អាជ្ញាធរខេត្តបាត់ដំបង សុំអន្តរាគមន៍ពីក្រសួងកសិកម្មដើម្បីយកដំរីបែកហ្វូងចេញពីភូមិ

ជាតិ

សង្គមជាតិ

អាជ្ញាធរខេត្តបាត់ដំបង សុំអន្តរាគមន៍ពីក្រសួងកសិកម្មដើម្បីយកដំរីបែកហ្វូងចេញពីភូមិ

20, Jan 2018 , 4:31 pm

រូបភាព

ដោយ:

សត្វដំរីមួយក្បាលបែកហ្វូង បានចូលបំផ្លាញកសិកម្ម និងបង្ករបួសស្នាមដល់ប្រជាពលរដ្ឋ ក្នុងភូមិដំណាក់ក្សាន្ត ឃុំបួរ ស្រុកភ្នំព្រឹក ខេត្តបាត់ដំបង ចាប់តាំងពីថ្ងៃទី១០ ខែមករា។ ដោយខ្លាចក្រែងដំរីមួយក្បាលនេះ បង្កអសន្តិសុខថែមទៀត អភិបាលស្ដីទីនៃខេត្តបាត់ដំបង បានស្នើដល់ក្រសួងកសិកម្ម ឲ្យចាត់មន្ត្រីជំនាញធ្វើយ៉ាងណាយកសត្វដំរីនេះចេញ។

ចាប់តាំងពីថ្ងៃទី១០ ខែមករា ផលដំណាំរបស់ប្រជាពលរដ្ឋ ក្នុងភូមិដំណាក់ក្សាន្ត ឃុំបួរ ស្រុកភ្នំព្រឹក ខេត្តបាត់ដំបង ត្រូវរងការបំផ្លាញពីសត្វដំរីព្រៃបែកហ្វូងមួយក្បាល ដែលមានទំងន់ប្រមាណ៧តោន។ មិនត្រឹមតែផលដំណាំដែលត្រូវបានបំផ្លាញទេ តែប្រជាពលរដ្ឋនៅទីនោះក៏មានអ្នករងរបួសដោយសារតែ សត្វដំរីវាយប្រហារផងដែរ។

ដោយមើលឃើញពីផលប៉ះពាល់របស់សត្វដំរីនេះ លោកអភិបាលខេត្តបាត់ដំបងស្ដីទី លោក ប៊ុត គឹមស៊ាន បានចេញលិខិតស្នើដល់ក្រសួងកសិកម្ម ឲ្យបញ្ជូនមន្ត្រីជំនាញមកនាំយកសត្វដំរីមួយក្បាលនេះ ទៅដាក់នៅកន្លែងអភិរក្សណាមួយក្នុងប្រទេសកម្ពុជា។ នេះបើតាមការចុះផ្សាយរបស់ស្នងការនគរបាលជាតិ។

នាយខណ្ឌរដ្ឋបាលព្រៃឈើ ខេត្តបាត់ដំបង លោក ពិត ភារក្ស បានឲ្យដឹងថា លោកកំពុងដឹកនាំមន្ត្រីជំនាញចុះទៅកាន់តំបន់ដែលសត្វ ដំរីព្រៃកំពុងរស់នៅ ដើម្បីសិក្សាទៅលើសត្វដំរីនេះជាមុនសិន ព្រោះមានពីរចំណុចដែលត្រូវពិចារណា។

ចំណុចដែលត្រូវពិចារណានោះគឺ បើសត្វដំរីនេះជាភេទញី នោះមន្ត្រីជំនាញត្រូវសិក្សាសិនថា តើវាមានផ្ទៃពោះឬអត់។ បើវាមានផ្ទៃពោះនោះក្រុមការងារមិនអាចប្រើប្រាស់កាំភ្លើងបាញថ្នាំ អោយសន្លប់បានទេ ព្រោះកូនក្នុងពោះនឹងត្រូវរលូត តែបើវាមិនរលូតទេ គឺត្រូវស្លាប់ទាំងមេវានិងកូន។ បើសត្វដំរីនេះជាដំរីឈ្មោល គឺជំនាញនឹងប្រើប្រាស់ថ្នាំបាញ់សន្លប់ដើម្បីនាំយកទៅរក្សានៅ ក្នុងតំបន់អភិរក្សសត្វព្រៃ នៃប្រទេសកម្ពុជា។

តាមការឃ្លាំមើលពីកម្លាំងសមត្ថកិច្ចបានបញ្ជាក់ថា កាលពីថ្ងៃទី១៨ ខែមករា ឆ្នាំ២០១៨ សត្វដំរីនេះបានដើរលុកលុយនៅក្នុងតំបន់ជើងភ្នំណាំសាប ក្នុងស្រុកភ្នំព្រឹក លុះនៅវេលាម៉ោង៥ ល្ងាចថ្ងៃទី១៩ គឺវាបានដើរមកដល់ចំណុច ភ្នំវែង ក្នុងភូមិទួលជ្រៃ ឃុំបារាំងធ្លាក់ ស្រុកភ្នំព្រឹក រហូតដល់ម៉ោង៨និង៣០នាទីព្រឹកថ្ងៃទី២០ នេះ សត្វដំរីបានដើរមកដល់ចំណុចឡានក្រឡាប់ ក្នុងភូមិគគីរ ឃុំភ្នំព្រឹក ហើយ៕