ជាតិ
គិតត្រឹមថ្ងៃទី១៦ មករា រដ្ឋាភិបាល ចំណាយទឹកប្រាក់ជិត២០ម៉ឺនដុល្លារ ឧបត្ថម្ភដល់កម្មការិនីសម្រាលកូន
× ភ្នំពេញ៖ គិតត្រឹមថ្ងៃទី ១៦ មករានេះ កម្មការិនីរោងចក្រចំនួន១,៨៩៥នាក់ហើយ ដែលបានសម្រាលកូនចំនួន១,៩១១នាក់។ កម្មការិនីទាំងនេះ បានទទួលប្រាក់ឧបត្ថម្ភតាមគោលការណ៍កំណត់របស់រដ្ឋាភិបាល ដែលសន្យាផ្ដល់ថវិកា៤០ម៉ឺនរៀល សម្រាប់ស្ត្រីដែលសម្រាលកូនបាន១នាក់ , ថវិកា៨០ម៉ឺនរៀល សម្រាប់កូនភ្លោះ និងទឹកប្រាក់១២០ម៉ឺនរៀល សម្រាប់កូនភ្លោះបីនាក់។ ប៉ុន្តែមកដល់ពេលនេះ មិនទាន់មានកម្មការិនី បង្កើតបានកូនភ្លោះបីនាក់ទេ។
ដោយអនុវត្តតាមការសន្យានេះ រដ្ឋាភិបាល បានចំណាយទឹកប្រាក់អស់៧៤៦លាន ៤សែនរៀលហើយ សម្រាប់ស្ត្រីសម្រាលកូនទាំងនោះ។ នេះបើតាមសម្ដេចនាយករដ្ឋមន្ត្រី ហ៊ុន សែន ដែលបញ្ជាឲ្យរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ តាមដានយកចិត្តទុកដាក់លើកម្មការិនី កំពុងមានផ្ទៃពោះបន្ថែមទៀត ដោយធ្វើយ៉ាងណាអនុវត្តឲ្យបានម៉ឹងម៉ាត់ តាមគោលនយោបាយរដ្ឋាភិបាល។
បន្ថែមពីនេះសម្ដេច ហ៊ុន សែន ក៏បានបង្គាប់ឲ្យរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមន្នីរ័ត្ន រៀបចំថវិកាឧបត្ថម្ភសម្រាប់កម្មការិនីសម្រាលកូនឲ្យបានទាន់ពេលវេលាផងដែរ ពោលគឺមិនឲ្យពួកគេក្នក់ចិត្តឡើយ។
ថ្លែងក្នុងពិធីជួបសំណេះសំណាលជាមួយកម្មករ-កម្មការិនី១៦,៩០៩នាក់ នៅតំបន់ព្រៃទា ក្នុងខណ្ឌពោធិ៍សែនជ័យ នៅព្រឹកថ្ងៃទី១៧ មករានេះ នាយករដ្ឋមន្ត្រី បានរំឮកជាថ្មីថា រដ្ឋាភិបាលបានត្រៀមកញ្ចប់ថវិកា១០លានដុល្លារក្នុងមួយឆ្នាំ សម្រាប់កម្មការិនីសម្រាលកូនទូទាំងប្រទេស៕
© រក្សាសិទ្ធិដោយ thmeythmey.com