មិនទាន់មានករណីក្មេងរងគ្រោះ ដោយសារទឹកដោះគោមានមេរោគនៅកម្ពុជាឡើយ

ជាតិ

មិនទាន់មានករណីក្មេងរងគ្រោះ ដោយសារទឹកដោះគោមានមេរោគនៅកម្ពុជាឡើយ

15, Jan 2018 , 5:02 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ មកដល់ពេលនេះ កម្ពុជាមិនទាន់មានក្មេងរងគ្រោះ ដោយសារករណីទឹកដោះគោមានផ្ទុកមេរោគឡើយ។ ក្រសួងសុខាភិបាល ធ្លាប់ប្រាប់ឲ្យពលរដ្ឋបញ្ឈប់ការទិញទឹកដោះគោចំនួន៣ប្រភេទ ដែលជាផលិតផលរបស់ប្រទេសបារាំង យកទៅឲ្យកូនឫទារកញាំ ដោយសារតែមានសារធាតុមេរោគម្យ៉ាងឈ្មោះ«សាលម៉ូណែលឡា» នៅក្នុងទឹកដោះគោនោះ។

អ្នកនាំពាក្យក្រសួងសុខាភិបាលលោក លី សុវ៉ាន បានប្រាប់សារព័ត៌មានថ្មីៗថា ក្រសួងមិនទាន់រកឃើញករណីក្មេងរងគ្រោះ ដោយសារទឹកដោះគោទាំង៣ប្រភេទ ម៉ាកសេលីយ៉ា អាដេ ( CELIA AD) , សេលីយ៉ា ម៉ាម៉ា (CELIA MAMA និងទឹកដោះគោពិកូតអេសអិល (PICOT SL) នោះទេ ក្រោយពីមានការផ្សព្វផ្សាយ និងការទប់ស្កាត់ពីសំណាក់កម្លាំងជំនាញ ។ តែយ៉ាងណាក្រសួងសុខាភិបាល ក៏កំពុងតាមដានលើករណីទឹកដោះគោនេះ ។

ទឹកដោះគោម៉ាកសេលីយ៉ា អាដេ ( CELIA AD, ៣៥០ក្រាម) សេលីយ៉ា ម៉ាម៉ា (CELIA MAMA, ៤០០ក្រាម) ដែលជាផលិតផលរបស់បារាំង នាំចូលដោយក្រុមហ៊ុន ANGKOR ADVANN (CAMBODIA) Import & Export និងទឹកដោះគោពិកូតអេសអិល (PICOT SL, ៣៥០ក្រាម) ជាផលិតផលបារាំង ដែលនាំចូលដោយក្រុមហ៊ុន MEDEX CO.LTD។ ទឹកដោះគោទាំង៣ប្រភេទនេះ មានផ្ទុកសារធាតុមេរោគម្យ៉ាងឈ្មោះថា សាលម៉ូណែលឡា (Salmonella) ដែលបង្កឲ្យគ្រោះថ្នាក់ដល់សុខភាពអ្នកប្រើប្រាស់ ជាពិសេសទារក កុមារតូចៗ ស្ត្រីមានផ្ទៃពោះ និងស្ត្រីដែលបំបៅដោះកូន។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល។

កន្លងមកក្រសួងសុខាភិបាល បានបង្គាប់ឲ្យក្រុមហ៊ុនទាំងពីរខាងលើ សហការជាមួយអាជ្ញាធរពាក់ព័ន្ធ ប្រមូលយកទឹកដោះគោទាំងនោះពីទីផ្សារវិញ។ សារព័ត៌មានថ្មីៗ មិនទាន់អាចទាក់ទងមន្ត្រីនាយកដ្ឋានកុងត្រូល ដើម្បីសុំការអត្ថាធិប្បាយលើការប្រមូលទឹកដោះគោទាំង៣ប្រភេទនេះឡើយ៕