អន្តរជាតិ
កូរ៉េខាងត្បូងនឹងកាត់បន្ថយទ័ពជាង១សែននាក់តាមគោលការណ៍ «តិចតែខ្លាំង»
× ក្រសួងការពារជាតិកូរ៉េខាងត្បូង នៅថ្ងៃទី១៩ ខែមករា បានប្រកាសថា កងទ័ពនឹងត្រូវកាត់បន្ថយចំនួន១២០០០០ម៉ឺននាក់ នៅឆ្នាំ២០២២ ។ ការកាត់បន្ថយនេះ គឺជាផ្នែកមួយនៃនយោបាយកែទម្រង់កងទ័ពរបស់លោកប្រធានាធិបតី មូន ចេអ៊ីន តាមទិសដៅ «តិចតែខ្លាំង» ។ ការកែទម្រង់នេះធ្វើឡើង ខណៈដែលការប្រឈមមុខផ្នែកយោធាជាមួយកូរ៉េខាងជើងនៅតែមាន។
កងទ័ពកូរ៉េខាងត្បូង ដែលមានចំនួនសរុប៦២ម៉ឺននាក់ នឹងត្រូវកាត់បន្ថយមកត្រឹម៥០ម៉ឺននាក់វិញនៅត្រឹមឆ្នាំ២០២២ ។ ផែនការកាត់បន្ថយកងទ័ពដ៏ច្រើននេះ គឺជានយោបាយរបស់រដ្ឋបាលប្រធានាធិបតី មូន ចេអ៊ីន ក្នុងការកែទម្រង់វិស័យយោធាដំណាក់កាលទីពីរ សំដៅពង្រឹងគុណភាពកងទ័ពជាជាងផ្ដោតលើបរិមាណ។
ក្នុងចំណោមកងទ័ពទាំង៦២ម៉ឺននាក់ខាងលើ ទាហានសកម្មរបស់កូរ៉េខាងត្បូងមានចំនួនជាង៤៨ម៉ឺននាក់។ ចំនួននេះតិចជាងកងទ័ពកូរ៉េខាងជើង ដែលមានយោធាសរុបច្រើនជាងមួយលាននាក់ ដោយមិនគិតទាហានបម្រុងឡើយ ហើយកូរ៉េខាងជើងត្រូវបានចាត់ទុកជាប្រទេសដែលមានយោធាធំលើពិភពលោកផងដែរ។
ក្នុងរបាយការណ៍ស្ដីពីនយោបាយការពារជាតិឆ្នាំ២០១៨ ផ្ញើទៅកាន់នាយករដ្ឋមន្ត្រី Lee Nak-yon ក្រសួងការពារជាតិកូរ៉េខាងត្បូងក៏គ្រោងកាត់បន្ថយកាតព្វកិច្ចយោធាសម្រាប់ទាហានតូចតាចពី២១ខែ មកត្រឹម១៨ខែវិញ។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។ ក្រៅពីនេះ យោធាកូរ៉េខាងត្បូងក៏នឹងត្រូវផ្លាស់ប្ដូរលើផ្នែកជាច្រើនតាមគោលដៅរបស់លោក មូន ចេអ៊ីន ។
បើតាមប្រភពព័ត៌មានខាងលើ យោធាកូរ៉េខាងត្បូងនឹងពង្រាយមន្ត្រីស៊ីវិលឲ្យកាន់តែច្រើនថែមទៀតលើបេសកកម្មមិនមែនប្រយុទ្ធ ព្រមគ្នានឹងការបង្កើនវត្តមានទាហានសកម្មនៅតាមគោលដៅជាក់ស្ដែង។ ស្ថិតក្នុងការកែទម្រង់ដែរ ចំនួនឧត្តមសេនីយ៍ក្នុងជួរកងទ័ពទាំងអស់ដែលមានសរុប៤៣០នាក់ នឹងត្រូវកាត់បន្ថយមកត្រឹម៧០ ឬ៨០នាក់ប៉ុណ្ណោះ។ ផែនការមេនៃការកែទម្រង់វិស័យការពារជាតិនេះ នឹងបញ្ចប់នៅខែមេសា ដើម្បីបញ្ចូនបន្តទៅសភា។
ទោះជាកាត់បន្ថយចំនួនទ័ពពិតមែន កូរ៉េខាងត្បូងនឹងពង្រីកទំនាក់ទំនងផ្នែកយោធាជាមួយអាមរិក ដើម្បីទប់ទល់កូរ៉េខាងជើង។ អាមេរិក គឺជាខ្នងបង្អែកដ៏ធំរបស់កូរ៉េខាងត្បូង ខណៈដែលកូរ៉េខាងជើងកំពុងប្រឹងប្រែងអភិវឌ្ឍកម្មវិធីនុយក្លេអ៊ែរ និងមីស៊ីលចម្ងាយឆ្ងាយរបស់ខ្លួន។ ស្ថានការណ៍ឧបទ្វីបកូរ៉េសព្វថ្ងៃបានធូរស្រាលខ្លះ ក្រោយការចរចារវាងកូរ៉េទាំងពីរ ប៉ុន្តែទិដ្ឋភាពជារួម ការគំរាមកំហែងនៅតែមានដដែល៕
Tag:
កូរ៉េខាងត្បូង
មូន ចេអ៊ីន
© រក្សាសិទ្ធិដោយ thmeythmey.com