អន្តរជាតិ
អគ្គលេខាធិការអាស៊ានថ្មី ជួបលោក លី សៀនឡុងពិភាក្សាពីតួនាទីសិង្ហបុរីជាប្រធានអាស៊ានឆ្នាំនេះ
×![]()
អគ្គលេខាធិការអាស៊ានទើបកាន់តំណែង បានជួបពិភាក្សាជាមួយប្រមុខរដ្ឋាភិបាលសិង្ហបុរី ពាក់ព័ន្ធការងារជាប្រធានអាស៊ានវិលជុំ ដែលត្រូវដឹកនាំដោយសិង្ហបុរី ។ នេះគឺជំនួបជាមួយប្រមុខរដ្ឋាភិបាលលើកដំបូងហើយសម្រាប់អគ្គលេខាធិការថ្មីរូបនេះ ក្រោយត្រូវបានតែងតាំងសម្រាប់អាណត្តិរយៈពេលប្រាំឆ្នាំ ។
អគ្គលេខាធិការអាស៊ាន Lim Jock Hoi នៅថ្ងៃ ១៦ កន្លងទៅ បានបំពេញទស្សនកិច្ចទៅកាន់ប្រទេសសិង្ហបុរី និងជួបពិភាក្សាជាមួយលោកនាយករដ្ឋមន្ត្រី លី សៀងឡុង ដើម្បីពិគ្រោះយោបល់ពីរបៀបវារៈសំខាន់ នៅពេលដែលសិង្ហបុរី ធ្វើជាប្រធានអាស៊ានសម្រាប់ឆ្នាំ២០១៨នេះ ។ នេះបើយោងតាមការចុះផ្សាយរបស់គេហទំព័រផ្លូវការអាស៊ាន ។
បើជារបៀបវារៈសំខាន់នៃជំនួបនេះ មិនត្រូវបានបង្ហាញក៏ដោយ ប្រភពព័ត៌មានដដែលនោះបានបញ្ជាក់ថា លោកនាយករដ្ឋមន្ត្រី លី បានប្តេជ្ញាជាថ្មីក្នុងការដឹកនាំកិច្ចប្រជុំអាស៊ានប្រកបដោយផ្លូវការ ក៏ដូចជា ជ្រោមជ្រែងចំពោះការបំពេញការរបស់អគ្គលេខាធិការដ្ឋាន ដែលជាសេនាធិការដ៏សំខាន់សម្រាប់អាស៊ាន ។ លោកអគ្គលេខាធិការ ក៏បានអះអាងវិញដែរថា លោកបានត្រៀមខ្លួនរួចហើយដើម្បីបំពេញការថ្មីរបស់លោកមួយនេះ ។
សូមជម្រាបផងដែរថា សម្រាប់ឆ្នាំ២០១៨នេះ សិង្ហបុរី ត្រូវបំពេញតួនាទីជាប្រធានវិលជុំរបស់អាស៊ាន បន្ទាប់ពីហ្វីលីពីន ។ ជាប្រធានវិលជុំអាស៊ាន សិង្ហបុរី ត្រូវទទួលខុសត្រូវច្រើន ដោយមិនត្រឹមតែលើការរៀបចំកិច្ចប្រជុំកំពូលពាក់ព័ន្ធរបស់អាស៊ានប៉ុណ្ណោះនោះទេ តែក៏ត្រូវបង្ហាញពីភាពដឹកនាំអាស៊ានជាមួយនឹងដៃគូ និងចេញមុខដោះស្រាយបញ្ហាទាំងឡាយណាដែលពាក់ព័ន្ធអាស៊ានផងដែរ ។
គួរកត់សម្គាល់ដែរនោះ ការកាន់តំណែងប្រធានវិលជុំអាស៊ានរបស់សិង្ហបុរី ក៏ចំពេលដែល អាស៊ានផ្លាស់ប្តូរអគ្គលេខាធិការថ្មី គឺ លោក Lim Jock Hoi ។ លោក Lim Jock Hoi ត្រូវកាន់តំណែងមួយអាណត្តិដែលមានរយៈពេលប្រាំឆ្នាំ បន្ទាប់ពីអតីតអគ្គលេខាធិកា Le Luong Minh ដែលបានបញ្ចប់អាណត្តិហើយនោះ ៕
Tag:
សិង្ហបុរី
អាស៊ាន
© រក្សាសិទ្ធិដោយ thmeythmey.com
