ជាតិ
រដ្ឋមន្ត្រីហាមបុគ្គលិកអប់រំ ជាពិសេសគ្រូបង្រៀន «មូរដៃអាវ» ពេលបំពេញការងារ
×
ពង្រឹងការស្លៀកពាក់ឲ្យបានសមរម្យពេលបំពេញការងារ។ នេះជាការក្រើនរំលឹកមួយរបស់លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ទៅកាន់បុគ្គលិកអប់រំ ជាពិសេសគ្រូបង្រៀន។ ផ្នែកមួយនៃការស្លៀកពាក់ដែលរដ្ឋមន្ត្រីកំណែទម្រង់ ទើសភ្នែកនោះ គឺការ «មូរដៃអាវ»។
តាមរយៈលិខិតមួយចុះថ្ងៃទី១៨ ខែមករា ឆ្នាំ២០១៨ លោក ហង់ ជួន ណារ៉ុន បានសរសេរប្រាប់ទៅប្រធានមន្ទីរអប់រំ យុវជន និងកីឡា រាជធានី-ខេត្ត ស្តីពីការពង្រឹងវិន័យ និងការអនុវត្តរបស់បុគ្គលិកអប់រំ។ លោករដ្ឋមន្ត្រី បានមើលឃើញភាពអសកម្មមួយចំនួនរបស់មន្ត្រីក្រោមឱវាទខ្លួន ដូចជាការមិនគោរពម៉ោងការងារ និង ការស្លៀកពាក់មិនសមរម្យ។
ក្រសួងអប់រំ យុវជន និងកីឡា បានប្រាប់ឲ្យបុគ្គលិកអប់រំគោរពម៉ោងបង្រៀនសិស្សឲ្យបានត្រឹមត្រូវ ដើម្បីឲ្យស្របតាមគោលនយោបាយលើកកម្ពស់គុណភាពអប់រំរបស់រដ្ឋាភិបាល។ នេះបើតាមលិខិតរបស់ក្រសួងអប់រំ ដែលប្រាប់ឲ្យប្រធានអប់រំ រាជធានី-ខេត្ត ពង្រឹងវិន័យ និងការគ្រប់គ្រងនៅគ្រឹះស្ថានសិក្សាសាធារណៈ។
ដើម្បីពង្រឹងវិន័យ និងការអនុវត្តកាតាព្វកិច្ចអប់រំឲ្យបានប្រសើរ លោក ហង់ ជួន ណារ៉ុន បានតម្រូវឲ្យថ្នាក់ដឹកនាំមន្ទីរអនុវត្តតាមវិធានការ៣ចំណុច ដែលក្នុងនោះមានការពង្រឹងយន្តការត្រួតពិនិត្យវត្តមាន ការអនុវត្តវិន័យរដ្ឋបាលចំពោះបុគ្គលិកចូលបង្រៀនយឺត ហើយចេញមុនម៉ោងកំណត់ និងអ្នកដែលយកម៉ោងការងារលាយឡំការងារផ្សេងៗ។
ចំណុចចុងក្រោយដែល បណ្ឌិតសភាចារ្យ ហង់ ជួន ណារ៉ុន បានមើលឃើញពីភាពជាគំរូដែរនោះ គឺការស្លៀកពាក់។ អ្នកបង្កើតទ្រឹស្តីអប់រំ «អ្នកចេះគឺជាប់» រូបនេះ បានណែនាំឲ្យបុគ្គលិកអប់រំស្លៀកពាក់ឲ្យបានសមរម្យ ពោលគឺហាមមូរដៃអាវ ក្នុងពេលបំពេញការងារ៕
Tag:
អប់រំ
ហង់ ជួន ណារ៉ុន
គ្រូបង្រៀន
© រក្សាសិទ្ធិដោយ thmeythmey.com