ជាង៣ពាន់លានដុល្លារត្រូវចំណាយលើភ្នាក់ងារទិញដូរកីឡាករ រយៈពេល៥ឆ្នាំចុងក្រោយ

កីឡាអន្តរជាតិ

ជាង៣ពាន់លានដុល្លារត្រូវចំណាយលើភ្នាក់ងារទិញដូរកីឡាករ រយៈពេល៥ឆ្នាំចុងក្រោយ

21, Jan 2018 , 8:30 am

រូបភាព

(លោក Mino Raiola (ឆ្វេង) និងលោក Jorge Mendes ដែលជាកំពូលភ្នាក់ងារបញ្ចុះបញ្ចូលកីឡាករលំដាប់ពិភពលោក)

ដោយ: ទេព ពិទូរ្យ

ការស្រាវជ្រាវថ្មីពីអង្គភាពគ្រប់គ្រងកីឡាបាល់ទាត់ទ្វីបអឺរ៉ុប (UEFA) បានឲ្យដឹងថា ទឹកប្រាក់ ២.៥ពាន់លានផោន ប្រមាណ ៣.៤៤ពាន់លានដុល្លារអាមេរិកត្រូវបានចំណាយទៅកាន់ភ្នាក់ងារទិញដូរកីឡាករសម្រាប់ក្លិបក្នុងតំបន់អឺរ៉ុបគិតចាប់ពីឆ្នាំ២០១៣មក។

ប្រាក់ (ថ្លៃទឹកតែ) ដែលត្រូវចំណាយទៅឲ្យភ្នាក់ងារខាងលើនេះស្មើនឹង ១៣ភាគរយនៃប្រាកចំណាយសម្រាប់ការទិញដូរកីឡាករទាំងអស់ចំនួន ១៩ពាន់លានផោន ប្រហែល ២៦.១៧ពាន់លានដុល្លារក្នុងរយៈពេល៥ឆ្នាំ ពោលគឺចាប់ពីឆ្នាំ២០១៣ ដល់ ២០១៨។

អង្គភាពគ្រប់គ្រងកីឡាបាល់ទាត់របស់អឺរ៉ុបបានពិពណ៌នាដោយសង្កត់ធ្ងន់លើសក្តានុពលអំណាច និងសក្តានុពលរកប្រាក់ចំណូលរបស់អ្នកជំនាញបញ្ចុះបញ្ចូល រួមទាំងទ្រព្យសម្បត្តិដែលពួកគេអាចរកបានដោយគ្រាន់តែអាចនាំកីឡាករផ្លាស់ទៅកាន់ក្លិបមួយទៀតបាន។

UEFA ក៏បានរកឃើញថា នៅក្នុងការផ្ទេរ ៣២ដងក្នុងរយៈពេលប៉ុន្មានឆ្នាំចុងក្រោយនេះ គឺមានតម្លៃផ្ទេរ១លើកថ្លៃយ៉ាងហោចណាស់ ៧៥៨.០០០ផោន ប្រមាណជាង១លានដុល្លារដែរ សម្រាប់ថ្លៃសេវាដែលបង់ទៅឲ្យភ្នាក់ងារដែលជោគជ័យក្នុងការបញ្ចុះបញ្ជូលឲ្យកីឡាករចុះកិច្ចព្រមព្រៀងប្តូរពីក្លិបមួយទៅក្លិបមួយទៀត៕