មហោស្រពភាពយន្តអន្តរជាតិកម្ពុជាលើកទី៨ នឹងចាក់បញ្ចាំងភាពយន្តជាង១២០ចំណងជើង

ជាតិ

សិល្បះ

មហោស្រពភាពយន្តអន្តរជាតិកម្ពុជាលើកទី៨ នឹងចាក់បញ្ចាំងភាពយន្តជាង១២០ចំណងជើង

21, Jan 2018 , 9:30 pm

រូបភាព

ដោយ:

មហោស្រពភាពយន្តអន្តរជាតិកម្ពុជាលើកទី៨ ដែលគាំទ្រដោយក្រសួងវប្បធម៌ និងវិចិត្រសិល្បៈ នឹងប្រារព្ធឡើងរយៈពេល មួយសប្តាហ៍ ចាប់ពីថ្ងៃទី៥ ដល់ថ្ងៃទី១១ ខែមីនា ឆ្នាំ២០១៨។ ព្រឹត្តិការណ៍ ភាពយន្តដ៏ធំប្រចាំឆ្នាំនេះ នឹងប្រមូលផ្ដុំទៅដោយភាពយន្តសម្បូរបែប និងសមិទ្ធករភាពយន្តមកពីជុំវិញពិភពលោក ក្នុងនោះមានមកពីប្រទេសបារាំង បែលហ្ស៊ិក អាមេរិក ជប៉ុន ថៃ កាណាដា អូស្ត្រាលី វៀតណាម មីយ៉ាន់ម៉ា ចិន និងសឹង្ហបូរី។

បើតាមសេចក្ដីប្រកាសព័ត៌មានរួមគ្នានៃ មហោស្រពភាពយន្តអន្តរជាតិកម្ពុជា បុប្ផាណា(BOPHANA) និង Cambodia Film Commission មហោស្រពភាពយន្តអន្តរជាតិកម្ពុជា មានគោលបំណងដើម្បីបង្ហាញ និងលើកកម្ពស់ផ្សព្វផ្សាយភាពយន្តនៅលើផ្ទាំងសំពត់សខ្នាតធំ រួមទាំងការផ្សារភ្ជាប់សមិទ្ធិករភាពយន្ត ទៅកាន់ឧស្សាហកម្មភាពយន្តទាំងមូល។

មហោស្រពភាពយន្តអន្តរជាតិកម្ពុជា នឹងចាក់បញ្ចាំងខ្សែភាពយន្តដែលថតនៅកម្ពុជា ហើយនិងផ្សព្វផ្សាយភាពយន្តរបស់កម្ពុជា ទៅកាន់អន្តរជាតិរួមទាំងស្វែងយល់ពីភាពយន្ត ដែលប្រកបដោយគុណភាពក្នុងពិភពលោក។ បើតាមសេចក្តីប្រកាសព័ត៌មាន មហោស្រពភាពយន្តអន្តរជាតិកម្ពុជាលើកទី៨ នឹងចាក់បញ្ចាំងខ្សែភាពយន្តប្រមាណ១២០ចំណងជើង ក្នុងនោះដែររួមមានទាំង ភាពយន្តខ្នាតវែងអន្តរជាតិ ភាពយន្តខ្នាតខ្លី ភាពយន្តឯកសារ និងភាពយន្តគំនូរជីវចលផងដែរ។

សូមរម្លឹកថា មហោស្រពភាពយន្តអន្តរជាតិកម្ពុជាលើកទី៧ កាលពីឆ្នាំ២០១៧ បានប្រមូលផ្ដុំ សមិទ្ធិករភាពយន្ត និងអ្នកគាំទ្រវិស័យភាពយន្តប្រមាណ ២ម៉ឺននាក់ នៅភ្នំពេញ ដោយមានការចាក់បញ្ចាំងភាពយន្តចំនួន១៦០ដង នៅទីតាំង៩ កន្លែងផ្សេងៗគ្នា៕