បាល់ទះអង្គុយកម្ពុជាបានសិទ្ធចូលរួមប្រកួតជម្រុះប៉ារ៉ាឡាំពិកឡើងវិញក្រោយអវត្តមាន១៧ឆ្នាំ

កីឡាជាតិ

បាល់ទះអង្គុយកម្ពុជាបានសិទ្ធចូលរួមប្រកួតជម្រុះប៉ារ៉ាឡាំពិកឡើងវិញក្រោយអវត្តមាន១៧ឆ្នាំ

20, Jan 2018 , 11:36 am

រូបភាព

ដោយ:

ក្រុមបាល់ទះអង្គុយជនពិការកម្ពុជានឹងចូលរួមប្រកួតវគ្គជម្រុះ World Championship Qualifies ដើម្បីចម្រាញ់រកក្រុមខ្លាំងទៅចូលរួមការប្រកួតកីឡាប៉ារ៉ាឡាំពិក(Paralympic)ឆ្នាំ២០២០ នៅទីក្រុមតូក្យូប្រទេសជប៉ុន។ តាំងពីបង្កើតនៅឆ្នាំ១៩៩៧នេះជាលើកទី១ដែលកម្ពុជាទទួលបានសិទ្ធពេញលេញសម្រាប់ការចូលរួមប្រកួតវគ្គជម្រុះនេះ។ ប៉ុន្តែកម្ពុជាធ្លាប់ចូលរួមប្រកួតកម្រិតពិភពលោកម្តងកាលពីឆ្នាំ២០០០តាមរយៈសិទ្ធិអនុគ្រោះ។

ក្រោយខកខានបង្ហាញខ្លួននៅលើឆាកអន្តរជាតិអស់រយៈពេល១៧ឆ្នាំពោលគឺតាំងពីឆ្នាំ២០០០ ក្រុមបាល់ទះអង្គុយជនពិការកម្ពុជានឹងបង្ហាញខ្លួនសារជាថ្មីក្នុងព្រឹត្តិការណ៍ World Championship Qualifies (Men) នាខែមីនា ឆ្នាំ២០១៨ ខាងមុខនេះ។ ព្រឹត្តិការណ៍នេះជាការប្រកួតដើម្បីស្វែងរកក្រុមខ្លាំងសម្រាប់ព្រឹត្តិការណ៍ប៉ារ៉ាឡាំពិកឆ្នាំ២០២០នៅទីក្រុងតូក្យូប្រទេសជប៉ុន។

បើយោងតាមលោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា ការប្រកួតខាងលើធ្វើឡើងពីរដំណាក់កាលដោយដំណាក់កាលទី១ចាប់ពីថ្ងៃទី២៧ ខែមីនា ដល់ថ្ងៃទី១ ខែមេសា នៅប្រទេសកូរ៉េខាងត្បូង។ ដំណាក់នេះមាន១១ក្រុមចូលរួមរួមមានកម្ពុជា ថៃ កូរ៉េខាងត្បូង អ៊ីតាលី កូឡុំប៊ី ក្រូអាស៊ី កាណាដា ម៉ុងហ្គោលី អាស៊ែបៃហ្សង់ ឡេតូនី និងសាធារណរដ្ឋប្រជាធិបតេយ្យកុងហ្គោ។

ក្នុងចំណោមក្រុមទាំងនេះត្រូវចម្រាញ់យក៦ក្រុមឡើងទៅជួបក្រុមរង់ចាំក្នុងដំណាក់កាលទី២នាខែកក្កដា ឆ្នាំ២០១៨ នៅប្រទេសហូឡង់ ដើម្បីស្វែងរកក្រុមខ្លាំងទៅចូលរួមប្រកួតក្នុងព្រឹត្តិការណ៍ប៉ារ៉ាឡាំពិកឆ្នាំ២០២០ នៅទីក្រុងតូក្យូ ប្រទេសជប៉ុន។ អគ្គលេខាធិការរូបនេះបានបញ្ជាក់ថា ការទទួលបានសិទ្ធចូលរួមជាថ្មីនេះបន្ទាប់ពីគណៈកម្មាធិការប៉ារ៉ាឡាំពិកអន្តរជាតិទទួលស្គាល់កម្ពុជាជាសមាជិកឡើងវិញកាលពីថ្ងៃទី១២ ខែមករា ឆ្នាំ២០១៨។

«ក្នុងចំណោម១១ប្រទេសបើយើងពិនិត្យលើស្ថានភាពជាក់ស្តែងក្នុងព្រឹត្តិការណ៍អាស៊ានប៉ារ៉ាហ្គេមនៅប្រទេសម៉ាឡេស៊ីកាលពីពេលកន្លងទៅយើងមានយកឈ្នះថៃរហូតពីរប្រកួត។ ខ្ញុំអាចវាយតម្លៃបានថាកម្ពុជាសិ្ថតក្នុងលេខ១០រួចទៅហើយ។ ដូច្នេះយើងត្រូវការជម្រុះតែ៤ក្រុមទៀតប៉ុណ្ណោះនឹងអាចឡើងទៅប្រកួតនៅដំណាក់កាលចុងក្រោយនៅប្រទេសហូឡង់»។ នេះជាវាយតម្លៃរបស់ លោក យី វាសនា សម្រាប់ការប្រកួតវគ្គជម្រុះប៉ារ៉ាឡាំពិកឆ្នាំ២០២០។

ក្រុមកីឡាបាល់ទះអង្គុយជនពិការកម្ពុជាបានបង្កើតឡើងនៅឆ្នាំ១៩៩៧។ ហើយបានបង្ហាញខ្លួនក្នុងព្រឹត្តិការណ៍អន្តរជាតិលើកដំបូងនៅឆ្នាំ១៩៩៩។ នៅឆ្នាំ២០០០ កម្ពុជា ទទួលបានសិទ្ធអនុគ្រោះចូលរួមប្រកួតក្នុងព្រឹត្តិការណ៍លំដាប់ពិភពនៅទីក្រុងស៊ីតនីប្រទេសអូស្ត្រាលី។ ចាប់តាំងពីពេលនោះមក ក្រុមបាល់ទះអង្គុយកម្ពុជាហាក់គ្មានសកម្មភាពអ្វីនោះឡើយ ស្ទើរត្រូវគណៈកម្មាធិការប៉ារ៉ាឡាំពិកអន្តរជាតិព្យួរសមាជិកភាព។ នៅថ្ងៃទី១២ ខែមករា ឆ្នាំ២០១៨ គណៈកម្មាធិការប៉ារ៉ាឡាំពិកអន្តរជាតិបានស្គាល់កម្ពុជាជាសមាជិកឡើងវិញបន្ទាប់ពីមានការអន្តរាគមពីគណៈកម្មាធិការជាតិប៉ារ៉ាឡាំពិកកម្ពុជា៕