ជាតិ
សង្គមជាតិ
សហគមន៍អុំទូកកំពង់ភ្លុកជួយសម្រាលជីវភាពស្ត្រីមេម៉ាយ និងមានជីវភាពក្រីក្រ
×![]()
សៀមរាប៖ ភូមិកំពង់ភ្លុក បានក្លាយជាគោលដៅទេសចរណ៍ធម្មជាតិមួយដ៏ទាក់ទាញ ទាំងទេសចរជាតិ និងអន្តរជាតិ។ ទាំងខែវស្សា និងខែប្រាំង ភូមិដែលមានផ្ទះសង់ផុតពីទឹក និងមានសរសេរខ្ពស់ៗនេះ តែងមានភ្ញៀវចូលទៅកម្សាន្តមិនដែលលស់។ ភ្ញៀវទេសចរអាចធ្វើដំណើរគយគន់ភូមិកំពង់ភ្នុកតាមរយៈកាណូតទូក។ ទៅដល់ទីនោះ ភ្ញៀវទេសចរក៏អាចទស្សនាព្រៃលិចទឹកដ៏ស្រស់ស្អាត តាមរយៈការទូកអុំខ្នាតតូច អុំដោយស្ត្រីនៅក្នុងសហគមន៍កំពង់ភ្លុកទៀតផងដែរ។
ព្រៃសហគមន៍កំពង់ភ្លុក ជាចំណុចសំខាន់ដែលភ្ញៀវទេសចរជាតិ ពិសេសទេសចរបរទេស តែងជិះទូកគយគន់ បណ្តែតអារម្មណ៍ ពេលពួកគេមកដល់ទឹកដីភូមិលិចទឹកនេះម្តងៗ។ ភ្ញៀវទេសចរអាចជិះទូក ដែលអុំដោយសហគមន៍អុំទូកស្ត្រីកំពង់ភ្លុក ដោយលឿនយឺតៗ បណ្តែតអារម្មណ៍ជាមួយសម្រស់ធម្មជាតិព្រៃលិចទឹកដ៏ល្វឹងល្វើយ ដែលមានម្លប់ត្រឈឹងត្រឈៃ។
សហគមន៍ទូកអុំកំពង់ភ្លុក មានសមាជិកជាស្ត្រីប្រមាណជាង៨០០នាក់ ដែលអ្នកខ្លះជាស្ត្រីមេម៉ាយ ក្រីក្រី និងខ្លះទៀត មានប្តីជាអ្នកនេសាទ។ របរនេះ អាចជួយពួកគេបានចំណូលបន្ថែម ក្រៅពីសមាជិកគ្រួសាររបស់ពួកកេ ចេញទៅនេសាទនៅទន្លេ។
អ្នកស្រី ផា មានប្តីជាអ្នកបើកកាណូតទេសចរណ៍ បានឱ្យដឹងថា របរអុំទូកតូចនេះ ធ្វើឱ្យអ្នកស្រីមានប្រាក់ចំណូលបន្ថែមសម្រាប់ផ្គត់ផ្គង់គ្រួសារ ហើយក្នុងមួយខែ អ្នកស្រីរកបានប្រហែល ៣០ម៉ឺនរៀល។ អ្នកស្រីបន្ថែមថា ការចងក្រងជាសហគមន៍ទូកអុំនេះ បានធ្វើឱ្យស្រី្តដែលពីមុនគ្មានការងារធ្វើ នៅតែផ្ទះ មានការងារធ្វើ រកចំណូលបន្ថែមសម្រាប់គ្រួសារ។
ក្នុងនោះដែរ អ្នកស្រី ផា បានចូលរួមការពារព្រៃលិចទឹក ដែលជាព្រៃសហគមន៍ក្នុងភូមិផងដែរ ព្រោះវាមានសារសំខាន់ខ្លាំងណាស់សម្រាប់ប្រយោជន៍ភូមិទាំងមូល ទាំងទាក់ទាញភ្ញៀវទេសចរ និងផលនេសាទ។ អ្នកស្រី ផា សង្កេតឃើញថា ភ្ញៀវទេសចរបានបង្ហាញអារម្មណ៍ស្រឡាញ់ព្រៃឈើ រាល់ពេលពួកគេជិះទូកម្តងៗ ហើយភ្ញៀវតែងស្នើអ្នកស្រី អុំទៅកន្លែងដែលមានព្រៃច្រើនផងដែរ។
ចំណែកអ្នកស្រី យ៉ាវ ពៅ ក៏ដូច្នោះដែរ មុខរបរអុំទូកនេះធ្វើឱ្យជីវភាពគ្រួសារអ្នកស្រី បានប្រសើរជាងមុន។ ក្នុងមួយថ្ងៃ អ្នកស្រីអាចអុំបានពី២ជើង ទៅ៥ជើង តាមភ្ញៀវមកច្រើនឬតិច ដែលក្នុងមួយជើង អ្នកស្រីអាចបានថវិកាចំនួន ៨០០០រៀល។ អ្នកស្រីបញ្ជាក់ថា ការងារនេះបានសម្រាលជីវភាពគ្រួសាររបស់អ្នកស្រី ដែលរកស៊ីម្នាក់ ព្រោះប្តីជរាភាព។ អ្នកស្រីបន្ថែមថា សហគមន៍ទូកអុំនេះពិតជាមានសារសំខាន់ណាស់សម្រាប់អ្នកភូមិ ព្រោះបានជួយស្ត្រីជាច្រើនឱ្យមានការងារធ្វើជាប្រចាំ បន្ទាប់ពីប្តីចេញទៅនេសាទនៅទន្លេ និងមុខរបរអ្វីផ្សេង។
ប្រធានសហគមន៍ទូកអុំ លោក សាង គង់ បានឱ្យដឹងដែរថា សហគមន៍របស់លោកបច្ចុប្បន្នមានស្ត្រីជាង៨០០នាក់ និងទូកជាង ៨០០។ លោកបន្តថា ជារៀងរាល់ថ្ងៃ មានការចាប់លេខរៀងដើម្បីដាក់វេនគ្នា និងងាយស្រួលចល័តដឹកភ្ញៀវ។ លោកបន្ថែមទៀតថា ភ្ញៀវទេសចរអាចជិះទូកអុំគយគន់ធម្មជាតិព្រៃលិចទឹករយៈពេលពីកន្លះម៉ោង ទៅមួយម៉ោង ហើយតម្លៃសំបុត្រក្នុងម្នាក់ ៥ដុល្លារ។ លោក សាង គង់បញ្ជាក់ទៀតថា សម្រាប់ម្ចាស់ទូក ក្នុងមួយជើងពួកគេបាន ៨០០០រៀល ឬ២ដុល្លារ ក្រៅពីនេះថវិកាដែលបាន គឺយកសម្រាប់ទ្រទ្រង់សហគមន៍ និងការងារអភិរក្សធនធានធម្មជាតិក្នុងសហគមន៍ទាំងមូល។ល៕
Tag:
ទូកអុំស្ត្រី
កំពង់ភ្លុក
© រក្សាសិទ្ធិដោយ thmeythmey.com
