ទិវារត់កម្សាន្តពេលរាត្រីលើកទី៣ គ្រោងរៀបចំនៅចុងខែមករា

កីឡាជាតិ

ជាតិ

ទិវារត់កម្សាន្តពេលរាត្រីលើកទី៣ គ្រោងរៀបចំនៅចុងខែមករា

24, Jan 2018 , 9:59 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ គណៈកម្មការជាតិអូឡាំពិកកម្ពុជា នឹងរៀបចំទិវារត់កម្សាន្តពេលរាត្រីជាលើកទី៣ នៅថ្ងៃទី២៨ ខែមករាខាងមុខនេះ នៅខេត្តសៀមរាប។ នេះជាកីឡាថ្មីមួយ សម្រាប់ទាក់ទាញទេសចរដែលចូលចិត្តការកម្សាន្តបែបសប្បាយ និងប្លែក។

លោក សែម ផល្លា នាយកចាត់ការទូទៅ ក្នុងការរៀបចំទិវារត់ប្រណាំងអន្តរជាតិ និងការរត់កម្សាន្តពេលរាត្រី នៃគណៈកម្មការជាតិអូឡាំពិក បានប្រាប់សារព័ត៌មានថ្មីៗ នៅរសៀលថ្ងៃទី២៤ ខែមករាថា លោកមិនទាន់ច្បាស់ ពីចំនួនអ្នកចូលរួម ក្នុងកម្មវិធីលើកទី៣នេះនៅឡើយ។ លោកបន្ថែមថា គម្រោងរបស់គណៈកម្មការជាតិអូឡាំពិក គឺរៀបចំទិវារត់កម្សាន្តពេលរាត្រីនេះចំនួន ៣ដង ក្នុងមួយឆ្នាំ សម្រាប់ឆ្នាំដំបូង នៃគម្រោងសាកល្បងឱ្យមានប្រភេទកីឡាថ្មីនេះនៅកម្ពុជា។

តាមការឱ្យដឹងបន្ថែមពីលោក សែម ផល្លា ឆ្នាំទីមួយនៃការដកពិសោធន៍ប្រភេទកីឡាថ្មីនេះ គណៈកម្មការជាតិអូឡាំពិកសម្រេចធ្វើ៣ដងក្នុងមួយឆ្នាំ ដោយជ្រើសរើសតំបន់ផ្សារចាស់ ខេត្តសៀមរាប ជាទីតាំង។ លោកបញ្ជាក់ថា៖« ខេត្តសៀមរាបជាខេត្តទេសចរណ៍សម្បូរភ្ញៀវទេសចរច្រើន។ ហើយគោលការណ៍យើង ធ្វើរាល់ខែណាដែលសម្បូរភ្ញៀវ ឬ High Season។ តែពីឆ្នាំក្រោយៗទៅ យើងនឹងរៀបចំ២ដងក្នុងមួយឆ្នាំវិញ និងមានធ្វើនៅតាមបណ្តាខេត្តផ្សេងៗ ដែលយើងកំពុងគិត ក្នុងនោះមានរាជធានីភ្នំពេញ និងក្រុងព្រះសីហនុ»។

ក្រោយមានបទពិសោធន៍រៀបចំបាន២ដងរួចមក លោក សែម ផល្លា បានមើលឃើញពីសន្ទុះចូលរួមច្រើនពីភ្ញៀវទេសចរបរទេស ក្នុងនោះក៏មានយុវជនចូលរួមច្រើនផងដែរ។ ប៉ុន្តែលោកទទួលស្គាល់ថា ចំនួនអ្នកចូលរួមមិនទាន់ច្រើនទេ ដោយសារកង្វះពេលវេលាក្នុងការផ្សព្វផ្សាយព័ត៌មាន។

ទិវារត់កម្សាន្តពេលរាត្រី ជាព្រឹត្តិការណ៍បែបមនុស្សធម៌ ដូចទៅនឹងព្រឹត្តិការណ៍កីឡាម៉ារ៉ាតុងផងដែរ។ សម្រាប់អ្នកចូលរួមក្នុងការកីឡានេះ ៥ដុល្លារសម្រាប់ជនជាតិខ្មែរ និង២០ដុល្លារសម្រាប់បរទេស។ ការរត់ចាប់ផ្តើមនៅរវាងម៉ោង ៧យប់ ក្នុងរយៈចំងាយផ្លូវខ្លី បន្ទាប់មកក៏មានការរាំកម្សាន្តដល់រាត្រីផងដែរ។

គួររម្លឹកថា ទិវារត់កម្សាន្តពេលរាត្រីលើកទី១ ត្រូវបានធ្វើឡើងនៅដើមខែ វិច្ឆិកា ឆ្នាំ២០១៧ ដោយពេលនោះបានទាក់ទាញអ្នកចូលរួមប្រមាណជិត៧០០នាក់។ លើកទី២ រៀបចំឡើងនៅយប់ឆ្លងឆ្នាំសកល ថ្ងៃទី៣១ ខែធ្នូ ឆ្នាំ២០១៧ មានអ្នកចូលរួមប្រមាណ ៩០០នាក់៕