អន្តរជាតិ
រដ្ឋាភិបាលក្រុងហាណូយ ចង់ឃើញការវាយតម្លៃលើសិទ្ធិមនុស្សវៀតណាមដោយមិនលម្អៀង
× រដ្ឋាភិបាលក្រុងហាណូយ បានបង្ហាញចេតនាចាប់ដៃជាមួយបណ្តាដៃគូ និងប្រទេសមួយចំនួនលើវិស័យសិទ្ធិមនុស្ស ដើម្បីបង្កើនការស្វែងយល់ពីគ្នាឲ្យកាន់តែល្អ ចែករំលែកបទពិសោធន៍ ក៏ដូចជាបើកឱកាសសម្រាប់ទំនាក់ទំនងទ្វេភាគីលើវិស័យសិទ្ធិមនុស្សតែម្តង ។ តែក្រុងហាណូយ ក៏ចង់ឃើញសហគមន៍អន្តរជាតិ មើលខ្លួនក្នុងផ្លូវវិជ្ជមានផងដែរ ។
អ្នកនាំពាក្យក្រសួងការបរទេសវៀតណាម នៅថ្ងៃ ១៨ មករា បានប្រតិកម្មទៅនឹងការពណ៌នាពីស្ថានភាពអវិជ្ជមាននៃសិទ្ធិមនុស្សវៀតណាម ថា គ្រប់មនុស្សទាំងអស់ ត្រូវបានលើកកម្ពស់តាមរយៈសិទិ្ធមនុស្ស ក៏ប៉ុន្តែ ប្រទេសនីមួយៗ មានគោលនយោបាយ និងការផ្តល់អាទិភាពខុសគ្នាដោយអាស្រ័យលើប្រវត្តិសាស្ត្រ វប្បធម៌ អង្គការនយោបាយ និងកម្រិតនៃការអភិវឌ្ឍ ។ នេះបើយោងតាមការចុះផ្សាយរបស់ភ្នាក់ងារព័ត៌មាន វៀតណាម Vietnam News ។
លោកស្រីអ្នកនាំពាក្យ Lê Thị Thu Hằng បានបន្ថែមទៀតថា នេះ គឺជារឿងធម្មតាទៅហើយនៅក្នុងឆាកអន្តរជាតិ ។ តែអ្វីដែលសំខាន់នោះគឺ វៀតណាម បានត្រៀមខ្លួនរួចជាស្រេចសម្រាប់កិច្ចសហប្រតិបត្តិការ និងកិច្ចសន្ទនា ដោយឈរលើគោលការណ៍ ស្ថាបនា និងគោរពគ្នាទៅវិញទៅមក ។
អ្នកពាក្យដដែលនោះ បានសង្កតធ្ងន់ថា៖«វៀតណាម ចង់ឃើញការវាយតម្លៃពីកិច្ចប្រឹងប្រែង និងសមិទ្ធផលរបស់វៀតណាមក្នុងការធានាពីសិទ្ធិមនុស្សពីសហគមន៍អន្តរជាតិប្រកបដោយគ្រប់ជ្រុងជ្រោយ និងមិនលម្អៀង» ។
គួរជម្រាបផងដែរថា តាមរបាយការណ៍របស់អ្នកឃ្លាំមើលសិទ្ធិមនុស្ស (Human Right Watch ) ស្ថានភាពសិទ្ធិមនុស្សវៀតណាម នៅតែស្ថិតនៅក្នុងកម្រិតមួយគួរព្រួយបារម្ភ ។ ស្ថាប័នសិទ្ធិមនុស្សនេះអះអាងថា បក្សកុម្មុយនីស្ត បន្តគ្រប់គ្រងអំណាច ដោយមិនអនុញ្ញាតឲ្យមានការប្រជែងឡើយ ។ សិទ្ធិមូលដ្ឋានដែលរួមទាំងសេរីភាពបញ្ចេញមតិ ប្រមូល និងសាសនា សុទ្ធសឹងតែត្រូវរឹតត្បិត ៕
Tag:
វៀតណាម
សិទ្ធិមនុស្ស
© រក្សាសិទ្ធិដោយ thmeythmey.com