ជាតិ
សេដ្ឋកិច្ច
តើប្រាក់បៀវត្សប៉ុន្មាន ត្រូវជាប់ពន្ធប៉ុន្មានភាគរយ យោងតាមច្បាប់ថ្មី?
× ភ្នំពេញ៖ បុគ្គលិកឯកជន និងរដ្ឋ រួមទាំងបុគ្គលិកអង្គការនានា ដែលមានប្រាក់បៀវត្សប្រចាំខែចាប់ពី ១លាន២សែននិង១រៀលឡើងទៅ ត្រូវជាប់ពន្ធលើប្រាក់បៀវត្ស ដែលត្រូវអនុវត្តចាប់ពីខែមករាឆ្នាំ២០១៨ នេះតទៅ។ នេះបើតាមសេចក្ដីណែនាំរបស់ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១៥ខែមករា។
អ្នកមានប្រាក់បៀវត្សប្រចាំខែមិនលើសពី ១,២ លានរៀល មិនត្រូវជាប់ពន្ធលើប្រាក់បៀវត្សឡើយ។ ចំពោះអ្នកមានប្រាក់បៀវត្សចាប់ពី ១,២លាននិង១រៀល ដល់ ២ លានរៀល ត្រូវជាប់ពន្ធ ៥ភាគរយ ខណៈអ្នកមានបៀវត្សលើសពី ២លានរៀល ដល់ ៨,៥លានរៀល ត្រូវជាប់ពន្ធ ១០ភាគរយ។ ចំណែកបៀវត្សលើសពី ៨,៥លានរៀល ដល់ ១២,៥លានរៀល ត្រូវជាប់ពន្ធ ១៥ភាគរយ ហើយបើលើសពី ១២,៥លានរៀល ជាប់ពន្ធ ២០ភាគរយ។
ប៉ុន្តែការយកពន្ធលើប្រាក់បៀវត្សនេះ ត្រូវបានបន្ធូរបន្ថយចំពោះបុគ្គលដែលមានបន្ទុកគ្រួសារ។ សេចក្ដីណែនាំខាងលើ សរសេរថា «ផ្អែកលើការបង្ហាញភ័ស្តុតាងនៃស្ថានភាពគ្រួសារ មន្ត្រីរាជការ គ្រូបង្រៀន គ្រូពេទ្យ និងកម្មករនិយោជិត ដែលមានបន្ទុកចិញ្ចឹមកូន ប្ដីឬប្រពន្ធ ត្រូវបានអនុញ្ញាតឲ្យកាត់បន្ថយមូលដ្ឋានគិតពន្ធលើប្រាក់បៀវត្សចំពោះកូនក្នុងបន្ទុក និងសហព័ន្ធជាមេផ្ទះ ក្នុងម្នាក់ៗ ១៥ម៉ឺនរៀលក្នុងមួយខែ»។ ដូចនេះ បុគ្គលិកឯកជន និងមន្ត្រីរាជការ ដែលមានបៀវត្សលើសពី ១,២លានរៀលដល់ចំនួនណាមួយ អាស្រ័យលើចំនួនបន្ទុកគ្រួសារ នឹងត្រូវរួចផុតពីការបង់ពន្ធលើប្រាក់បៀវត្ស។
គ្រប់សហគ្រាសដែលប្រកបអាជីវកម្ម ស្ថាប័នរដ្ឋ និងអង្គការនានា ដែលមានកាតព្វកិច្ចកាត់ទុកនិងបង់ពន្ធលើប្រាក់បៀវត្ស ត្រូវចាប់អនុវត្តការគិតពន្ធលើប្រាក់បៀវត្សថ្មីនេះ សម្រាប់ការបើកប្រាក់បៀវត្សចាប់ពីខែមករាឆ្នាំ២០១៨ តរៀងទៅ ហើយត្រូវដាក់លិខិតប្រកាសបង់ពន្ធប្រចាំខែនីមួយៗយ៉ាងយឺតបំផុតត្រឹមថ្ងៃទី២០នៃខែបន្ទាប់។
គួរបញ្ជាក់ថា សេចក្ដីណែនាំរបស់ក្រសួងសេដ្ឋកិច្ច និងហិរញ្ញវត្ថុខាងលើ ត្រូវបានចេញផ្សព្វផ្សាយឲ្យអនុវត្ត ដោយអនុលោមតាមមាត្រា ៤៧ថ្មី (ពីរ) នៃច្បាប់ស្ដីពីសារពើពន្ធ ដែលត្រូវបានធ្វើវិសោធនកម្មដោយច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០១៨ ៕
© រក្សាសិទ្ធិដោយ thmeythmey.com