រថយន្ត
អន្តរជាតិ
ប្រធានាធិបតីតួកមេនីស្ថាន ចេញបញ្ជាហាមប្រើប្រាស់រថយន្តពណ៌ខ្មៅ
× ចំណតរថយន្តនៅផ្លូវ Yubileynaya ក្រុង Ashgabat ជាកន្លែងសម្រាប់ផ្ទុករថយន្តពណ៌ខ្មៅ។ បើតាមការផ្សាយរបស់សារព័ត៌មាន Chronicles of Turkmenistan រថយន្តទាំងនោះ ត្រូវបានសមត្ថកិច្ចឃាត់ទុក និងហាមចរាចរ ក្រោយមានបទបញ្ជាដ៏តឹងរឹងរបស់លោកប្រធានាធិបតីតួកមេនីស្ថាន។
លោក Gurbanguly Berdimuhamedow គឺជាមនុស្សម្នាក់ដែលមានអបិយជំនឿ។ សារព័ត៌មានក្នុងស្រុកបានផ្សាយឲ្យដឹងថា ប្រធានាធិបតីនៅប្រទេសអាស៊ីកណ្តាលដែលផ្តាច់ចេញពីអតីតសហភាពសូវៀតរូបនេះ ជឿថា ពណ៌សនាំមកនូវសំណាងល្អ រីឯពណ៌ខ្មៅជាប្រភពនៃឧបទ្រព។
គិតចាប់តាំងពីដើមឆ្នាំ២០១៨មក អាជ្ញាធរប៉ូលិសក្រុង Ashgabat បានបើកប្រតិបត្តិការក្តៅប្រឆាំងនឹងអ្នកប្រើប្រាស់រថយន្តពណ៌ខ្មៅ។ ចំពោះរថយន្តដែលត្រូវបានឃាត់ទុក ម្ចាស់រថយន្ត ត្រូវសរសេរកិច្ចសន្យា ប្តូរពណ៌របស់វាពីខ្មៅ ទៅស ឬពណ៌ភ្លឺផ្សេងៗទៀត។
កាសែត Chronicles of Turkmenistan បានបញ្ជាក់ឲ្យដឹងថា លោក Gurbanguly Berdimuhamedow ដែលកាន់តំណែងជាប្រធានាធិបតីតួកមេនីស្ថានតាំងពីឆ្នាំ២០០៧ បានចេញបញ្ជាហាមប្រើប្រាស់រថយន្តពណ៌ខ្មៅ តាំងពីឆ្នាំ២០១៥ មកម្ល៉េះ ប៉ុន្តែមិនសូវមានប្រសិទ្ធភាព។
ចាប់ពីឆ្នាំ២០១៨នេះ លោកបានដាក់កំហិតដ៏តឹងរ៉ឹង ខណៈតម្លៃនៃការប្តូរពណ៌រថយន្ត ឡើងទ្វេរជាពីរ ពោលគឺពី៥០០ដុល្លារអាមេរិក ទៅ១០០០ដុល្លារអាមេរិកសម្រាប់សេវាកម្មរថយន្តមួយគ្រឿង។
ការហាមឃាត់ និងការដាក់ពិន័យអ្នកប្រើប្រាស់រថយន្តពណ៌ខ្មៅ ផ្តើមអនុវត្តនៅក្រុង Ashgabat ហើយនឹងបន្តធ្វើទូទាំងប្រទេស។ លោក Gurbanguly លើកទឹកចិត្តពលរដ្ឋរបស់ខ្លួន ប្រើប្រាស់រថយន្តពណ៌ស ដែលលោកអះអាងថា ជាពណ៌នាំសំណាង៕
© រក្សាសិទ្ធិដោយ thmeythmey.com