ជាតិ
ឆ្នាំ២០១៧ខេត្តសៀមរាបទទួលបានទេសចរសរុបជាង ៥លាននាក់
× សៀមរាប៖ របាយការណ៍របស់រដ្ឋបាលខេត្តសៀមរាប ចំនួនភ្ញៀវទេសចរដែលមកកម្សាន្តក្នុងខេត្តសៀមរាបនៅឆ្នាំ២០១៧កន្លងទៅ មានចំនួនសរុបជាង ៥លាននាក់ ដែលចំនួននេះកើនឡើងជិត១០ភាគរយ បើធៀបនឹងឆ្នាំ២០១៦។
អភិបាលខេត្តសៀមរាប លោក ឃឹម ប៊ុនសុង ក្នុងពិធីបិទសន្និបាតបូកសរុបការងារប្រចាំឆ្នាំ២០១៧ កាលពីរសៀលថ្ងៃទី២៥ មករា ឆ្នាំ២០១៨ បានអានរបាយការណ៍ទេសចរណ៍សរុបក្នុងឆ្នាំ២០១៧។ តាមលោកអភិបាលខេត្ត ទេសចរសរុបដែលមកកម្សាន្តក្នុងខេត្តសៀមរាបក្នុងឆ្នាំកន្លងទៅ មានចំនួន ៥,៥៤៣,៤៣៤នាក់ កើនឡើង ៩.៩៣ភាគរយ ធៀបនឹងឆ្នាំ២០១៦។
ក្នុងចំណោមភ្ញៀវទេសចរទាំងជាង ៥លាននាក់ ក្នុងនោះទេសចរបរទេសមានចំនួន ២,៤៥៧,២៨២នាក់ កើនឡើង ១១.៤២ភាគរយ ចំណែកទេសចរជាតិ មានចំនួន ៣,០៨៦,១៥២នាក់ កើនឡើង ៨.៧៧ភាគរយ ធៀបនឹងឆ្នាំ២០១៦៕
© រក្សាសិទ្ធិដោយ thmeythmey.com