ក្នុងតំណែងក្នុងក្របខណ្ឌនៃភូមិភាគនីមួយៗ។ អង្គបោះឆ្នោតទាំង២៥រាជធានី-ខេត្ត សរុបចំនួន ១១,៦៩៥នាក់។
អាសនៈព្រឹទ្ធសភាមាន៨ភូមិភាគ ក្នុងនោះភូមិភាគទី១ រាជធានីភ្នំពេញ មាន៦អាសនៈ, ភូមិភាគទី២ ខេត្តកំពង់ចាម និងខេត្តត្បូងឃ្មុំ មាន៨អាសនៈ, ភូមិភាគទី៣ ខេត្តកណ្តាល មាន៥អាសនៈ, ភូមិភាគទី៤ ខេត្តបាត់ដំបង ខេត្តបន្ទាយមានជ័យ ខេត្តសៀមរាប ខេត្តឧត្តរមានជ័យ និងខេត្តប៉ៃលិន មាន១0អាសនៈ, ភូមិភាគទី៥ ខេត្តតាកែវ ខេត្តកំពត និងខេត្តកែប មាន៧អាសនៈ, ភូមិភាគទី៦ ខេត្តព្រៃវែង និងខេត្តស្វាយរៀង មាន៧អាសនៈ, ភូមិភាគទី៧ ខេត្តកំពង់ស្ពឺ ខេត្តកំពង់ឆ្នាំង ខេត្តពោធិ៍សាត់ ខេត្តកោះកុង និងខេត្តព្រះសីហនុ មាន៩អាសនៈ, ភូមិភាគទី៨ ខេត្តកំពង់ធំ ខេត្តព្រះវិហារ ខេត្តក្រចេះ ខេត្តស្ទឹងត្រែង ខេត្តរតនគិរី និងមណ្ឌលគិរី មាន៦អាសនៈ៕
Tag:
ពេជ្រ ស្រស់
បោះឆ្នោត
ព្រឹទ្ធសភា
© រក្សាសិទ្ធិដោយ thmeythmey.com