ពីនេះ ពីនោះ
រដូវត្រីប្រហុកៈ ការកាត់ក្បាលត្រីដោយដៃ ជាន់លាងសម្អាតដោយជើង គឺបានស្អាតល្អជាងការប្រើម៉ាស៊ីនវាយ
× រូបភាពទាំងពីរនេះ បង្ហាញពីសកម្មភាពរបស់អ្នកធ្វើត្រីប្រហុកកំពុងសម្អាតស្រកា និងខ្លាញ់ចេញពីត្រី មុននឹងយកទៅប្រឡាក់អំបិលផ្អាប់ធ្វើប្រហុក។ រូបភាពខាងលើ គឺបុរសបីនាក់កំពុងជាន់ជម្រុះស្រកា និងខ្លាញ់ត្រី ដែលពួកគាត់បានកាត់ក្បាលរួចដោយដៃម្តងមួយៗ រួចលាងសម្អាតនៅតាមដងទន្លេសាប។ ចំណែករូបភាពខាងក្រោម គឺបង្ហាញពីសកម្មភាពបុរសម្នាក់ទៀតកំពុងសម្អាតស្រកា ខ្លាញ់ និងលាងសម្អាតត្រី ដោយប្រើម៉ាស៊ីនទូកតូចៗ។ លោក រស់ សាន មកពីខេត្តកំពង់ស្ពឺ បានឲ្យដឹងថា ការកាត់ក្បាលត្រីដោយដៃ រួចជាន់ជម្រះស្រកា និងខ្លាញ់ដោយជើង វាបានស្អាតល្អ តែត្រូវចំណាយកម្លាំងមនុស្ស និងស៊ីពេលយូរជាងការប្រើម៉ាស៊ីនវាយលាងសម្អាត។
ពពួកត្រីរៀល ធ្វើចរាចរផ្លាស់ទីជាប្រចាំឆ្នាំ ចេញពីតំបន់ព្រៃលិចទឹកក្នុងបឹងទន្លេសាប ចាប់ពីខែតុលា ដល់ខែកុម្ភៈ ឆ្ពោះទៅខ្សែទឹកខាងលើនៃទន្លេមេគង្គ ល្បាក់ខោន។ ត្រីប្រភេទទាំងនេះ ត្រូវបានគេចាត់ទុកថា មានសារៈសំខាន់ណាស់ សម្រាប់ប្រជាជានរស់នៅក្នុងតំបន់។ ការបំពុលបរិស្ថាន ការបាត់បង់ និងការប្រែប្រួលទីជម្រក ដោយសារការទន្ទ្រាន ការដុតបំផ្លាញព្រៃលិចទឹកយកដីធ្វើជាកម្មសិទ្ធ ការប្រើប្រាស់ថ្នាំពុលកសិកម្មនៅក្នុងតំបន់ព្រៃលិចទឹកនៅរដូវទឹកសម្រក ក្នុងបឹងទន្លេសាប និងការសាងសង់ទំបន់វារិអគ្គិសនី ដែលជាផលរំខានដល់វដ្តនៃរដូវប្រាំង/រដូវវស្សា នៃរបបទឹកដែលចូលទៅបំពេញផ្ទៃបឹងទន្លេសាប សុទ្ធតែជាបញ្ហាអវិជ្ជមាន ដែលនឹងប៉ះពាល់ដល់ជីវិតមច្ឆជាតិជាខ្លាំង។
(អត្ថបទ និងរូបភាពដោយ Chhut Chheana / USAID Wonders of the Mekong).
© រក្សាសិទ្ធិដោយ thmeythmey.com