ជាតិ
មួយឆ្នាំ២០១៧ ពលករខ្មែរដែលរងគ្រោះនៅបរទេសជិត ១ពាន់នាក់ ត្រូវបានជួយឲ្យមកកម្ពុជាវិញ
រូបថត-Xinhua
×![]()
ក្នុងឆ្នាំ២០១៧ ពលករ-ពលការិនីខ្មែរចំនួន ៩៨៦នាក់ ដែលរងគ្រោះនៅតាមបណ្តាប្រទេសផ្សេងៗ ត្រូវបានក្រសួងការបរទេស និងសហប្រតិបត្តិការអន្តរជាតិ ជួយសង្គ្រោះ និងរៀបចំបញ្ជូនមកកម្ពុជាវិញ។ 
ពលករ-ពលការិនីទាំង៩៨៦នាក់នោះ ត្រូវបានត្រូវបានក្រសួង និងស្ថានទូតខ្មែរ ធ្វើអន្តរាគមន៍ពីប្រទេសចំនួន៩ ក្នុងនោះ រួមមាន ម៉ាឡេស៊ី ៣៨២នាក់, វៀតណាម ១៧១នាក់, ថៃ ២៨៨នាក់, ឥណ្ឌូនេស៊ី ២៣ នាក់, ចិន ៥៣នាក់, ជប៉ុន ១២នាក់ , សិង្ហបុរី ៥នាក់, ឡាវ ៤៩នាក់, មីយ៉ាន់ម៉ា ៣នាក់។ នេះបើតាមសេចក្ដីប្រកាសព័ត៌មានរបស់ ក្រសួងការបរទេស ផ្សាយនៅថ្ងៃទី១៧ ខែមករា។
ពលករ-ពលការិនីខ្មែរខាងលើ បានរងគ្រោះនៅតាមប្រទេសនានា ក្នុងទម្រង់ផ្សេងៗគ្នា។ ទម្រង់នៃការរងគ្រោះទាំងនោះ រួមមាន ការបំពានពីនិយោជក, ការរងគ្រោះក្នុងអំពើជួញដូរកម្លាំងពលកម្ម ទៅធ្វើជាកម្មករលើទូកនេសាទ, ការរងគ្រោះដោយការបោកបញ្ឆោតយកទៅរៀបការជាមួយជនបរទេស, និងការលំបាកក្នុងការងារ តាមហាង និងតាមផ្ទះ ជាដើម។ ក្រៅពីនេះ ពលករ-ពលការិនីខ្មែរខ្លះទៀត ក៏បានជួបការលំបាក ដោយសារតែទៅរស់នៅ និងធ្វើការនៅក្រៅប្រទេស ដោយខុសច្បាប់។
ចំពោះនៅប្រទេសកូរ៉េវិញ ស្ថានទូតកម្ពុជាប្រចាំនៅទីនោះ បានជួយទាមទារប្រាក់ធានារ៉ាប់រង ជូនពលករ-ពលការិនី ដែលរងរបួស ឬបាត់បាត់ជីវិត ដោយសារគ្រោះថ្នាក់ការងារ។ ក្នុងនោះដែរ ស្ថានទូតកម្ពុជាប្រចាំប្រទេសកូរ៉េ បានដោះស្រាយការរំលោភបំពានផ្សេងៗ ពីសំណាក់និយោជក មកលើពលករខ្មែរ។
ជុំវិញបញ្ហាចំណាកស្រុករបស់ពលករនេះ កន្លងមកក្រសួងការបរទេស និងសហប្រតិបត្តិការ បានអំពាវនាវម្តងហើយម្តងទៀត ដល់ប្រជាពលរដ្ឋខ្មែរគ្រប់រូប ជាពិសេសស្ត្រីដែលងាយរងគ្រោះ គួរស្វែងរកការងារដែលមានស្រាប់ក្នុងស្រុក ជាជាងការចំណាកស្រុកទៅនៅប្រទេសក្រៅ ដែលជាការឃ្លាតឆ្ងាយពីក្រុមគ្រួសារ និងអាចជួបគ្រោះដោយការចាញ់បោកមេខ្យល់ ឬក្រុមហ៊ុនជាដើម។
សូមរម្លឹកថា នៅឆ្នាំ២០១៦ ពលករខ្មែរ ៨១៦នាក់ ដែលរងគ្រោះនៅតាមប្រទេសនានា ត្រូវបានក្រសួងការបរទេស និងសហប្រតិបត្តិការអន្តរជាតិបានជួយសង្គ្រោះ និងនាំមកកម្ពុជាវិញ។ បើប្រៀបធៀប នឹងឆ្នាំឆ្នាំ២០១៦ ពលករ-ពលការិនីខ្មែរ រងគ្រោះ បានកើនឡើង ១៧០នាក់ ក្នុងឆ្នាំ២០១៧ ៕
Tag:
ពលករខ្មែរ
ក្រសួងការបរទេសកម្ពុជា
© រក្សាសិទ្ធិដោយ thmeythmey.com
